काठमाडौं- बुढानीलकण्ठ नगरपालिकाअन्तर्गतको समस्याग्रस्त सहकारी व्यवस्थापन समितिले तीन महिनाअघि समस्याग्रस्त घोषणा गरेको नयाँ सन्देश बचत तथा ऋण सहकारी संस्थाका ऋणी खोज्न नसकेको जनाएको छ।
यो सहकारीबाट ऋण लिएका व्यक्तिहरुको विवरण खोज्न नसकेपछि संस्थाको सम्पत्ती र वास्तविक दायित्व भुक्तानी सम्बन्धी तथ्यांक संकलनमा समस्या देखिएको छ।
बुढानीलकण्ठ नगरपालिका वडा नम्बर ५ मा सञ्चालित नयाँ सन्देश सहकारीले २ हजारभन्दा बढी सदस्यको करिब २५ करोड रुपैयाँभन्दा बढी रकम हिनामिना गरेको पाइएपछि गत असोजमा समस्याग्रस्त घोषणा गरिएको थियो। समस्याग्रस्त सहकारी व्यवस्था समितिका सदस्य छन्दप्रसाद आचार्यले ऋणी र बचतकर्ताको विवरण संकलनको काम अझै चलिरहेको र संबै तथ्यांक नभेटिसकेको बताए।
‘हामी ऋणीका फाइल खोज्दै छौं। सबै विवरण भेटाउन सकिएको छैन। निक्षेपकर्ताका निवदेन पनि संकलन भइरहेका छन,’ आचार्यले नेपाल लाइभसँग भने।
समस्याग्रस्त सहकारी व्यवस्थापन समितिले गत असोज २८ गते एक सूचना जारी गर्दै उक्त सहकारीका ऋणीलाई २१ दिनभित्र साँवाब्याजसहितको रकम भुक्तानी गरिसक्न र बचतकर्तालाई आफ्नो बचत दायित्व रकम १ महिनाभित्र दाबी गरिसक्न भनेको थियो।
तर सबै ऋणी र निक्षेपकर्ता समितिको सम्पर्कमा नआएपछि दायित्व एकिन गर्ने काम हालसम्म लम्बिएको हो। संचालकले बचतकर्ताको रकम हिनामिना गरेपछि यो सहकारीमा करिब तीन वर्ष अगाडि नै समस्या देखिएको थियो।
सहकारीका चारजना संचालक अहिले हिरासतमा छन्। अध्यक्ष सानुसिंह ठकुरीलगायत संचालकहरु फरार हुन थालेपछि २०७५ पुष १५ गते बुढानिलकण्ठ प्रहरी इकाईमा स्थानीय जनप्रतिनिधि र सहकारीका सञ्चालकहरूबीच उक्त सहकारीको दायित्व यकिन गर्ने, लगानी तथा सम्पत्ती कहाँ कति छ भनेर खोज्ने र फेला परेको सम्पत्तीलाई बचतकर्ताको बचत रकम हेरी दामासाही रुपमा बाँढ्ने सहमति भएको थियो।
तर त्यो सहमति कार्यान्वयन भने भएन। प्रहरी प्रशासन र जनप्रतिनिधिको रोहबरमा त्यस्तो सम्झौता गर्नेमा अध्यक्ष सानुसिंह ठकुरी, उपाध्यक्ष अबिन परियार र सचिव राजकुमार ठकुरी थिए। यो सहकारीको दायित्व अहिले २५ करोड रुपैयाँ भन्दा बढी पुगिसकेको प्रारम्भिक आंकलन गरिएको छ।
सहकारी आफ्नो दायित्व ९ करोड रुपैयाँ बराबर हुँदा लेखापरीक्षण गराएको थियो। त्यसपछिको वार्षिक लेखा परीक्षणसमेत भएको छैन।
यो पनि पढ्नुहोस् :
नयाँ सन्देश सहकारीको २५ करोड हिनामिना, सञ्चालक समितिका अध्यक्ष प्रहरी हिरासतमा
नयाँ सन्देश सहकारी समस्याग्रस्त घोषणा, २ हजार सदस्यको २५ करोडभन्दा बढी हिनामिना
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
