प्रधानमन्त्री ओलीले फेरि सम्झिए ५१ स्वर्ण

राजनीति

नेपाल लाइभ सोमबार, फागुन ३, २०७७ १४:५९

काठमाडौं- प्रधानमन्त्री केपी शर्मा ओलीले सरकारको तीन वर्षे उपलब्धि सुनाउने क्रममा १३औँ दक्षिण एसियाली खेलकुद प्रतियोगिता (साग)मा जितेको ५१ स्वर्ण पदकलाई प्रमुख उपलब्धिका रुपमा प्रस्तुत गरेका छन्।

१३औँ साग सम्पन्न भएदेखि नै सागको सफल आयोजना र पदक संख्यालाई प्रमुख उपलब्धिमा सामेल गर्दै आइरहेका प्रधानमन्त्रीले तीन वर्षे उपलब्धि सुनाउँदा पनि त्यसलाई दोहोर्‍याएका हुन्। उनले दशरथ रंगशालाको पुनर्निर्माण र पोखरा रंगशालाको निर्माणलाई पनि उपलब्धि रुपमा सुनाए।

‘भूकम्पपछि क्षतिग्रस्त दशरथ रंगशालाको पुनर्निर्माण यसै अवधिमा सम्पन्न भएको छ। पोखरामा नयाँ रंगशाला निर्माण गरिएको छ। १३औँ दक्षिण एसियाली खेलकुदको सफल आयोजना मात्रै भएन, ५१ स्वर्णसहित २०७ पदक हासिल गरी नेपालले आफूलाई दक्षिण एसियामा भारतपछि दोस्रो स्थानमा उभ्याउन सफल भएको छ,’ प्रधानमन्त्रीले भनेका छन्।

खेलकुद क्षेत्रमा भएका तीन विषयलाई प्रस्तुत गरेका प्रधानमन्त्री ओलीले आर्थिक अनुशासन, राष्ट्रिय एकता, सामाजिक सुरक्षा, पर्यटन, उद्योग लगानी, ऊर्जा, सडक निर्माण जस्ता विषयलाई प्रमुख रुपमा प्रस्तुत गरेका थिए। उनले यसअघि जस्तो खेलकुदको ‘लम्बेतान उपलब्धि’ भने यसपटक सुनाएनन्। सबै कुरा भन्न समय पूरा नहुने र मन्त्रालयमार्फत् कामबारेको जानकारी पाइने समेत सम्बोधनको क्रममा उनले बताएका थिए।

साग सकिएलगत्तै प्रधानमन्त्रीले बालुवाटार खेलाडीलाई बोलाएर पुरस्कार रकम घोषणा गरेका थिए। जसमा स्वर्ण जित्नेलाई ९ लाख, रजत जित्नेलाई ६ लाख र कास्य जित्नेलाई ३ लाख रुपैयाँ खेलाडीको खातामा गइसकेको छ।

सागको आयोजना सफल रुपमा सम्पन्न गरेको सरकारले त्यसबाट प्राप्त उपलब्धिलाई १४औँ सागसम्म निरन्तर गराउने दिशा भने देखिँदैन। खेलकुदको विषयमा सरकारले उपलब्धिको रूपमा प्रस्तुत गरिरहेको ५१ स्वर्ण, ६० रजत र ९६ कास्य पदकले पूर्वाधार निर्माणका विषयका साथै खेल सुधारका अन्य विषय गौण भइरहेका छन्।

साग सकिएलगत्तै प्रधानमन्त्रीले बालुवाटार खेलाडीलाई बोलाएर पुरस्कार रकम घोषणा गरेका थिए। जसमा स्वर्ण जित्नेलाई ९ लाख, रजत जित्नेलाई ६ लाख र कास्य जित्नेलाई ३ लाख रुपैयाँ खेलाडीको खातामा गइसकेको छ।

२०४१ सालमा पहिलोपटक साग आयोजना गरेको नेपालले २०५६ सालमा आठौं साग आयोजना गरेको थियो। १३औं साग नेपालमा भएका पहिलेको दुई प्रतियोगिताभन्दा सफल रहेको भन्दै तुलना भइरहेको पाइन्छ। प्रधानमन्त्रीले मात्र होइन, खेलकुद मन्त्रीदेखि राखेप सदस्यसचिवसम्मले आफ्नो उपलब्धि सुनाउने मेसो सागलाई नै बनाइरहेका छन्।

पदक नै हेर्दा पनि १३औँ सागमा ३ सय १६ स्वर्णका लागि प्रतिस्पर्धा भएको थियो। यसैले नेपालमा आयोजना भएका पहिलेका दुई सागको तुलनामा धेरै स्वर्ण आउनु राम्रो हुँदाहुँदै पनि स्वभाविक नै हो। नेपालको कमजोर खेल व्यवस्थापन र सुविधाविहीन खेलाडी हेर्दा सोचिए भन्दा धेरै पदक आएको भने हो।

नेपालमा आयोजना भएको पहिलो सागमा पाँच खेलमा गरेर ६२ स्वर्ण पदकका लागि मात्र प्रतिस्पर्धा भएको थियो। त्यसमा नेपालले चार स्वर्ण पदक जितेको थियो। नेपालमा दोस्रो पटक आयोजना भएको आठौं सागमा १२ खेलमा गरेर १ सय ६१ स्वर्ण पदकका लागि प्रतिस्पर्धा भएको थियो। जसमा नेपालले ३१ स्वर्ण पदक जितेको थियो।

औपचारिक रुपमा २०७६ मंसिर १५ देखि २४ सम्म चलेको साग खेलकुदमा उद्घाटनकै दिनसम्म पनि भौतिक पूर्वाधार निर्माण सकिएको थिएन। १३औं सागमा देखिएको खेलाडीको मेहनत र नेपालले पूरा गरेको आयोजनाको जिम्मेवारी सह्रानीय हुँदाहुँदै एक वर्ष बितिसक्दा पनि त्यसलाई भविष्यका लागि अन्य पाटोबाट हेरिएको छैन।

साग सकिएको तीन महिनाभित्र खर्च विवरण सार्वजनिक गर्ने प्रतिबद्धता गरेको राखेपले एक वर्षपछि गएको मंसिर १४ गते खर्च विवरण सार्वजनिक गरेको थियो। जसमा कार्यक्रमतर्फ १ अर्ब ३१ करोड ७८ लाख ४३ हजार ६१ रुपैयाँ साथै निर्माणतर्फ २ अर्ब ८६ करोड १४ लाख २८ हजार ९ सय ७३ रुपैयाँ खर्च भएको देखिएको बताइन्छ। तर त्यसको शीर्षकगत खर्च भने अझै अस्पष्ट नै छ।