काठमाडौं– आइतबार जमलस्थित राष्ट्रिय नाचघरमा नृत्य विधाका हस्तीदेखि नवप्रतिभासम्मको जमघट देखियो। सन्दर्भ थियो, विश्व नृत्य दिवसको कार्यक्रम।
कार्यक्रममा नृत्य निर्देशक तथा फिल्म निर्माता राजु शाहलाई सम्मान गरियो। चलचित्र नृत्य संघको आयोजनामा शाहलाई बग्गीमा राखेर नगर परिक्रमा गराइयो। उनलाई २५ हजार र सम्मानपत्र समेत अर्पण गरिएको थियो।
समारोहमै भेटिए अहिलेका व्यस्त कोरियोग्राफर कविराज गहतराज। १२ वर्षयता नृत्यकै क्षेत्रमा लागिरहेका गहतराजसँग नेपालमा अब्बल नृत्य गर्ने अभिनेता-अभिनेत्रीबारे सोधियो। यो प्रश्नमा उनले 'नाम तोकेरै राम्रो/नराम्रो भन्न असहज हुने' कूटनीतिक जवाफ दिएर पन्छिन खोजे।
'नृत्य गर्ने क्षमता सबैमा हुन्छ', उनले भने, 'तर कम र बढी क्षमता कुन कलाकारमा छ, त्यो भने निर्देशकले छुट्याउन सक्नुपर्छ।'
गहतराज बिस्तारै खुले, ‘मेरो अनुभवमा नेपाली चलचित्र क्षेत्रमा दिलीप रायमाझी जस्तो सहज रुपमा नाच्ने पर्फेक्ट अभिनेता कमै छन्।’
रायमाझीसँगै आर्यन सिग्देल, प्रदीप खड्का, पल शाह, पुस्पल खड्का, अनमोल केसी लगायत अभिनेताहरु नृत्य कलामा खारिँदै गएका उनको भनाइ छ।
गहतराजले चल्तीका अभिनेता दयाहाङ राईका साथै सौगात मल्ल, निखिल उप्रेतीको चर्चा भने गरेनन्। उक्त प्रसंगमा गहतराजले थपे, ‘कलाकारलाई कतिसम्म निखार्न सकिन्छ भन्ने कुरा उसको रुचि र क्षमताका आधारमा पनि निर्देशन गर्नुपर्ने हुन्छ।'
यता नायिकाबारे कुरा गर्दा गहतराज अभिनेत्री प्रियंका कार्कीकै नाम पहिलो क्रममा राख्छन्।
'उनको व्यवहार र नृत्यप्रतिको रुचिले धेरै प्रभावित छु म', उनले भने।
प्रियंकापछि केकी अधिकारी, निता ढुंगाना, स्वस्तिमा खड्का लगायतको नाम गहतराज उत्कृष्टताको सिँढीमा राख्छन्।
समकालीन पुस्ताका अभिनेत्रीको नामसँगै गहतराजले एक समय नेपाली फिल्मनगरीमा आफ्नो कम्मर मर्काइको जादू छर्ने निरुता सिंह, करिश्मा मानन्धर, विपना थापा जस्ता अभिनेत्रीहरुको प्रसंग पनि निकाले।
अर्का चर्चित नृत्य निर्देशक गोविन्द राईको पहिलो रोजाइका नृत्यमा सिपालु अभिनेता पनि दिलीप रायमाझी नै रहेछन्। नृत्य निर्देशनमै २१ वर्ष लामो अनुभव सँगालेका राईले प्रिय अभिनेताको बयानमा शब्द खर्चिए, 'नृत्य कलामा अनुहारको एक्सप्रेसन, शारीरिक हाउभाउ र गीतसँगको ताल मिल्नुपर्ने हुन्छ, यो सबैमा दिलीप नै राम्रो हो।'
अनुहारको एक्सप्रेसनका हिसाबले भुवन केसी पनि नृत्यमा पोख्त कलाकार रहेको राई बताउँछन्। पछिल्लो पुस्ताका अभिनेतामा पल शाह, पुष्प खड्काको नाम लिन रुचाउँछन् उनी। प्रदीप खड्का, अनमोल केसीले पनि नृत्य कलामा निखार ल्याउँदै आएको राईले देखेका छन्।
अभिनेत्रीहरुको प्रसंगमा राईको छनोट गहतराजको भन्दा फराकिलो छ।
'मौसमी मल्ल, सारंगा श्रेष्ठ, करिश्मा मानन्धर, गौरी मल्ल जस्ता अभिनेत्रीहरु नेपाली फिल्मक्षेत्रका अब्बल नृत्यांगना हुन्', उनले भने।
नयाँ पुस्तामा गहतराको जस्तै राईको पहिलो रोजाइमा प्रियंका नै पर्छिन्।
‘सि इज गुड डान्सर’, उनले यति भने।
निता ढुंगाना, केकी अधिकारी, साम्राज्ञी राज्य लक्ष्मी शाहमा पनि उनले नाच्ने सीप देखेका छन्।
नृत्य गराउन असहज अभिनेता/अभिनेत्रीबारे सोध्दा यी दुवै नृत्य निर्देशक उस्तै जवाफ दिन्छन्।
नृत्य विधाभित्र पनि धेरै प्रकार हुने भन्दै आ–आफ्नो विधामा सबै जना उत्कृष्ट भएको दुवैको प्रतिक्रिया छ।
'यो राम्रो र ऊ नराम्रो भन्नुभन्दा पनि कलाकारको रुचि, क्षमता र गीतको प्रकृतिमा निर्भर रहेर नृत्य निर्देशकले काम लगाउनुपर्ने हुन्छ', उनीहरुको साझा स्वर छ।
कलाकारलाई गीतले मागेको र दर्शकले रुचाउने खालको नृत्य प्रस्तुत गराउन लगाउने जिम्मेवारी नृत्य निर्देशकको हुने तर कलाकारले यसमा सक्दो मिहिनेत गर्नुपर्ने गहतराज र राईको तर्क छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
