फाइल तस्बिर
काठमाडौं- नेपाल राष्ट्र बैंकका गभर्नर महाप्रसाद अधिकारीले स्वदेशी श्रम र सिपलाई प्रवर्द्धन गर्न आग्रह गरेका छन्। देशको ठूलो जनशक्ति रोजगारीका लागि विदेश पलायन हुनुपरेको विद्यमान अवस्थामा पनि नेपालमा भने कयौं क्षेत्रमा अझै विदेशी कालीगढको बाहुल्यता रहेकाले स्वदेशी श्रम र सिपलाई प्रवर्द्धन गर्नु उनले आग्रह गरेका हुन्।
नेपाल सुनचाँदी व्यवसायी महासंघका प्रतिनिधिमण्डलसँग बुधबार भएको छलफलमा गभर्नर अधिकारीले सुनचाँदीको क्षेत्रमा काम गर्नका लागि पर्याप्त स्वदेशी कालीगढ उत्पादन गर्न र विदेशी कालिगढलाई विस्थापित गर्न सुझाव दिएका हुन्।
स्वदेशी कालीगढ उत्पादनका लागि आवश्यक पर्ने सिप विकास तालिमका लागि राष्ट्र बैंकले समेत सहयोग गर्ने प्रतिबद्धता उनले जनाएका छन्। एक तथ्यांकअनुसार नेपालको सुनचाँदी क्षेत्रमा मात्रै करिब ७० हजार विदेशी कालिगढले काम गर्दै आएका छन्।
व्यवसायीसँगको छलफलका क्रममा गभर्नर अधिकारीले भुक्तानीमा डिजिटल प्रणाली ‘क्युआर कोड’ लागू गर्न आग्रह गरे। अहिलेको डिजिटल युगमा परम्परागत शैली प्रयोग गर्नु आफैंमा अव्यवहारिक भएको उल्लेख गर्दै सुनचाँदी व्यवसायमा हुने भुक्तानी प्रणालीलाई पनि तत्काल डिजिटल प्रणालीमा परिमार्जन गर्नपर्नेमा अधिकारीले जोड दिए।
सुनचाँदी व्यवसायीले अगाडि सारेका मागहरूबारे आफू सकारात्मक रहेको उल्लेख गर्दै गभर्नर अधिकारीले सम्भव भएसम्म माग पूरा गराउन राष्ट्र बैंक तयार रहेको बताए। सुनको आपूर्ति विदेशी मुद्राको सञ्चितिसँग सम्बन्धित रहेको उल्लेख गर्दै बजारको माग अनुरुप त्यसलाई व्यवस्थापन गर्न राष्ट्र बैंक सकारात्मक रहेको उनको भनाइ छ।
तोकिएका नाकाहरूबाट पनि सरल र सहजरूपमा सुन वितरणको व्यवस्था मिलाउन, १५ दिन अगावै सिफारिस बिना नै सुन बिक्री गर्ने गरिएको भए त्यसलाई नियन्त्रण गर्न, आफूर्तिमा लागू हुँदै आएको कोटाको सीमा पुनरावलोकन गर्न र व्यवसायीले उठाएका अन्य जायज मागको सम्बोधन गर्न राष्ट्र बैंक तयार रहेको बताए।
महासंघ अध्यक्ष माणिकरत्न शाक्यले व्यवसाय सञ्चालनका दौरानमा आइपरेका समस्या जानकारी गराउँदै तीनलाई हल गर्नका लागि पहल गर्न आग्रह गरे। व्यवसायीलाई परेका समस्या समाधान गर्न राष्ट्र बैंकको मुख्य भूमिका हुने उल्लेख गर्दै त्यसमा आवश्यक पहल गरिदिन गभर्नर अधिकारीको ध्यानाकर्षण गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765020310.png)
-1765011379.png)
-1764146706.png)
-1763721444.png)
