काठमाडौं- खाद्य पदार्थको अन्तर्राष्ट्रिय व्यापार तथा भन्सार जाँचपाससँग सम्बन्धित अनुमतिपत्र, इजाजत, प्रमाणपत्र र अन्य निवेदनका लागि खाद्य प्रविधि तथा गुण नियन्त्रण विभागले अनलाइन सेवा दिने भएको छ।
कृषि तथा खाद्य पदार्थ आयात गर्दा आवश्यक पर्ने अनुमति, भन्सार र खाद्य प्रयोगशालासँग सम्बन्धित सबै प्रक्रिया एकै ठाउँबाट टुंग्याउनका लागि ‘नेपाल राष्ट्रिय एकद्वार प्रणाली’ कार्यान्वयन गर्ने विषयमा अघिल्लो हप्ता सरकारका विभिन्न निकायहरुबीच सम्झौता (एमओयू) भएको थियो।
भन्सार जाँचपास प्रक्रियालाई सरल र छिटो बनाएर व्यापार सहजीकरण गर्नका लागि भन्दै कृषि तथा पशुपन्छी विकास मन्त्रालय मातहतका प्लान्ट क्वारेन्टाइन तथा विषादी व्यवस्थापन केन्द्र, पशु सेवा विभाग र खाद्य प्रविधि तथा गुण नियन्त्रण विभागले दिने सेवा राष्ट्रिय एकद्वार प्रणालीबाटै दिने गरी एमओयू भएको थियो।
यो प्रणाली लागू भएसँगै कृषिजन्य वस्तुको निकासी पैठारी गर्दा समय र लागत दुवै कम पर्ने जनाइएको छ। निकासीकर्ता वा पैठारीकर्ता सम्बन्धित विभाग र कार्यालयमा भौतिक रूपमा उपस्थित हुनु नपर्ने, सिफारिस पत्रसाथ भन्सार विन्दुमा पुग्नुपर्ने झन्झटको अन्त्य हुने, निर्णय प्रक्रिया चाँडो हुने र काम कारबाही पारदर्शी हुने गरी यो व्यवस्था कार्यान्वयनमा आएको विभागको दाबी छ।
एकद्वार प्रणाली लागू भएपछि कानूनी प्रक्रिया पूरा भएका वस्तु भन्सार विन्दुमा नरोकिने हुँदा शुल्क न्यून हुने नै समय र लागत कम हुनुका साथै यसबाट व्यापार सहजीकरणमा थप सहयोग पुग्ने अपेक्षा गरिएको छ।
नेपाल राष्ट्रिय एकद्वार प्रणालीमा भन्सार विभाग, वाणिज्य आपूर्ति तथा उपभोक्ता संरक्षण विभाग, उद्योग विभाग, आन्तरिक राजश्व विभाग, खाद्य प्रविधि तथा गुण नियन्त्रण विभाग, पशु सेवा विभाग, प्लाण्ट क्वारेन्टाइन एवं विषादी व्यवस्थापन केन्द्र, औषधी व्यवस्था विभाग, यातायात व्यवस्था विभाग, नेपाल गुणस्तर तथा नापतौल विभाग लगायत ४० वटा निकायहरू एउटै सञ्जालमा आवद्ध रही कार्य अघि बढाउने तयारी रहेको छ। तर, यो प्रणाली कार्यान्वयनको पहिलो चरणमा अहिले २१ वटा निकायहरु मात्रै जोडिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
