एजेन्सी–कोरोना संक्रमण भएपछि उपचारका लागि सैनिक अस्पतालमा रहेका अमेरिकी राष्ट्रपति डोनाल्ड ट्रम्प एक्कासी बाहिर निस्केर समर्थकलाई अभिवादन गरेपछि आलोचित भएका छन्।
वाल्टर रीड मिलिटरी मेडिकल सेन्टरमा ट्रम्प र उनकी श्रीमती मेलानिया उपचाररत छन्। तर ट्रम्पले एक्कासी गाडीमा अस्पतालबाहिर आएर समर्थकलाई अभिवादन गरेका थिए। ट्रम्पको यो कार्य विवादित पनि बनेको छ।
संक्रमित भएर स्वास्थ्यमा समस्या देखिएपछि रेमडेसिभिरसहितका औषधि दिइएका तथा अक्सिजन लेभल पनि कम भएका ट्रम्पले गुप्तचर सेवाको गाडीमा अस्पताल बाहिर आएर समर्थकलाई अभिवादन गर्नु गलत भएको भन्दै उनको आलोचना भइरहेको हो। गाडीमा रहेका उनले मास्क भने लगाएका थिए। अस्पतालमा अक्सिजन लिएको व्यक्ति मास्कमात्र लगाएर बाहिर आउनु गलत भएको उनका आलोचकहरुको तर्क छ। गाडी चलाउनेहरुको सुरक्षा तथा कोरोना भाइरसबाट संक्रमित भएको व्यक्तिले बाहिर यसरी आउनु उपयुक्त नरहेको भनी उनको गतिविधिको आलोचना भएको छ ।
ह्वाइट हाउसले भने डाक्टरहरुको स्वीकृतिमा राष्ट्रपति ट्रम्प केहीबेरका लागि गाडीमा बाहिर निस्किएको भन्दै बचाउ गरेको छ। यसरी बाहिर आउन स्वीकृति दिने डाक्टर को हुन् भन्ने बारे नखुलाइएको अमेरिकी सञ्चारमाध्यमले जनाएका छन्।
कोरोना भाइरसलाई गम्भीर रुपमा नलिएको तथा अधिकांश समय चिनियाँ भाइरस भन्दै आएका ट्रम्पले भाइरसबारे आफूले धेरै जानकारी पाएको एक भिडियो सन्देशमार्फत् बताएका छन्।
ट्रम्पका डाक्टरले यसअघि ट्रम्पको स्वास्थ्य सुधारको क्रममा रहेको र सम्भवतः सोमबार डिस्चार्ज हुन सक्ने बताएका थिए।
ट्रम्पलाई कम्तीमा एकपटक अक्सिजनको सपोर्ट दिने गरिएको छ। उनको उमेरसमेत ७० भन्दा माथि भएकाले अक्सिजन दिनु परेको चिकित्सकले बताएका छन्। डा. शन कोन्लीले अक्सिजन लेभल दुईपटक कम भएको बताएका छन्। उनलाई स्टेरोइड पनि दिन थालिएको उनले बताए। स्टेरोइड कोरोना भाइरसबाट संक्रमित भइ गम्भीर स्वास्थ्य अवस्था भएका बिरामीलाई दिइन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
