सिएनआईले गर्‍याे एफएनसिसिआईका नवनियुक्त पदाधिकारीको स्वागत

अर्थ समाचार

नेपाल लाइभ शुक्रबार, मंसिर १९, २०७७ १२:०७

काठमाडौं–नेपाल उद्योग वाणिज्य महासंघ (एफएनसिसिआई) का नवनिर्वाचित अध्यक्ष तथा पदाधिकारीहरुलाई नेपाल उद्योग परिसंघ (सिएनआई)ले स्वागत गरेको छ। परिसंघको कार्यालय थापाथलीमा आयोजित औपचारिक कार्यक्रममा महासंघका पदाधिकारीहरुलाई परिसंघका पदाधिकारीहरुले बधाई तथा शुभकामना दिएका हुन्।

कार्यक्रममा परिसंघ अध्यक्ष सतिशकुमार मोरले निजी क्षेत्रका दुई सशक्त संस्थाबीच विगतदेखि नै विभिन्न आयामबाट सहकार्य रहँदै आएको स्पष्ट पारे। उनले नयाँ कार्यसमितिसँग महासंघसँगको सहकार्यलाई थप सुदृढ र मजबुत बनाउनु आजको आवश्यकता रहेको बताए।

अध्यक्ष मोरले निजी क्षेत्रले भोग्दै आएका समस्या तथा समग्र आर्थिक नीतिहरुमा देखिने अस्पष्टता हटाउन भएका प्रयासलाई एकताबद्ध रुपमा संयोजन गर्न सकिए दिगो औद्योगिक विकासको माध्यमबाट आर्थिक वृद्धिदर बढाउन योगदान पुग्ने उल्लेख गरे।

महासंघ अध्यक्ष शेखर गोल्छाले राष्ट्रिय अर्थतन्त्रमा निजी क्षेत्रको भूमिका र योगदानको उल्लेख गर्दै निजी क्षेत्रका समस्या उस्तै भए पनि कतिपय अवस्थामा उद्योगको वर्गिकरण र क्षमताका आधारमा फरक पर्ने भएकाले निजी क्षेत्रले एकताबद्ध भई उद्योग व्यवसायको प्रवर्द्धन र विकासमा सहकार्य नै पहिलो प्राथमिकतामा रहेको बताए।

उनले निजी क्षेत्रको सामूहिक भिजन आजको आवश्यकता रहेको र त्यसलाई मूर्तरुप दिन सबै एक भएर अगाडि बढ्नु पर्ने उल्लेख गरे।
आर्थिक पुनर्उत्थान तथा औद्योगिक विकासको साझा एजेण्डामा परिसंघ र महासंघ मिलेर काम गर्ने उनले बताए। निजी क्षेत्रका संस्थाहरु प्रतिस्पर्धीभन्दा साझेदारको रुपमा भएकाले निजी क्षेत्रबाटै समृद्धि सम्भव छ भन्ने महसुस गराउन सहकार्यलाई थप विस्तार र सुदृढ गर्दै जाने गोल्छाको भनाइ थियो।

कार्यक्रममा परिसंघ र महासंघका पदाधिकारीहरुले उच्च आर्थिक वृद्धि, रोजगारी विस्तार, निर्यात बढाउने तथा व्यापार घाटा कम गर्नेलगायत निजी क्षेत्रको विकास तथा सम्मान बढाउने एजेण्डामा आपसी सहकार्य बढाउँदै लैजाने प्रतिबद्धता जनाए।

कार्यक्रममा परिसंघका वरिष्ठ उपाध्यक्ष विष्णुकुमार अग्रवालसहित उपाध्यक्षहरु सुलभ अग्रवाल, कृष्णप्रसाद अधिकारी, राजेश अग्रवाल र वीरेन्द्रराज पाण्डेको उपस्थिति थियो भने महासंघका नवनिर्वाचित वरिष्ठ उपाध्यक्ष चन्द्रप्रसाद ढकाल, उपाध्यक्षहरु दिनेश श्रेष्ठ, अन्जन श्रेष्ठ, रामचन्द्र संघाई र कोषाध्यक्ष सुकुन्तलाल हिराचन सहभागी थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

सम्पूर्ण करार कर्मचारीलाई स्थायी गर्न सरकारसँग प्रभु साहको माग

दार्चुलामा आप्रवासी स्रोत केन्द्र

दुई छोरासहित हमासका वरिष्ठ नेताको मृत्यु