काठमाडौं- बुढानिलकण्ठस्थित नयाँ सन्देश बचत तथा ऋण सहकारी संस्थाले बचतकर्ताको २५ करोड रुपैयाँ हिनामिना गरेको पाइएको छ। २ हजार भन्दा बढीको संख्यामा सदस्यहरूको रकम हिनामिना गरिएको हो।
बचतकर्ताको रकम हिनामिना गरी फरार रहेका उक्त सहकारीका सञ्चालक समिति अध्यक्ष सानुसिंह ठकुरीलाई महानगरीय प्रहरी प्रभाग बुढानिलकण्ठले करिब एक महिनाअघि हिरासतमा लिइसकेको छ भने अन्य सञ्चालकहरू फरार छन्।
सहकारीको रकम हिनामिना गरी फरार रहेका ठकुरीलाई विभागले पक्राउपछि थप अनुसन्धानका लागि महानगरीय प्रहरी वृत महाराजगञ्ज पठाइएको थियो।
महानगरीय प्रहरी वृत महाराजगञ्जका डिएसपी उमेश लम्सालले सानुसिं ठकुरी र नयाँ सन्देश सहकारीले गरेको रकम हिनामिनाका सम्बन्धमा आवश्यक अनुसन्धान गरी मिसिल सरकारी वकिलको कार्यालयलाई बुझाइसकेको बताए।
‘६०-७० जनाको किटानी जाहेरी आएको थियो। अनुसन्धानपछि हामीले फाइल सरकारी वकिलको कार्यालयलाई पठाएका छौं,’ उनले भने।
बुढानिलकण्ठ प्रहरी इकाईमा गत पुष १५ गते स्थानीय जनप्रतिनिधि र सहकारीका सञ्चाचालकहरूबीच छलफल भएको थियो। बुढानिलकण्ठ नगरपालिका- ५ का वडा अध्यक्ष विजय तामाङले पुषमा भएको छलफलका क्रममा उक्त सहकारीको दायित्व एकिन गर्ने, लगानी तथा सम्पत्ति कहाँ कति छ भनेर खोज्ने र फेला परेको सम्पत्तिलाई बचतकर्ताको बचत रकम हेरी दामासायी रुपमा बाँढ्ने निर्णय भएको बताए।
'सञ्चालक समितिमा बसेकाहरू सबै एकै ठाउँमा कहिल्यै भेटिँदैनन्। सबै लुकेर हिँड्ने गरेका छन्। त्यो बेला पनि सञ्चालक समितिका तीन जना अबिन परियार, राजकुमार ठकुरी र सानुसिं ठकुरीलाई मात्रै प्रहरी प्रशासनले खोजेर छलफलमा बोलाउन सम्भव भएको थियो,’ वडाध्यक्ष तामाङले भने। राजकुमार ठकुरी उक्त सहकारीको उपाध्यक्ष र अविन परियार सचिव हुन्।
बुढानिलकण्ठ महानगरपालिकाका मेयर उद्धब प्रसाद खरेलले सहकारीबाट ठगिएका पीडितहरू लामो समयसम्म विभिन्न निकायमा भौतारिँदा पनि समस्या समाधान नभएपछि आफैं खटिन थालेको बताए।
पीडितहरूले दिएको उजुरीका बारेमा बुझ्न मेयर खरेल बिहीबार आफैं सहकारी विभागमा पुगेका थिए। ‘भएजति सबै निकायमा पीडितहरूले उजुरी गरिसके होलान् तर कुनै पनि निकायले यसलाई गम्भीरताका साथ लिएनन्। पीडितहरु हामीलाई औंला उठाउँछन। प्रश्न गर्छन्, पैसा कहिले फिर्ता पाईन्छ भनेर। हामीले के जवाफ दिने?' उनले भने।
‘उक्त सहकारीको दायित्व अहिले २५ करोड रुपैयाँ पुगिसकेको छ। उसले ९ करोड दायित्व हुँदा लेखा परीक्षण गराएको थियो। त्यसपछिको वार्षिक लेखा परीक्षण नै गराएको छैन,’ मेयर खरेलले भने।
मन्त्रालयदेखि, प्रहरी प्रशासन, विभाग, नगरपालिका सबैतिर पीडित धाउँदा पनि समस्या समाधान हुन नसकेको उनको भनाइ छ।
सहकारी विभागका रजिष्ट्रार डा टोकराज पाण्डेले नयाँ सन्देश सहकारीबाट सदस्यहरूको रकम हिनामिना भएको विषय सात-आठ महिना अघि जानकारीमा आएको भएपनि आफूलाई उक्त विषयमा थप जानकारी नरहेको बताए।
पछिल्लो व्यवस्थाअनुसार उक्त सहकारी संस्था प्रदेश सरकारको कार्यक्षेत्रभित्र पर्ने भएका कारण पनि विभागले यस विषयलाई गम्भीरताका साथ नलिएको देखिन्छ।
प्रदेश सरकार र स्थानिय निकायको कार्यक्षेत्रमा रहेका सरकारी संस्थाका विषयमा विभागसँगै विस्तृत जानकारी हुँदैन।
धेरै रकम ठग्न आकर्षक योजना
सहकारी सञ्चालकहरूले धेरै रकम ठग्न आकर्षक योजना बनाएको देखिन्छ। थोरै समयमा धेरै ब्याजदर बचतकर्तालाई दिने योजना बनाएर धेरै रकम जम्मा संकलन गर्ने र त्यो रकम लिएर सञ्चालक भाग्ने नियतसहित योजनावद्ध रुपमा काम भएको देखिन्छ।
उक्त सहकारीले स्थापनाको १२ वर्षमा प्रवेश गरेको अवसरमा भन्दै समृद्धि बचत योजना ल्याएको थियो। २०७४ माघ १ गतेदेखी सञ्चालनमा ल्याइएको उक्त योजनामा खाता खोल्दा न्यूनतम १ लाख रुपैयाँ सुरुमै राख्नुपर्ने नियम सहकारीले बनाएको देखिन्छ।
वार्षिक २२ प्रतिशत ब्याज मासिक रुपले भुक्तानी गर्ने भन्दै ल्याइएको उक्त योजनामा सहकारीले खाताको अवधि ६ महिना राखेको थियो।
त्यस्तै दैनिक बचत ग्राहकलाई ८ दशमलव ५ प्रतिशत ब्याज दिने भनिएको थियो भने सय दिने मुद्धती निक्षेपमा आकर्षक ब्याज दिने भन्दै उक्त सहकारीले अर्को योजना पनि ल्याएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
