काठमाडौं- राष्ट्रिय जनगणना, २०७८ का लागि गणक तथा सुपरीवेक्षक पदमा दरखास्त आह्वान भएको छ। केन्द्रीय तथ्याङ्क विभागले राष्ट्रिय जनगणना, २०७८ को लागि करारमा गणक तथा सुपरीवेक्षक पदमा अनलाइनमार्फत दरखास्त आह्वान गरेको हो।
विभागले आइतबार पत्रकार सम्मेलन आयोजना गरी करारमा गणक तथा सुपरिवेक्षक भर्ना आवेदन आह्वान गरिएको बताएको हो। विभागले करिब ३९ हजार गणक र ८ हजार सुपरीवेक्षक करारमा भर्ना लिन लागेको जानकारी समेत गराएको छ।
करारका जनशक्ति अपुग भएमा स्थानीय सार्वजनिक विद्यालयका शिक्षक र सरकारी कर्मचारीको प्रयोग गरी जनगणना गरिने विभागको भनाइ छ।
२०७७ माघ ११ गतेदेखि ६० दिनभित्र अनलाइन दरखास्त भर्न सकिने केन्द्रीय तथ्याङ्क विभागका महानिर्देशक नेविनलाल श्रेष्ठले बताए।
जनगणना विभिन्न प्रविधि अपनाई गरिने उनको भनाइ छ। मानिसको जनगणनाका साथै व्यवसायिक प्रयोजनका लागि पालिएका पशुपन्छीको समेत जनगणना गरिने उनले जानकारी दिए।
केन्द्रीय तथ्यांक विभागको वेबसाइटको सवडोमेन तथा केन्द्रीय तथ्याङ्क विभागको वेबसाइटमा गएर अनलाइन दरखास्त आह्वान गरिनेछ। राष्ट्रिय योजना आयोगका सचिव केवल प्रसाद भण्डारीले गणक तथा सुपरीवेक्षक स्थानीय तहकै जनशक्तिबाट गर्ने तथा स्थानीय तहमै तालिमको व्यवस्था गरिने उनले बताए। अघिल्लो जनगणनामा भन्दा यसपटक ८ वटा बढी आधारभूत प्रश्नहरु राखिएको उनको भनाइ छ।
राष्ट्रिय जनगणना २०७८, नेपालको बाह्रौँ जनगणना हो। नेपालमा वि.सं. १९६८ सालदेखि जनगणना प्रारम्भ भएको थियो। बाह्रौँ जनगणना २०७८ जेठदेखि असारसम्म सञ्चालन हुने पनि विभागले बताएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
