सिओल- दक्षिण कोरिया सरकारले लामो समयदेखि उडानको प्रतीक्षामा रहेका ईपीयस उत्तीर्ण नेपालीसहित १६ देशका ६६ हजार विदेशी श्रमिकलाई सन् २०२२ भित्र कोरिया ल्याइसक्ने भएको छ।
आप्रवासी श्रमिक नीति निर्धारण समितिको शुक्रबार बसेको बैठकले उक्त निर्णय गरेको प्रवासी श्रमिक युनियनका अध्यक्ष उदय राईले जानकारी दिए।
सरकारको उक्त निर्णयसँगै ईपीयस भाषा परीक्षा उत्तीर्ण गरेर पनि कोरोना महामारीका कारण कोरिया प्रवेश गर्न नपाएका श्रमिकलाई राहत मिलेको छ। कोरोनाका कारण यहाँ आउन नपाएका १६ देशका श्रमिकको संख्या उत्पादनमुलक क्षेत्रमा ४३ हजार, कृषि तथा पशुपालनमा नौ हजार ९३०, मत्स्यपालन क्षेत्रमा चार हजार ६४०, निर्माण क्षेत्रमा तीन हजार ९७० जना र सेवा क्षेत्रमा २६० जना रहेको छ। यसरी तोकिएको कोटामध्ये नयाँ भाषा पास भएकाहरु ४२ हजार ५३० जना रहेका छन्।
त्यस्तै पुनः प्रवेश गर्न प्रतिबद्धता जनाएका श्रमिक २३ हजार ४७० जना रहने उल्लेख छ। नयाँ पास भएका श्रमिकको हकमा २०२२ देखि प्रत्येक तीन महिनामा रोजगार अनुमतिपत्र जारी गरिने र पुनः प्रवेश गर्ने श्रमिकका लागि प्रक्रिया पूरा गर्दै ल्याइने बताइएको छ।
यस्तै सरकारले आगामी जनवरी १ देखि अप्रिल १२ भित्र तीन वर्ष वा चार वर्ष १० महिनाको भिसा अवधि समाप्त हुने आप्रवासी श्रमिकको भिसा एक वर्ष थप गरिदिने पनि निर्णय गरेको छ।
यस अवधिमा भिसा सकिने श्रमिकको संख्या २६ हजार ३५ रहेको छ। कोरोना महामारीको अवस्था हेरेर अप्रिल १२ पछि भिसा सकिने श्रमिकको पनि भिसाका विषयमा थप निर्णय लिइने बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763140555.png)
