काठमाडौं- लगानी बोर्डको बैठकले ३ वटा जलविद्युत आयोजनाको ३८ अर्ब ६५ करोड रूपैयाँ विदेशी लगानी स्वीकृत गर्ने निर्णय गरेको छ। बोर्डमा सुशील भट्ट प्रमुख कार्यकारी अधिकृत नियुक्त भएपछि बसेको पहिलो बैठकले १९९.५ मेगावाट क्षमताका ती आयोजनामा विदेशी लगानी स्वीकृत गरेको हो।
लगानी बोर्ड बैठकमा सहभागी एक मन्त्रीका अनुसार बैठकले सार्वजनिक निजी साझेदारीमा सञ्चालन हुने घुन्साखोला जलविद्युत आयोजनाका लागि १७ अर्ब ६२ करोड रूपैयाँ बराबरको लगानी स्वीकृत गरेको छ। यो आयोजनाको क्षमता ७७.५ मेगावाट रहेको छ।
यसैगरी बैठकले ५७ मेगावाट क्षमताको हिमचुली दोर्दी जलविद्युत आयोजनाका लागि १० अर्ब ६१ करोड रूपैयाँ लगानी स्वीकृत गरेको छ। यस्तै ६५ मेगावाट क्षमताको दूधखोला जलविद्युत आयोजनाका लागि १० अर्ब ४३ करोड रूपैयाँ लगानी स्वीकृत गर्ने निर्णय पनि मंगलबारको बैठकले गरेको छ।
लगानी बोर्ड बैठकमा प्रस्तुतीकरण दिँदै सिइओ सुशील भट्ट। तस्बिर - सूर्य थापा
यसैगरी बैठकले अरुण तेस्रो जलविद्युत आयोजनाको बाँधस्थलदेखि पावरहाउससम्मको २८ किलोमिटर सडकको मुआब्जा निर्धारण गर्न गठित समितिको म्याद २ महिना थप गर्ने निर्णय गरेको छ।
बैठकमा सिइओ भट्टले आयोजना बैंक स्थापनाको विस्तृत अवधारणापत्रका विषयमा प्रस्तुतीकरण दिएका थिए। उनले लगानी बोर्डको समन्वयमा विदेशी निजी लगानी भित्र्याएर अघि बढाइने आयोजनाका विषयमा विस्तृत प्रस्तुतीकरण दिएका हुन्।
बैठकमा प्रधानमन्त्री केपी शर्मा ओलीले गुणस्तरीय लगानी भित्र्याउन जोड दिएका थिए। उनले नेपालको आवश्यकता र प्राथमिकताका क्षेत्रमा विदेशी लगानी भित्र्याउने गरी काम गर्न निर्देशन दिएका हुन्।
बैठकले एकल विन्दू सेवा केन्द्रलाई आधुनिक र प्रविधिमैत्रीरूपमा सञ्चालन गर्ने निर्णय पनि गरेको छ। 'धेरै कानुनी र नीतिगत सुधारका विषयमा छलफल भएका छन्,' ती मन्त्रीले भने।
बैठकमा बोर्डको आगामी ५ वर्षे कार्ययोजनाका विषयमा पनि छलफल भएको छ। यो विषयमा निर्णय भने भएको छैन।
साउनमा भट्ट सिइओ नियुक्त भएपछि बोर्डको पहिलो बैठक बसेको हो। बोर्डको उपाध्यक्ष (अर्थमन्त्री) पनि दसैं अघि मात्रै परिवर्तन भएका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766039188.jpg)
-1764146706.png)
