काठमाडौं–विश्व तहमा प्रतिस्पर्धामा रहेका अमेरिका र चीनका कूटनीतिज्ञहरु नेपालमा यहाँका कला संस्कृतिमा पनि ‘डिप्लोमेसी’ देखाउने गरेका छन्। यस वर्षको दसैंमा पनि नेपालस्थित दुवै देशका राजदूतले दसैं आ–आफ्नै शैलीमा मनाएका छन्। उनीहरुले दसैं मनाएको भिडियो सामाजिक सञ्जालमा हालेका छन्।
नेपालका लागि चिनियाँ राजदूत होउ यान्छीले सदाबहार नेपाली लोकगीत ‘रेशम फिरिरि’ गाएकी छन् ।
उनले विजया दशमीको दिन सोमबार बिहान रेशम फिरिरि गीत गाएको भिडियो सामाजिक सञ्जालमा पोस्ट गरेकी छन् । उनले विगतमा पनि नेपाली गीतमा नृत्य गर्ने तथा विभिन्न सांस्कृतिक क्षेत्रको अवलोकन गरेका तस्बिर पोस्ट गर्ने गरेकी थिइन् ।
नेपालका लागि अमेरिकी राजदूत र्याण्डी डब्लु बेरी पनि कम छैनन् । उनी पनि नेपाली चाड खुलेर मनाउने गर्दछन्।
उनले सोमबार बिहानै दसैँको शुभकामना दिएका छन्। यस्तै केही दिनअघि उनले दसैँका बेला विशेष रुपमा खाइने नेपाली परिकार खसीको मासु बनाएको भिडियो सामाजिक सञ्जालमा पोस्ट गरेका थिए । उनले नेपालका विभिन्न क्षेत्र र त्यहाँका परिकार तथा संस्कारहरुमा आफ्नो सहभागिता र लगाव देखाउने गरेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।