काठमाडौं- सर्वोच्च अदालतबाट प्रधानन्यायाधीश भएर अवकाश पाएका चार पूर्वप्रधानन्यायाधीश अवहेलनाको मुद्दामा फेरि सर्वोच्च उपस्थित हुने भएका छन्। उनीहरूले केही समयअघि जारी गरेको एक विज्ञप्तिलाई आधार मान्दै अवहेलना निवेदन दायर भएकोमा त्यसमा आफैं उपस्थित हुन बिहीबार सर्वाेच्चले आदेश जारी गरेपछि उनीहरू सात दिनभित्र अदालत उपस्थित हुनुपर्ने भएको छ।
न्यायाधीश मनोज शर्माको इजलासले चार पूर्वप्रधानन्यायाधीशहरूलाई लिखित जवाफसहित आफैं उपस्थित हुन भनेको हो। पूर्वप्रधानन्यायाधीशहरू अनुपराज शर्मा, मीनबहादुर रायमाझी, कल्याण श्रेष्ठ र सुशीला कार्की विरुद्ध दुई थान निवेदन सर्वोच्चमा दर्ता भएको थियो।
लोचन भट्टराई र धनजित बस्नेतले उनीहरू विरुद्ध अवहेलना निवेदन दर्ता गराएका थिए। अदालतको आदेशपछि उनीहरूले नेपाल लाइभसँग कुराकानी गर्दै आफूहरूले अदालतको आदेश सम्मान गर्दै उपस्थित हुने बताएका हुन्।
‘अदालतको प्रक्रियामा अदालतलाई सम्मान गर्छौं। जवाफ दिने र दृष्टिकोण राख्ने मौका दिएको छ। यही प्रक्रिया हो अवहेलनाको। हामी यसलाई सम्मान गरेर जान्छौं र आफ्ना कुरा राख्छौं’, पूर्वप्रधानन्यायाधीश अनुपराज शर्माले भने।
यस्तै, अर्का पूर्वप्रधानन्यायाधीश कल्याण श्रेष्ठले पनि अदालतको सम्मान गर्दै उपस्थित हुने बताए। ‘अदालतको आदेश सम्मान गर्दै हामी जवाफ दिन जान्छौं। अदालतको आदेश सम्मान गर्नुपर्छ। अवहेलना मुद्दा दर्ता भएपछि यही प्रक्रिया हो’, उनले भने।
पुस २४ गते सर्वोच्च अदालतका चार पूर्वप्रधानन्यायाधीशले प्रतिनिधि सभा विघटनलाई असंवैधानिक भन्दै विज्ञप्ति सार्वजनिक गरेका थिए। संयुक्त विज्ञप्ति सार्वजनिक गर्दै संविधानको धारा ७६ प्रतिनिधि सभा विघटनमा आकर्षित नहुने दाबी उनीहरूले गरेका थिए।
‘नेपालको संविधान २०७२ को धारा ७६ मा मन्त्रिपरिषद् गठन गर्ने सिलसिलामा वा सो प्रयोजनका लागि बाहेकको कुनै अवस्थामा पनि प्रतिनिधि सभा विघटन गर्ने अधिकार एवम् व्यवस्था नगरिएको अवस्थामा पनि आकर्षित नहुने धारा ग्रहण गरी प्रतिनिधि सभा विघटन गरिएको पाइन्छ’, संयुक्त विज्ञप्तिमा भनिएको थियो।
त्यसैगरी, अधिवक्ता राजाराम घिमिरेले पूर्वसभामुख दमननाथ ढुंगानाविरुद्ध अवहेलना मुद्दा दायर गरेका छन्। अदालतको अवहेलनामा दोषी ठहर भएमा एक वर्ष कैद सजाय वा १० हजार रूपैयाँ जरिवाना वा दुवै सजाय हुने कानूनी व्यवस्था छ।
यस्तो थियो चार पूर्वप्रधानन्यायाधीशले जारी गरेको विज्ञप्ति:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1765273665.jpg)
