नयाँदिल्ली–भारतीय प्रधानमन्त्री नरेन्द्र मोदीले भारतका गतिशीलता र नविनताका क्षेत्रहरुमा लगानी गर्ने उत्साहपूर्ण अवसर रहेको दाबी गर्दै वैश्विक लगानीका लागि आव्हान गरेका छन्। ब्लूमबर्ग न्यू इकोनोमिक फोरमलाई सम्बोधन गर्दै उनले यस्तो बताएका हुन्।
'यदि तपाईं सहरीकरणमा लगानी गर्न खोज्दै हुनुहुन्छ भने भारतमा तपाईंका लागि रोमाञ्चक अवसरहरू छन्, यदि गतिशीलतामा लगानी गर्ने सोचमा हुनुहुन्छ भने भारतमा उत्साहपूर्ण अवसरहरू छन्। नविनतामा लगानी गर्न चाहनुहुन्छ भने भारतसँग तपाईंका लागि नविनतम बृहत क्षेत्रहरु छन्,’ उनले भने।
भारतमा व्यापारमैत्री वातावरण भएको र यसले ठूलो बजार प्रदान गर्ने उल्लेख गर्दै उनले भने, ‘सरकारले भारतलाई वैश्विक लगानीको गन्तव्य बनाउन कुनै कसर छोड्ने छैन।’
कोरोना भाइरस महामारीले खडा गरेको ठूलो चुनौती हुँदाहुँदै पनि भारतले यस कठिन समयमा एक ‘असाधारण उदाहरण’ प्रस्तुत गरेको मोदीले बताएका छन्।
उनले विश्वयुद्धपछिको युगलाई कोरोना महामारीले ठूलो पाठ सिकाएको बताएका छन्। ‘मलाई लाग्छ दोस्रो विश्वयुद्धपछि भएका ऐतिहासिक पुनर्निर्माण प्रयासहरूले हामीलाई धेरै पाठ सिकाउन सक्छ। विश्वयुद्धपछि, सम्पूर्ण विश्वले नयाँ विश्व क्रममा काम गर्यो। नयाँ प्रोटोकल विकसित भयो र विश्व पनि परिवर्तन भयो । कोभिड–१९ ले पनि हामीलाई त्यस्तै मौका दियो । प्रत्येक क्षेत्रमा नयाँ प्रोटोकलहरू विकास गर्ने अवसरहरु रहेका छन्,’ उनले भने।
‘यदि हामी भविष्यका लागि लचिलो प्रणाली विकास गर्न चाहन्छौं भने यो अवसरलाई संसारले छोड्नु हुँदैन,’ उनले थपे। भारतीय प्रधानमन्त्री मोदीले महामारीको क्रममा प्रविधिले पनि काममा निरन्तरता कायम गर्न मद्दत गरेको बताए।
‘भिडियो कन्फरेन्सिङजस्ता असाधारण उपकरणका लागि धन्यवाद, म अधिक धेरै बैठकहरू अनलाइनबाटै उपस्थित भइरहेको छु । यसले मलाई दूरी तय गर्न र तपाईंहरूसँग कुराकानी गर्न पनि मद्दत गरेको छ। तर यसले कोभिडपछिको विश्वका लागि पनि चाखलाग्दो प्रश्न खडा गर्दछ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
