काठमाडाैं– सैन्य दमनपश्चात कम्तिमा १२ बर्मेली भारतीय सिमाना पार गर्दै उत्तरपूर्वी राज्य मिजोरममा शरण लिन आइपुगेका छन्। सेरछिप जिल्ला प्रमुख कुमार अभिषेकले आठ जना बर्मेली आफ्नो जिल्लामा शरण लिएको बीबीसीलाई जानकारी दिए।
स्थानीय अंग्रेजी दैनिक समाचार पत्रिका ‘मिजोरम पोस्ट’मा प्रकाशित समाचार अनुसार चार जना बर्मेली हाल चम्पाइ जिल्लामा शरण लिइरहेका छन्।
के ती आठजना मध्येमा बर्मेली प्रहरी पनि छन् भन्ने प्रश्नमा अभिषेकले भने, ‘यो पुष्टि भइसकेको छैन कि तिनीहरू म्यानमारका प्रहरी वा साधारण नागरिक हुन्। यी व्यक्ति मिश्रित समूहमा छन्। हामीले यी सबै व्यक्तिको विस्तृत जानकारी गृह विभागलाई पठाएका छौं र सरकारको अर्को निर्देशनको लागि पर्खाइमा छौं।’
म्यानमारको राजनैतिक परिस्थिति परिवर्तन भइसकेपछि सिमामा सतर्कता अपनाइएको समेत उनले जानकारी दिए।
तर स्थानीय पत्रकार सी. लालहिंघलुआले बीबीसीसँग भने, ‘मिजोरमको लुङ्गकोल गाउँमा आएका आठ जना बर्मेलीमध्ये प्रहरीका कर्मचारी पनि हुन् भने बाँकी दुई जना व्यक्ति प्रहरी अधिकारीका श्रीमती हुन् र एक बच्चा पनि छन्।’
उनका अनुसार म्यानमारबाट भागेका यी सबै प्रहरीहरु सीमापार डन गाउँका बासिन्दा हुन्।
बिहीबार मात्रै साउथ चाइना मनिङ पाेस्टले म्यानमारका १९ प्रहरी भारतमा शरण लिन आइपुगेकाे समाचार प्रकाशित गरेकाे थियाे।
यसबीचमा भारत पुगेका प्रहरीले सैन्य शासकले जनतामाथि क्रुर व्यवहार गर्न लगाएपछि आफूहरु भारत भागेको बताएका छन्।
ती प्रहरीहरु म्यानमारसँगको भारतीय सीमा क्षेत्र चम्पाइ र सरचिप मै रहेकाे जनाइन्छ। भारतीय अधिकारीहरुका अनुसार तीसबै प्रहरीहरु सानो ओहदाका प्रहरीहरु हुन्।
उनीहरु हतियार बिना नै भारत आइपुगेका हुन्। भारतीय अनुसन्धान एजेन्सीका अनुसार प्रहरीसँगै अन्य मानिसहरु पनि भारत आउन सक्छन्।
यसअघि नै म्यान्मार सरकारको दमनमा परेको भन्दै रोहिन्ज्या मुसलमान समुदायका सयौं मानिसहरु भारतमा शरणार्थी जीवन बिताइरहेका छन्।
गत महिनादेखि म्यानमारमा सैन्य शासन लागू भएको छ। सेनाले लोकतन्त्रवादी नेतृ आङ साङ सुची, राष्ट्रपति विन मिन्टसहित शीर्ष नेताहरुलाई नजरबन्दमा राखेर सत्ता हत्याएका हुन्।
सुचीको पार्टीले धाँधली गरेर चुनाव जितेको र सरकारमा आएको सेनाको आरोप रहेको छ। सेनाले एक वर्षपछि मात्र सैन्य शासन अन्त्य गर्ने र आम निर्वाचन जित्ने दललाई सत्ता हस्तान्तरण गर्ने बताएका छन्।
त्यसयता लगातार सेना तथा प्रहरीले लोकतन्त्र पुनर्स्थापना हुनुपर्ने भन्दै थालिएको आन्दोलनमा होमिएका व्यक्तिहरु माथि दमन जारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
