पेरिस। फ्रान्समा पछिल्ला केही दिनदेखि जारी दंगा, प्रदर्शन र लुटपाटका घटनापछि अधिकारीहरूले राजधानी पेरिसका केही क्षेत्रसहित देशका विभिन्न सहरमा रातिको समयमा कर्फ्यु लगाएका छन्।
पेरिस प्रहरीले दिएको जानकारीअनुसार प्लास द ला रिपब्लिक र ले आल्स सपिङ क्षेत्रमा स्थानीय समयअनुसार राति ११ बजेदेखि बिहान ६ बजेसम्म कर्फ्यु लागू गरिएको छ। पछिल्ला केही दिनमा यी क्षेत्रमा प्रदर्शनकारीहरू भेला भएका थिए।
यसैगरी, पेरिसको केन्द्रका अन्य केही क्षेत्रमा अनुमति नलिई सभा तथा भेला गर्न प्रतिबन्ध लगाइएको छ।
फ्रान्सका दक्षिणी सहर मार्सेई, बोर्डो, निस र लियोन तथा उत्तरी सहर लिललगायत अन्य सहर र साना बस्तीहरूमा पनि आंशिक कर्फ्यु लगाउने घोषणा गरिएको छ। यी प्रतिबन्धअन्तर्गत केही क्षेत्रमा युवाहरूको आवागमन तथा मानिसहरू भेला हुन रोक लगाइएको छ।
यसअघि फ्रान्सका गृहमन्त्री लौराँ नुनेजले केही सहरमा प्रहरीले परिस्थितिमाथिको नियन्त्रण गुमाएको स्वीकार गरेका थिए। कानून तथा व्यवस्था कायम राख्न सरकारले गरेको तयारीलाई लिएर विपक्षी दलका नेताहरूले उनको आलोचना गरेका थिए।
गत महिना विद्यालयमा राम्रो सुविधा उपलब्ध गराउन माग गर्दै विद्यार्थीहरूले प्रदर्शन सुरु गरेका थिए। पछि ती प्रदर्शनमा महँगीलगायत अन्य विषयसमेत जोडिएका थिए। पछिल्ला दिनमा ट्रेड युनियन र विभिन्न प्रदर्शनकारी समूह सहभागी भएपछि प्रदर्शनमा सहभागी हुनेको सङ्ख्या बढेको थियो।
अधिकारीहरूका अनुसार हालसम्म २ हजार ५०० भन्दा बढी मानिस पक्राउ परिसकेका छन्। समाचार संस्था एएफपीका अनुसार प्रदर्शन नियन्त्रण गर्ने क्रममा करिब एक हजार प्रहरी घाइते भएका छन्।
सोमबार जारी संकटबारे भएको बैठकपछि फ्रान्सका प्रधानमन्त्रीले स्थानीय आवश्यकताअनुसार नगर प्रमुखहरूलाई कर्फ्यु लगाउने अधिकार दिइने बताएका छन्
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
