विद्युत प्राधिकरणमा माधव कोइरालालाई सधैं लाभको पद

अर्थ समाचार

नेपाल लाइभ आइतबार, मंसिर २१, २०७७ १२:३८

काठमाडौं-नेपाल विद्युत प्राधिकरणले उपकार्यकारी निर्देशक माधव कोइरालालाई सधैं लाभको पद दिएको छ। सातौँ तहदेखि प्राधिकरणअन्तर्गतको कम्पनीमा जागिर खान थालेका कोइरालालाई फेरि नयाँ पद दिइएको हो।

प्राधिकरण सञ्चालक समितिको केही दिनअघिको बैठकले उनलाई एनइए इन्जिनियरिङ कम्पनीमा पठाउने निर्णय गरेको थियो। कम्पनीको सञ्चालक समितिले उनलाई प्रबन्ध सञ्चालक (कार्यकारी पद) बनाएको छ। कम्पनीका तत्कालीन प्रबन्ध सञ्चालक हितेन्द्रदेव शाक्यले आफू प्राधिकरणको कायममुकायम कार्यकारी निर्देशक भएपछि कोइरालालाई त्यहाँ पठाएका हुन्।

प्राधिकरणको उपकार्यकारी निर्देशक (१२ औँ तह)मा बढुवा भएपछि कोइराला चिलिमेबाट प्राधिकरण आएका थिए। चिलिमेमा बस्दा मासिक २ लाख २६ हजार रूपैयाँभन्दा धेरै तलब खाने गरेका कोइराला प्राधिकरणमा 'जम्मा ५५ हजार तलबको जागिर के खानु' भन्दै हिँड्ने गरेका उनका सहकर्मीहरू बताउँछन्।

'प्राधिकरण सञ्चालक समितिमा पनि उहाँलाई कति लाभको पद दिने भनेर आलोचना भएको थियो, तर ऊर्जामन्त्रीलाई समेत आफ्नो पक्षमा पारेर माधवजी इन्जिनियरिङ कम्पनीमा जानुभयो,' प्राधिकरण स्रोतले भन्यो।

सिन्धुपाल्चोकका कोइराला सिभिल इन्जिनियर हुन्। सात तहको अधिकृत भएपछि उनी प्राधिकरणमा नबसी शक्तिको आडमा कम्पनीमा जागिर खान जान थालेका हुन्।

आकर्षक सुविधाका कारण प्राधिकरणका कर्मचारीहरू कम्पनीमा जान जोडबल गर्छन्। प्राधिकरणका अवकाशप्राप्त कर्मचारीसमेत कम्पनीको जागिरका लागि धाउने गरेका छन्।

चिलिमे, रसुवागढीजस्ता कम्पनीका प्रमुख कार्यकारी अधिकृत भएका उनी विभिन्न कम्पनीको सञ्चालक समितिको सदस्य पनि भएका थिए। 'अहिले पनि माथिल्लो तामाकोशी, तनहुँ जलविद्युत कम्पनी जस्ता ठाउँमा सञ्चालक समिति सदस्य हुन पाइन्छ,' स्रोतले भन्यो, 'एनइए इन्जिनियरिङ कम्पनीमा ३ लाख रूपैयाँभन्दा धेरै तलब सुविधा हुन्छ, यो निकै आकर्षक जागिर हो।'

उपकार्यकारी निर्देशक भएपछि प्राधिकरणमा बसेर नीति निर्माणको काममा लाग्नुपर्ने बेलामा कोइराला ऊर्जामन्त्री पुनको फेरो समातेर कम्पनीमा पुगेको स्रोतले जानकारी दियो। प्राधिकरणका कायममुकायम कार्यकारी निर्देशक शाक्य र कोइराला चिलिमेमा पनि सँगै बसेका थिए। जसका कारण शाक्यले आफ्नो उत्तराधिकारीकाे रूपमा एनइए इन्जिनियरिङ कम्पनी पठाएको स्रोतको भनाइ छ।

कोइरालाले आफू २०५० सालपछि नै चिलिमेमा आवद्ध भएर काम गरिरहेको बताए। उनले अहिले पनि एनइए इन्जिनियरिङ कम्पनीमा काम धेरै भएकाले आफूलाई नेतृत्वले त्यहाँ पठाएको दावी गरे। 'आयोजना पहिचानदेखिको काममा म चिलिमे बस्दा पनि संलग्न थिएँ, अहिले पनि काम धेरै गर्नुपर्ने भएकाले यहाँ पठाइएको हो,' उनले भने।

तर कोइरालामाथि अरूले गरेका कामको जस लिने गरेको आरोप लाग्ने गरेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

चिठी आदानप्रदान हुन छाडेपछि गोरखाका २१ अतिरिक्त हुलाक कार्यालय बन्द

भीमफेदी डढेलोमा जलेर एक जनाको मृत्यु

हैदराबादविरुद्ध कोलकाताको बलियो योगफल