काठमाडौं–भारतका लागि नेपाली राजदूत निलाम्बर आचार्यले देहरादुनमा नेपाली विद्यार्थी कुटपिट गर्ने अध्यापकलाई कारबाहीका लागि आवश्यक कदम चालिएको जनाएका छन्। उनले घटनाको जानकारी भएदेखि दूतावास सक्रिय रहेको र कुटपिट गर्ने अध्यापकलाई कारबाहीका लागि र फर्कन चाहने विद्यार्थीलाई सुरक्षित फर्काउन आवश्यक कदम चालिएको जनाएका हुन्।
राजदूत आचार्यले पीडित विद्यार्थीका केही अभिभावकसँग सम्पर्क भएको र समस्या समाधानउन्मुख भएको पनि जनाएका छन्।
देहरादुनको भगवान्तपुर पुरकोल रोडस्थित शाक्य एकेडमीमा अध्ययनरत ५१ नेपाली विद्यार्थीमाथि कुटपिट भएको थियो। घाइते दुई विद्यार्थी भने भागेर कात्तिक १० मा नेपाल फर्केका छन्।
५ जना विद्यार्थी त्यहाँबाट भागेर गड्डाचौकी पुगेका छन्। तीमध्ये ३ जना दार्जीलिंगका रहेको राष्ट्रिय मानवअधिकार आयोगकी पूर्व सदस्य मोहना अन्सारीले जनाएकी छन्। बाँकी २ जनामध्ये १ जना मकवानपूर तथा १ जना बाग्लुंगको निसी गाउँपालिकाका छन्। कुटपिटको समाचार सार्वजनिक भएपछि गुम्बाबाट अभिभावकलाई धम्काउने कार्य भएको उनले जनाएकी छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।