काठमाडौं- कमलपोखरीको ऐतिहासिकता र वर्यावरण नबिगार्न सुझाव दिइरहेका साथै कमलपोखरी पुनर्निर्माणको काम तत्काल स्थगन गर्न माग गरिरहेका सरोकारवालासँग काठमाडौं क्षेत्र ४ का सांसद गगन थापाले छलफल गरेका छन्।
कमलपोखरी निर्माण गर्दा ऐतिहासिक र पर्यावरणीय पक्षलाई ध्यान दिन पुरातत्त्व विभाग र काठमाडौं महानगरपालिकाको ध्यानाकर्षण गराइएको छ। जसमा पुरातत्वले काम रोक्नसमेत भनिसकेको छ। तर महानगरको संरक्षणमा ठेकेदार कम्पनीले रातको समयमा कमलपोखरीको माटो ओसार्दा विषय थप गम्भीर बनेको छ।
यसै सन्दर्भमा कमलपोखरी निर्माणका क्रममा भएको कमजोरीका विषयमा काठमाडौं क्षेत्र ४ का सांसद थापाले सरोकारवाला पक्षसँग छलफल गरेका हुन्। पोखरीको ऐतिहासिक र पर्यावरणीय पक्षलाई नबिगारी सौन्दर्यीकरणको कामलाई अघि बढाउने गरि छलफल अघि बढेको थापाले जानकारी गराए।
स्थानीय सरोकारवाला र संरक्षण अभियन्ताले महानगरपालिकालाई ध्यानाकर्षण गराइसकेको उल्लेख गर्दै थापाले भने,‘महानगरपालिकाले अविलम्ब सबै पक्षसँग एक साथ छलफल गरी पोखरीको ऐतिहासिक र पर्यावरणीय पक्षलाई नबिगारी सौन्दर्यीकरणको कामलाई अघि बढाउने विषयमा समझदारी कायम गराउन पहल गर्ने’ निर्णय भएको छ।
पोखरी निर्माणमा क्रममा भइरहेको कमजोरीका सन्दर्भमा थापाले मंगलबार नै कमलपोखरी संरक्षण एवं जनहित समाज, कमलपोखरी स्पोर्टस क्लब र स्थानीय बासिन्दासँग छलफल गरेका थिए। सरोकारवालाले उठाएका यथार्थ मुद्दा र पुरातत्त्व विभागको चासोलाई सम्बोधन गर्ने गरी महानगरपालिका अघि बढ्नेमा उनले विश्वास व्यक्त गरेका छन्।
पोखरीको ऐतिहासिक, साँस्कृतिक र पर्यावरणीय वातावरणलार्य असर पर्ने गरी निर्माण कार्य भइरहेकाले त्यसलाई रोकेर साविककै मौलिक स्वरुपमा संरक्षण गर्न भन्दै पुरातत्व विभागले महानगरपालिकालाई सोमबार पत्र काटेको थियो। तर प्राचिन स्मारक संरक्षण ऐन २०१३ अनुरुप काम गर्न पुरातत्वले भनेकै रातमा भने महानगरले पोखरीमा महत्वपूर्ण हुने माटो ओसारेको हो।
त्यसलगत्तै सम्पदा अभियन्ता र स्थानीय बासिन्दाले मंगलबार दिउँसो महानगर कार्यालयमा नै धर्ना दिँदै सचेतना पत्र दिएका थिए। उनीहरुले सम्पदाको महत्व बुझेर निर्माण कार्यमा लाग्न बारम्बार आग्रह गरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
