सिओल- कोरिया सरकारले यहाँ कार्यरत भिसा समाप्त हुने चरणमा पुगेका ई-९ र एच-२ भिसाधारी करिब एक लाख १५ हजार आप्रवासी श्रमिकलाई एक वर्ष भिसा थप गरिदिने निर्णय गरेको छ। ६२ हजार २३९ जना ईपीयस भिसाधारी र ५२ हजार ३५७ जना एच-२ भिसाधारी गरी एक लाख १४ हजार ५९६ जना विदेशी श्रमिकको एक वर्ष भिसा थप हुने भएको हो।
कोरिया आउने सम्पूर्ण चरण पार गरेका १६ देशका नयाँ कामदार ल्याउन कोरोना महामारीका कारण अवरोध भएपछि सम्भावित श्रमिक अभावलाई पूर्ति गर्न यस्तो निर्णय आएको यहाँको न्याय मन्त्रालयलाई उद्धृत गर्दै प्रवासी श्रमिक युनियन (एमटीयू)ले जानकारी दिएको छ।
यहाँको सरकारले आप्रवासी श्रमिक कोरोना महामारीका कारण स्वदेश फिर्ता हुन कठिनाइ भएको र नयाँ श्रमिक ल्याउनसमेत समस्या भएको भन्दै पुरानै श्रमिकको भिसा बढीमा एक वर्ष थप गर्नेगरी कानुन पारित गरेको थियो। उक्त कानुन अप्रिल १३ अर्थात् मंगलबारबाट लागू भएको छ।
यो नियम लागू भएसँगै अब सन् २०२१ को डिसेम्बर ३१ सम्ममा तीन वर्ष वा चार वर्ष १० महिनाको भिसा अवधि समाप्त हुने श्रमिमको भिसा स्वत: एक वर्ष थप हुने युनियनका अध्यक्ष उदय राईले जानकारी दिए।
तीन वर्ष पुगेर भिसा थप गर्नुपर्ने श्रमिकको हकमा रोजगारदाताले बोनस भिसाको रुपमा थप गरिदिने एक वर्ष १० महिनाको थप भिसा हाल थपिने एक वर्षे भिसामा समावेश नहुने राईको भनाइ छ।
अब ३९ हजार २७२ जना ई-९ श्रमिकले कूल पाँच वर्ष १० महिनासम्म कोरियामा बस्न पाउने सुविधा पाएका छन्। उक्त भिसाको सुविधा कम्पनी परिवर्तनको चरणमा रहेर काम खोजीरहेका श्रमिकमा पनि लागू हुने बताइएको छ।
उक्त कानुन लागू भएसँगै भिसा समाप्त भई स्वदेश फर्किने तयारीमा रहेका २२ हजार ९६७ ई-९ श्रमिकले थप एक वर्ष कोरियामै वैधानिक रुपमा बस्ने अनुमति पाएका छन्। त्यस्तै तीन वर्ष पूरा गरी एक वर्ष १० महिनाको बोनस भिसा थप गर्न पाउने श्रमिकले अब थप एक वर्ष गरी दुई वर्ष वर्ष १० महिना गरी पाँच वर्ष १० महिना कोरियामै वैधानिक रुपमा बस्न पाउने छन्।
कोरिया-नेपाल उडान प्रभावित
सरकारको उक्त निर्णयसँगै स्वदेश फर्किने तयारीमा रहेर टिकट काटिसकेका नेपालीको समेत भिसा थप हुने भएपछि तोकिएका उडानसमेत स्थगित हुनसक्ने बताइएको छ। उक्त नियम मंगलबारबाट मात्र लागू हुन लागेकाले हालसम्म टिकट रद्द गर्नेहरुको संख्या न्यून रहे पनि दुईदेखि तीन दिनमा यो संख्या बढ्नसक्ने केएमई ट्राभलका सञ्चालक विनोद कुँवरले बताए।
टिकट रद्द गर्नेहरुको संख्या बढी भएमा तोकिएको कोरियन एयरको उडान पनि स्वत: रद्द गर्नुपर्ने कुँवरको भनाइ छ। उनले थपे, ‘त्यसरी भिसा थप भएर टिकट रद्द गर्नुपर्ने भएमा तोकिएको शुल्क काटेर टिकट रद्द गराइन्छ, त्यसमा कुनै अवरोध हुँदैन।’
नयाँ ईपीएस कामदार ल्याउन थप ढिलाइको संकेत
यो नियम लागू भएसँगै अब कोरिया आउन व्यग्र प्रतीक्षामा रहेका १६ देशका ईपीएस श्रमिकले थप समय कुर्नुपर्ने संकेत देखिएको छ। सरकारले सन् २०२१ भरिलाई कामदार पूर्ति गर्नेगरी भिसा थप गरिदिएसँगै कोरियामा श्रमिक अभाव पनि तुलनात्मक रुपमा टर्नेछ।
कोरोना महामारी सुरु भएपछि कोरियामा सन् २०२० मा जम्मा छ हजार ६८८ जना श्रमिक र २०२१ को मार्चसम्ममा जम्मा एक हजार ४१२ जना श्रमिकमात्र कोरिया प्रवेश गरेको सरकारी तथ्यांक छ।
ईपीएस प्रणालीमार्फत कोरिया आएर भिसा अवधि समाप्त भएपछि पनि अवैधानिक रुपमा बस्ने आप्रवासीको संख्या ४१ हजार ६४६ रहेको छ। कोरियामा १६ देशका एक लाख ७३ हजार ८४५ जना ईपीएस श्रमिक कार्यरत छन्।
(भूलसुधार: 'कोरियामा कार्यरत एक लाख १५ हजार विदेशी श्रमिकको भिसा अवधि एक वर्ष थप' हुनुपर्नेमा यसअघि अन्यथा हुन गएकोमा सच्याइएको छ। सं. )
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788758166.jpg)
-1786602170.png)
-1786513116.png)
-1788425345.png)
