काठमाडौं- विश्व फुटबलमा पछिल्लो दशककै सबैभन्दा उत्कृष्ट खेलाडीमा दरिएका क्रिष्टियानो रोनाल्डो र लियोनल मेस्सी दुवैसँग टिममा रहेका खेल्न पाएका खेलाडी १४ जना छन्। जसमा पछिल्लो समय थपिए, मिरालेम पियानिच र आर्थर मेलो।
युभेन्टस र बार्सिलोनाले साटफेर गरेका पियानिच र आर्थरले गएको आइतबार राति टिममा डेब्यू पनि गरे। बार्सिलोनाले ला लिगामा भिलारियललाई ४-० ले हराएको खेलमा पियानिच ७८औँ मिनेटपछि बुस्केट्सको स्थानमा खेलेका थिए।
यस्तै सिरि एमा रोमा र युभेन्टसबीच २-२ को बराबरी भएको खेलमा ५८औँ मिनेटमा म्याकिनेको स्थानमा आर्थर मैदान प्रवेश गरेका थिए। पियानिचको तुलनामा आर्थरका लागि डेब्यू खेलको नतिजा सुखद नभए पनि दुवै खेलाडीले स्टार प्लेयरसँग एउटै टिममा रहने नौलो अवसर पाए।
पियानिच र आर्थर जस्तै अरु १२ फुटबलर छन् जसले रोनाल्डोसँग पनि र मेस्सीसँग पनि टिममा रहेर खेलेका छन्। विश्व फुटबलमा रोनाल्डो र मेस्सीको अब्बल शैलीको प्रशंसा चलिरहँदा दुवैसँग टिममा रहन पाउनु पनि फरक खुसीको विषय हो।
जेरार्ड पिके
डिफेन्डर जेरार्ड पिके लामो समय बार्सिलोनामा लियोनल मेस्सीसँगै देखिएका भए पनि उनको सिनियर क्लब फुटबल म्यानचेस्टर युनाइटेडमा सुरु भएको हो। जहाँ उनले क्रिष्टियानो रोनाल्डोसँगै टिममा साझेदारी गरे। पिके २००४ देखि २००८ सम्म युनाइटेडमा थिए। त्यसयता बार्सिलोनामा छन्।
पाउलो डिबाला
सन् २०१५ पछि लियोनल मेस्सीसँग अर्जेन्टिनी राष्ट्रिय टिमबाट खेलेका पाउलो डिबाला २०१८ यता इटालियन क्लब युभेन्टसमा क्रिष्टियानो रोनाल्डोसँगै छन्। अर्जेन्टिनी राष्ट्रिय टिमका लागि डिबालाले २९ खेल खेलेका छन्। युभेन्टसमा पछिल्लो समय रोनाल्डोसँग त उनको सहकार्य मिलिरहेको पनि देखिएकै छ।
आन्द्रे गोमेस
अहिले इभर्टनमा रहेका मिडफिल्डर आन्द्रे गोमेस २०१६ मा भ्यालेन्सियाबाट बार्सिलोना गएका थिए, जहाँ उनले लियोनल मेस्सीसँग एउटै टिममा खेले। बार्सिलोनामा राम्ररी खेल्न नपाएका गोमेस पोर्चुगलको राष्ट्रिय टिममा पनि मुस्किलले परिरहेका छन्। जे होस् उनले रोनाल्डो र मेस्सीसँग टिममा रहने फरक अनुभव भने पाए।
नेल्सन सेमेडो
भर्खरै बार्सिलोनाबाट वुल्भ्स गएका सेमेडोले २०१७ पछि मेस्सीसँगै बार्सिलोनामा खेलिरहेका थिए। उनले पोर्चुगलको राष्ट्रिय टिमबाट पनि रोनाल्डोसँग खेलेका छन्। गएको वर्ष उनले पोर्चुगलबाट नेसन्स लिगको उपाधि समेत जिते। उनले मेस्सीसँगै बार्सिलोनामा दुई ला लिगा, एक कोपा डेल रे र एक सुपरकोपाको उपाधि पनि जितेका छन्।
कार्लोस टेभेज
अर्जेन्टिनी फरवार्ड कार्लोस टेभेज २००७-०९ को समयमा म्यानचेस्टर युनाइटेडमा रहँदा क्रिष्टियानो रोनाल्डोसँगै खेलेका थिए। मार्सेलो बिएल्साको प्रशिक्षणमा २००४ मा नै अर्जेन्टिनी राष्ट्रिय टिममा परेका टेभेजले त्यसको अर्को वर्ष विश्वकप छनोट खेलमा पेरुविरुद्ध मेस्सीसँग पहिलोपटक एउटै टिममा खेले। मेस्सीसँगै उनी दुई पटक कोपा अमेरिकाको फाइनलमा पनि पुगेका छन्।
