काठमाडौं- प्रधानमन्त्री केपी शर्मा ओलीले अर्थतन्त्रको पुनरुत्थान गर्न सरकारले सबै प्रयत्न जारी राखेको बताएका छन्। बुधबार आयोजित फोन पे डिजिटल इकोनोमी कल्क्लेभलाई भर्चुअल सम्बोधन गर्दै उनले कोरोना महामारीका कारण विश्व अर्थतन्त्र नै संकुचनमा गएको बताए।
‘नेपालको अर्थतन्त्रमा पनि कोरोना महामारीको प्रभाव आकलन गरिएभन्दा बढी हुने संकेतहरु देखिइसकेका छन्। कोरोना महामारी नियन्त्रण र रोकथाम गर्न तथा त्यसका कारण अर्थतन्त्रमा पुगेको क्षति न्यूनीकरण गर्दै अर्थतन्त्रको पुनरुत्थान गर्न मेरो नेतृत्वको सरकारले सबै प्रयत्नहरु जारी राखेको छ। मैले निजी क्षेत्रलाई भनिसकेको छु – सरकारको मन गरिब छैन, गच्छे अनुसारको सहयोग र समन्वय गर्न दृढ छ’, उनले भने।
प्रधानमन्त्री ओलीले अहिले विश्वको ध्यान डिजिटल अर्थतन्त्रको खोज र विकासमा लागेको बताउँदै यस क्षेत्रमा लगानी बढिरहेको तथा नयाँ आविष्कार र नव प्रवर्तन भइरहेको बताए। ‘कोरोनाले हरेक मानिसबीच दूरी बढाइदिएको समयमा डिजिटल कमर्श, डिजिटल पेमेन्टलगायतका पक्षहरु तपाईं हामीलाई जोड्ने माध्यम बनिरहेका छन्’, उनले भने, ‘समग्रमा, मैले डिजिटल क्षेत्र विश्वकै नयाँ र उच्चदरको आर्थिक बृद्धको माध्यम हुनसक्ने सम्भावना देखेको छु।‘
उनले कोरोना महामारी नियन्त्रण गर्न बाध्यात्मकरुपमा लगाइएको बन्दाबन्दीले भौतिक सम्पर्कलाई निषेध गर्दा इ–कमर्श, अनलाइन सपिङ, डिजटिल बैंकिग र इ–लर्निङ लगायत डिजिटल उपचार, व्यवसाय र क्रियाकलापहरु नेपालका सहरी क्षेत्रहरूमा मात्र होइन, धेरै स्थानमा आम जीवनको अंग बनेको बताए। ‘यी कुराहरुले नै नेपाललाई डिजिटल युगमा प्रवेश गर्न आधार दिएका छन् भन्ने मलाई लागेको छ’, उनले भने।
उनले आफू नेतृत्वको सरकारले मन्त्रिपरिष्दको बैठकलाई पेपरलेस बनाएको, सिंहदरबार र बालुवाटारमा एक्सन रुमहरु स्थापना गरी भर्चुअल प्रविधि प्रयोगको शुरुवात र अभ्यास गरेको, आफूले सिंगापुरमा उपचारको क्रममा रहँदा मन्त्रिपरिषदका सदस्यहरुसँग भर्चुअल मिटिङ पनि गरेको सम्झना दिलाए। ‘त्यतिबेला कतिपय मानिसहरुले महत्व, औचित्य र आवश्यकता बुझ्न नसके पनि आज त्यसको सान्दर्भिकता र महत्व व्यवहारतः नै पुष्टि भएको छ’, उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
