आसियानाको चार्टर उडानको टिकट काट्ने यात्रुहरु कोरियन एयरमा स्वदेश फर्कने

पर्यटन-उड्डयन

शिव भुसाल आइतबार, कात्तिक ९, २०७७ १३:०३

सिओल— नोभेम्बर ५ को ईञ्छन—काठमाडौं एकतर्फी चार्टर उडानका लागि आसियाना एयरलाइन्समा टिकट काटेका यात्रुहरुलाई नोभेम्बर ६ को कोरियन एयरमा पठाइने भएको छ। आसियानामार्फत स्वदेश फर्किने यात्रुको संख्या अत्यन्तै कम भएकाले कोरियन एयरमा पठाउने गरी व्यवस्थापन गरिएको आसियानाको जिम्मा लिएका नेपाल टुर्सका प्रबन्धक केपी सिटौलाले जानकारी दिए।

आसियानाका लागि भन्दै टिकट काटिएको भए पनि कोरियन एयरमा जान पाउनेगरी व्यवस्था मिलाइएको जानकारी आफूले पाएको पर्वतका आनन्द शर्माले बताए।

आसियाना एयरको काठमाडौं उडान अनुमति रद्द गरिएको बताइए पनि नेपाल टुर्स र लिंक एसिया टुर्सले आसियानाको उडान मिति तोकेरै टिकट कटाइरहेका छन्। आसियानाको दोस्रो चार्टर उडानमा फर्केका यात्रुको स्वास्थ्य मापदण्ड नपुगेको भन्दै सिसिएमसी विमानस्थल डेस्कले ५ घण्टा रोकेको थियो।

उक्त विमानले यात्रुको स्वास्थ्य मापदण्ड पूरा नगरेकोले पछि हुने उडान अनुमति रद्द गरिएको नागरिक उड्ययन प्राधिकरणका महानिर्देशक राजन पोख्रेलले नेपाल लाइभलाई बताएका थिए। आसियानाले अनुमतिका लागि निवेदन नै नदिएको अवस्थामा उडान अनुमति रद्द गरिएको भन्दै आएका समाचारमा सत्यता नभएको चार्टरको व्यवस्थापन गरेका सिटौलाको दाबी छ।

आसियाना एयरले काठमाण्डौंका लागि उडान अनुमति नपाएको भनी यसअघि आएका समाचार मनगढन्ते भएको सिटौलाको आरोप छ। उनी थप्छन, ‘मैले नेपाल सरकारका सम्पूर्ण निकायमा सोधेको छु, आसियानालाई कारबाही गरिएको भन्ने कहीँ कतै छैन। न हामीलाई औपचारिक पत्र आएको छ।’

विमानस्थलले भन्दै नभनेको कुरालाई मिडियाले स्वार्थ राखेर आसियानाको उडान अनुमति रद्द भएको भन्दै गलत सूचना दिएको सिटौलाको आरोप छ। 'हामीले २ ओटा उडानका लागि अनुमति लिएका थियौँ। त्यो उडान सम्पन्न गरिसक्यौँ। त्यो बाहेक अनुमतिका लागि निवेदन नै दिएका छैनौँ', सिटौलाले भने।

अनुमतिका लागि निवेदन नै नदिए पनि नोभेम्बर ५ र २६ का लागि आसियानामार्फत सिधा उडान भन्दै दुई ट्राभल एजेन्सीहरुले टिकट कटाउँदै आएका थिए। अहिले आफूहरुकोमा आसियानाका लागि नोभेम्बर ५ र २६ का लागि आएका यात्रुलाई सिंगापुर एयर तथा कोरियन एयरमा व्यवस्थापन गरिएको र अबको अर्को उडान डिसेम्बर ४ का लागि तोकिएको उनले बताए।

अब नेपाल टुर्स र लिंक एसियाले डिसेम्बर ४ का लागि आसियानाको ईञ्छन—काठमाडौं सिधा उडान भन्दै टिकट खुलाएका छन्। डिसेम्बर ४ मा आसियानाले नै ईञ्छन—काठमाडौं सिधा उडान गर्ने सिटौलाको दाबी छ। पछिल्लो समयमा आएर यात्रु संख्या अपुग भएकाले आसियानाका लागि लिइएको टिकट शुल्कमै कोरियन एयरमा पठाउने व्यवस्था मिलाइएको उनले बताए।

एउटै समयमा कोरियन र आसियानाले उडान गर्नुपर्दा दुवै विमानले पर्याप्त यात्रु नपाएकाले नोभेम्बरका लागि आसियानाले काटेका टिकट कोरियन एयरलाई दिइएको र डिसेम्बर ४ का लागि कोरियन एयरले आसियानाका लागि सहयोग गर्नेगरी सहमति भएको सिटौलाको दाबी छ। तर कोरियन एयरको चार्टर उडानको जिम्मा लिएको केएमई टुर्सका प्रबन्धक विनोद कुँवरले त्यसरी एक अर्कालाई सहयोग गरेर उडान गर्ने सहमति नभएको बताए।

नेपाल टुर्स र लिंक एसियाले आसियानाका लागि काटिएका टिकट कमिसन लिएर आफू मार्फत कोरियन एयरलाई बेचेको कुँवरको भनाइ छ। कोरियन एयरलाई आसियानाका टिकट दिए वापत कति कमिसन लिइयो भन्ने विषयमा भने कुँवरले खुलाउन चाहेनन्।

नेपालमा अन्तर्राष्ट्रिय विमानस्थलहरु थपिएसँगै अन्तर्राष्ट्रिय उडान पनि थपिनुपर्छ र कोरियामा एउटै एयरलाइन्सको एकाधिकार तोडिनुपर्छ भनेरै आफूहरु आसियाना उडाउन लागि परेको सिटौला बताउँछन्। तर आसियाना एयरको नेपाल उडानलाई रोक्न यहाँ एकाधिकार लादिरहेका र त्रिभुवन विमानस्थलका कर्मचारी लागिपरेको सिटौलाको आरोप छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।