काठमाडौं- केही समयअघि चर्चित गायक रामकृष्ण ढकालले एउटा सहकारीबाट आफू ठगिएको भन्दै पत्रकार सम्मेलन गरे। ललितपुरस्थित लालिगुँरास बचत तथा ऋण सहकारी संस्थाबाट आफू पीडित भएको ढकालको भनाइ थियो।
अहिले फेरि अर्को यस्तै घटना बाहिर आएको छ। चर्चित लोकगायिका बिमा कुमारी दुरा सहकारीबाटै ठगिएको खुलेको हो। बुढानिलकण्ठस्थित नयाँ सन्देश बचत तथा ऋण सहकारीबाट आफू ठगिएको भन्दै गायिका दुरा विभिन्न निकाय गुहारिरहेकी छिन्। गायिका दुराले आफ्नो साँवा मात्रै २० लाख फसेको र ब्याज कति पुग्यो भन्ने हिसाब नै नगरेको बताइन्।
नयाँ सन्देश सहकारीले २ हजारभन्दा बढी बचतकर्ताको करिब २५ करोड रुपैयाँ हिनामिना गरेको पाइएको छ। तीनै पीडित बचतकर्तामध्येमा गायिका दुरा पनि छिन्।
बचतकर्ताको रकम हिनामिना गरी फरार रहेका उक्त सहकारीका सञ्चालक समिति अध्यक्ष सानुसिंह ठकुरीलाई महानगरीय प्रहरी प्रभाग बुढानिलकण्ठले करिब एक महिनाअघि हिरासतमा लिइसकेको छ भने अन्य सञ्चालकहरू फरार छन्।
सदस्यको हितका लागि खोलिएको सहकारी संस्थाले कसरी सदस्यबाटै करोडौं रकम ठग्यो भन्ने विषयमा दुरासँग नेपाल लाइभले गरेको कुराकानीको सम्पादित अंशः
म त्यो सहकारीमा सदस्य भएको त्यस्तै ३/४ वर्ष भयो। सहकारीले हाम्रो पैसा हिनामिना गरेर ठगी गरिरहेको छ भनेर थाह पाएकै २ वर्षभन्दा बढी समय भइसक्यो।
पछिल्लो दुई वर्षमा सञ्चालकहरू एउटा लुक्ने अर्को बाहिर देखापर्ने क्रम चलिरहेको छ। हामीले थुप्रै निकायमा पहल पनि गर्यौं, तर कहीँबाट पनि पार लागेन।
प्रहरीले पनि केही समय थुनेर छाड्छ। हाम्रो उजुरीलाई नै उपेक्षा गरेर खासै चासो नदिएजस्तो भइरहेको छ। सहकारी विभागमा पनि गएर उजुरी हाल्यौं। पीडित बचतकर्ता नै गएर उजुरी हालेका थियौं। त्यो सहकारीबाट २ हजारभन्दा बढी पीडित छौं। तर, हाम्रो कुरा कसैले पनि सुन्दैनन्। मेरो मात्रै २० लाख जति रकम फसेको छ।
म चिनजानको आफन्तबाटै ठगिएँ भन्ने लागेको छ। मलाई त्यो सहकारी कहाँ छ, के छ भन्ने नै थाहा थिएन। त्यो सहकारीमा काम गर्ने एक जना नजिकको बहिनी थिइन्। उनैले भनेर मैले एक सय दिने मुद्दति खातामा पैसा राखेकी थिएँ।
मेरो साँवा मात्रै २० लाख जति रकम छ, ब्याजको त हिसाब नै छैन। सय दिने मुद्दति खाताको समय सकिएपछि हामीले 'साँवा-ब्याज खोई?' भन्दा यतै छ भने। हामीलाई पैसा फिर्ता दिइएन। कागज गर्न लगाए।
त्यही सहकारीबाट पीडित भएकाहरूका पनि दुईथरी समूह छन्। एउटा समूहले एउटा तरिकाले र अर्को समूहले अर्कै तरिकाले पैसा फिर्ता लिन खोजिरहेका छन्।
त्यहाँभित्र धेरै रहस्य छ जस्तो लाग्छ मलाई। खोतल्दै जाँदा धेरै कुरा थाहा हुँदै जान्छन् होला। उनीहरूको भनाइका हिसाबले एकदमै आशा लाग्छ। तर, २ वर्ष भइसक्यो, अवस्था उस्तै छ।
हामीले पैसा फिर्ता पाएका छैनौं। पहिला ५ नम्बर वडाले यसको जिम्मा लिन्छु भन्यो, तर बिचैमा काम छाड्यो। कुनै सरकारी निकायले चासो देखाएनन्। अब त आश नै मर्यो। (तस्बिर- गायिका दुराको फेसबुकबाट)
र यो पनिः
नयाँ सन्देश सहकारीको २५ करोड हिनामिना, सञ्चालक समितिका अध्यक्ष प्रहरी हिरासतमा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786781074.jpg)
-1786602170.png)
-1786513116.png)
