स्याङ्जा–भूमि व्यवस्था, सहकारी तथा गरिबी निवारणमन्त्री पद्माकुमारी अर्यालले यही असोज ८ गतेको पहिरोमा परि मृत्यु भएका मृतक तथा घाइतेको परिवारलाई राहत वितरण गरेकी छन्।
उनले वालिङ नगरपालिका(१४ को पहिरोमा परी मृत्यु भएका परिवारलाई शुक्रबार राहत प्रदान गरेकी हुन्। राहत हस्तान्तरण गर्दै मन्त्री अर्यालले स्वर्गीय माया नेपालीका छोरा भोजराज र छोरी मनिषाले आफ्ना अभिभावक गुमाउनुपरेको पीडा आफूले महसुस गरेको बताइन्।
मृतकका छोरा र छोरीको अभिभावक सरकार रहेको बताउदै मन्त्री अर्यालले मनिषाको शिक्षाका लागि आफूले व्यवस्था गर्ने र अभिभावकसमेत आफू रहेको बताइन्। पहिरोपीडित भोजराजको बस्ने घर नै पहिरोले पुरेपछि अहिले नजिकैको विद्यालयमा काजकिरियामा छन्। पीडितको घर सरकारले बनाइदिने भन्दै मन्त्री अर्यालले पहिरोपीडित र विस्थापित परिवारको आवास निर्माणका लागि सरकारले व्यवस्था गर्ने बताइन्।
अर्यालको माइती गाउँ वालिङ नगरपालिका(१४ तमादीमै पुगेर १० लाख २० हजार प्रदान गरेकी हुन्। राहत रकम नेपाल सरकारका तर्फबाट ७ लाख र मन्त्रालयको पहलमा ३ लाख प्रदान गरेकी हुन्। असोज ८ गते घर माथिबाट आएको पहिरोमा पुरिएर माया नेपालीको ८ जना परिवार र बहिनी उमाकला गरी ९ जनाको मृत्यु भएको थियो।
यसैगरी मन्त्री अर्यालले कालिगण्डकी गाउँपालिका-४ मा गत असोज ८ गते गौतमडाँडा र असार ३० गते खहरेमा पहिरोले पुरिएर मृत्यु भएका परिवारलाई राहत प्रदान गरेकी छन्। उनले असोज ८ गते मृत्यु भएका विष्णु दमैको परिवालाई केन्द्र सरकारका तर्फबाट २ लाख, प्रदेश सरकारका तर्फबाट ५० हजार र सहकारीको तर्फबाट ४० हजार राहत प्रदान गरेकी हुन्। यसैगरी उनले पहिरोले घरमा क्षति पुगेको औमायाँ नेपालीलाई २० हजार र अन्य तीन परिवारलाई ५–५ हजारका दरले सहयोग रकम हस्तान्तरण गरेकी हुन्।
यसैगरी गत असार ३० गते पहिरोमा परेर मृत्यु भएका चार जनाका परिवारलाई संहकारी संघका तर्फबाट २०–२० हजार र बिस्थापित चार परिवारलाई १५–१५ हजार राहत मन्त्री अर्यालले प्रदान गरिन्।
राहत प्रदान गर्दै मन्त्री अर्यालले मृतक परिवार र विस्थापित परिवारलाई माया गर्दै आवश्यक सहयोग गर्न सबैलाई आग्रह गरिन्। पहिरोले प्रभावित परिवारको घर निर्माण गर्न सरकार इँट्टा बन्ने बताउँदै उनले सरकारले सहयोग गर्न कुनै कन्जुस्याई नगर्ने बताइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
