काठमाडौं- पटना-मोतीहारी-अमलेखगंज अन्तरदेशीय पेट्रोलियम पाइपलाइनमा चोरीको प्रयास भएको छ। रक्सौल नाकाबाट १ सय किलोमिटर पर भारतीय क्षेत्र सिबानको डुमराह गाउँ नजिक पेट्रोलियम पाइपमा प्वाल पारेर चोरीको प्रयास भएको र इन्डियन आयल कर्पोरेसन लिमिटेड (आइओसिएल)ले यसबारेमा तत्काल जानकारी पाएपछि चोरीमा संलग्न व्यक्तिहरु पक्राउ परिसकेको समेत भारतीय संचार माध्यामहरुले उल्लेख गरेका छन्।
नेपाल-भारत पेट्रोलियम पाइपलाइनमा चोरी प्रयास भएको विषयमा नेपाल आयल निगमले प्रारम्भिक प्रतिक्रिया दिँदै ‘नेपाल आउने पेट्रोलियम पदार्थको परिमाणमा कुनै असर नदेखिएको र पाइपलाइनमा जिपिएस प्रणाली जडान भएका कारण चोरीको प्रयास हुने बित्तिकै संलग्नलाई भारतीय पक्षले पक्राउ गरिसकेको बताएको छ।
‘मोतीहारीमा भएको भारतीय आयल कर्पोरेसनको कार्यालयमा सम्पर्क गर्दा चोरीको प्रयास मात्रै भएको भनेको छ। नेपाल आउने डिजेलमा कुनै तलमाथि भएको छैन। उतातिर पनि कुनै क्षति भएको छैन,’ नेपाल आयल निगमका प्रवक्ता विनितमणि उपाध्यायले नेपाल लाइभसँग भने।
उपाध्यायका अनुसार पाइपलाइनबाट पेट्रोलियम पदार्थ चोरी गर्न प्राविधिक रुपमा सम्भव हुँदैन। ‘पेट्रोलियम पाइपसँगै अप्टिकल फाइबर पनि राखिएको हुन्छ। कहीँ कतै त्यस्तो प्रयास भइहालेमा पनि भारतीय आयल निगमले तत्काल जानकारी पाउँछ,’ उनले भने, ‘कसैले बदमासी गर्न थाल्यो भने तत्काल जानकारी हुने भएकाले पनि चोरीको सम्भावना रहँदैन।’
यद्यपि भारतीय संचार माध्यामहरूले भने खेतमा डिजेल बग्न थालेपछि मात्रै रहस्य बाहिरिएको उल्लेख गरेका छन्।
निगमका अनुसार अहिले पाइपलाइनबाट २ लाख ५० हजार लिटर डिजल प्रतिघण्टा आयात भइरहेको छ। पेट्रोलियम पदार्थको सहज आपूर्ति, ढुवानी तथा वितरणका लागि गतवर्षबाट भारतको मोतिहारीदेखि नेपालको अमलेखगन्ज डिपोसम्म पेट्रोलियम पाइपलाइन सञ्चालनमा आएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1664177809.jpg)
-1764146706.png)
