एजेन्सी–रुसको तल्लो सदन डूमाले राष्ट्रपति भ्लादिमीर पुटिन र उनका परिवारमाथि अवकाशपछि पनि कुनै पनि आपराधिक अभियोगमा मुद्दा चलाउन नपाइने कानुनी व्यवस्थासहितको विधेयक पारित गरेको छ।
गत जुलाईमा भएको जनमत संग्रहले संविधान संशोधनका लागि सहमति दिएपछि यो विधेयक ल्याइएको हो। पुटिनको दुवै सदनमा बहुमत छ ।
पुटिनको कार्यकाल २०२४ मा सकिँदैछ। तर अहिले भइरहेको संवैधानिक संशोधनले पुटिनलाई फेरि दुई कार्यकाल अर्थात् १२ वर्षसम्म राष्ट्रपति पदमा रहन दिने छ । यो विधेयक आएपछि पुटिनको राजनीतिक भविष्यका बारेमा फेरि एक पटक बहस सुरु भएको छ। सन् २००० मा पुटिन रुसी सत्ताको शीर्षस्थानमा पुगेका थिए। यो अवधिमा उनले भरपुर शक्तिको प्रयोग गरेका छन् । पुटिनका आलोचक एलेक्सी नवेलनीले सामाजिक सञ्जाल ट्वीटरमा कडा टिप्पणी गरेका छन् । उनले पुटिनका लागि अहिले नै यो विधेयकको आवश्यकता किन पर्यो भनि प्रश्न उठाएका छन् । नवेलनीले अर्को एक प्रश्न पनि सोधेका छन्–‘के तानाशाहले मन लागेपछि मात्र पद छाड्ने हो?’
डूमामा यो विधेयक तीन पटक ल्याउनु पर्ने छ। मंगलबार पहिलो पटक यसलाई पारित गरिएको छ। सदनमा पुटिन सर्मथक पार्टी युनाइटेड रसिया पार्टीको बहुमत छ। यो विधेयकको विरुद्धमा ३७ वामपन्थी सांसदले भोट हालेका थिए । यसबाहेक यो विधेयकलाई दोस्रो पटक पढिनेछ । त्यसपछि विधेयक फेडरेसन काउन्सिल अर्थात माथिल्लो सदनमा पेश हुने छ। त्यहाँबाट पारित भएपछि यो विधेयकमा राष्ट्रपति पुटिनले प्रमाणीकरण गर्ने छन् ।
के छ यो विधेयकमा ?
यो नयाँ विधेयकका अनुसार प्रहरीले पूर्वराष्ट्रपति र उनका परिवारलाई कुनै पनि प्रकारको सोधपुछ गर्न र बयान लिन पाउने छैन। उनीहरुलाई प्रहरी अनुसन्धानको दायराबाहिर राख्नुपर्नेछ। त्यस्तै उनीहरुको सम्पत्ति पनि जफत गर्न सकिने छैन।
असाधारण परिस्थितिमा गरिएको कुनै ठूलो अपराध वा कथित राजद्रोह छोडेर आफ्नो जीवनभर पूर्वराष्ट्रपति वा उनको परिवारका सदस्यमाथि कुनै आपराधिक मुद्दा लगाउन सकिने छैन । अहिले जिवित पुर्व राष्ट्रपतिमा दमित्री मेदवेदेवमात्र छन् । उनी अहिले पुटिनको सहयोगीको रुपमा रहेका छन् । विधेयकका मस्यौदाकार मध्येका एक सांसद पावेल क्रिशनिकोभले यो विधेयकको बचाउ गरेका छन्। ‘यो विधेयकको उद्देश्य राष्ट्र र समाजको स्थिरतामा काम गर्ने राष्ट्रपतिको रक्षा गर्नु रहेको उनको भनाइ छ।
यो जुलाईमा संवैधानिक परिर्वतनका लागि नयाँ जनमत संग्रह गरिएको थियो । यसअनुसार पुटिन २०२४ पछिका दुई कार्यकाल पदमा रहन पाउनेछन्। अर्थात् २०३६सम्म पुटिनले रुसको नेतृत्व गर्ने छन् । विपक्षी दल यो जनमत संग्रहको विपक्षमा उभिँदै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791562069.png)
-1786602170.png)
