अर्मेनिया–अजरबैजान युद्धमा २३ जना मारिए, तत्काल युद्धविराम गर्न राष्ट्रसंघको आग्रह

विश्व

नेपाल लाइभ सोमबार, असोज १२, २०७७ ०६:५७

एजेन्सी–विवादित क्षेत्रका विषयमा अर्मेनिया र अजरबैजानबीच भएको भीषण युद्धमा २३ जना मारिएका छन्। विवादित नागोर्नो–काराबाख क्षेत्रमा आइतबार दुवै देशका सेनाबीच युद्ध भएको हो।

उक्त क्षेत्रमा १६ जना अर्मेनियाली पृथकतावादी लडाकूहरु मारिनुका साथै १ सय जना घाइते भएको उक्त समूहले जनाएको छ। दुवै पक्षले आ–आफ्नोतर्फ मानवीय क्षति भएको जनाएका छन्। यस्तै, अर्मेनियाली पृथकतावादीको आक्रमणमा ५ जना अजरबैजानी नागरिक मारिएको अजरबैजानका अधिकारीहरुले जनाएका छन्।

तनावपछि अर्मेनिया, अजरबैजान र अर्मेनियानियन्त्रित नागोर्नो काराबाख क्षेत्रमा सैनिक कानुन लागू गरिएको छ भने अजरबैजानले आफ्ना सेनालाई परिचालित हुन निर्देशन दिएको छ।

विवादित क्षेत्रमा अर्मेनियाका नागरिकले बसोबास गरे पनि अन्तर्राष्ट्रिय रूपमा अजरबैजानको जमिन भएको उल्लेख गरिएको छ। सन् १९९१ मा पतन हुनुपूर्व अर्मेनिया र अजरबैजान सोभियत संघको हिस्सा थिए।

यसैबीच, संयुक्त राष्ट्रसंघले दुवै मुलुकलाई तत्काल युद्धविराम गर्न आग्रह गरेका छन्। राष्ट्रसंघीय महासचिव एन्टोनियो गुटेरेसले तत्काल युद्ध अन्त्य गरी अर्थपूर्ण वार्तामा बस्न आग्रह गरेका छन्।