गोन्जालो हिग्वेन
गोन्जालो हिग्वेनले २००९-१३ को समयमा रिलय मड्रिडमा क्रिष्टियानो रोनाल्डोसँगै खेले। गएको सिजन युभेन्टसमा पनि उनी रोनाल्डोसँगै थिए। अर्जेन्टिनी स्ट्राइकर हिग्वेन २००९ देखि २०१९ सम्म राष्ट्रिय टिममा पनि खेले। यसैले रोनाल्डो र मेस्सीसँगै टिममा रहेर खेल्ने खेलाडीहरुको सूचिमा हिग्वेनको नाम पनि विशेष छ।
गाब्रियल हेन्ज
डिफेन्डर गाब्रियल हेन्ज रोनाल्डोले युवा सयम बिताएको पोर्चुगिज क्लब स्पोर्टिङ सिपीमा एक वर्ष सँगै थिए। त्यसबेला रोनाल्डोले सिनियर टिम डेब्यू गर्ने बेला उनले क्लब छाडिसकेको भए पनि पछि म्यानचेस्टर युनाइटेडमा उनले रोनाल्डोसँगै खेलेका थिए। जहाँ अर्जेन्टिनी राष्ट्रिय टिमबाट समेत उनले मेस्सीसँगै खेलेका छन्। उनी २००३ देखि २०१० सम्म राष्ट्रिय टिममा रहेका थिए।
फर्नान्डो गागो
अर्जेन्टिनाका डिफेन्सिभ मिडफिल्डर फर्नान्डो गागो २००७ देखि २०१२ सम्म रियल मड्रिडमा थिए। जहाँ केही वर्ष सँगै थिए, क्रिष्टियानो रोनाल्डो। अर्जेन्टिनाको राष्ट्रिय टिममा २००७ देखि २०१७ सम्म रहेका उनले मेस्सीसँग पनि केही खेल खेलेका छन्। २००८ को बेइजिङ ओलम्पिकमा उनले मेस्सीसँगै स्वर्ण पदक पनि जितेका छन्।
एजिक्वेल गारे
अर्जेन्टिनाका सेन्टर ब्याक एजिक्वेल गारे २००८ देखि २०११ सम्म रियल मड्रिडमा थिए। २००७ देखि २०१५ सम्ममा अर्जेन्टिनाको राष्ट्रिय टिमबाट पनि उनले मेस्सीसँग केही खेल खेले। उनको खेललाई हेरेर हुने गरेको चर्चा जस्तो उचाइ उनले नपाए पनि अर्जेन्टिनी यु१५ को राष्ट्रिय टिमदेखि अहिलेसम्म नै लियोनल मेस्सीका राम्रा प्रशसंक हुन्।
एन्डरसन डेको
२००७ देखि २०१० सम्म पोर्चुगलको राष्ट्रिय टिममा रहेका डेको २००४ देखि २००८ सम्म बार्सिलोनामा थिए। यसैले उनले रोनाल्डो र मेस्सी दुवैसँग टिममा साझेदारी गरेका छन्। यसैले पोर्चुगलका साथै क्याटालोनियामा समेत डेको लिजेण्ड खेलाडी हुन्। रोनाल्डोसँग राष्ट्रिय टिमबाट २००४ मा नै युरो कपमा डेकोको साथ हेरिएको थियो।
एन्जेल डि मारिया
रोनाल्डो रियल मड्रिड गएको एक वर्षपछि डि मारिया पनि मड्रिड टिममा नै पुगेका थिए। २०१० देखि २०१४ सम्म उनी रियल मड्रिडमा रोनाल्डोसँगै रहे। जहाँ उनले १९० खेल खेलेका छन्। डि मारिया २००९ देखि अर्जेन्टिनाको राष्ट्रिय टिममा पनि छन्। जहाँ उनको मेस्सीसँगको तालमेल पनि खुबै देखिएको छ।
हेनरिक लार्सन
अहिले बार्सिलोनाका सहायक प्रशिक्षक रहेका लार्सन २००७ मा लोनमा म्यानचेस्टर युनाइटेडमा रहँदा क्रिष्टियानो रोनाल्डो सँगै थिए। जतिबेला युनाइटेडले लिग जित्नुका साथै च्याम्पियन्स लिग सेमिफाइनलसम्म पुगेको थियो। त्यसअघि २००४ देखि २००६ सम्म बार्सिलोनामा रहँदा उनी मेस्सी सँगै रहे। जतिबेला दुईपटक मेस्सी र उनले एकै लिग खेलमा गोल समेत गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768550561.png)
-1764146706.png)
-1768395492.png)
