सोल- नेपाल सरकारले नेपाल भ्रमणका लागि जान चाहने कोरियाली पर्यटकका लागि कात्तिक १ गतेदेखि भिसा उपलब्ध गराउने तयारी गरेको छ। कोरोना माहामारीका कारण लामो समयदेखि रोकिएको भिसा स्विकृति प्रक्रिया कात्तिक १ देखि पुनः सुरु गर्ने गरी तयारी थालिएको सिओलस्थित नेपाली दूतावासले जानकारी दिएको छ।
नेपालस्थित संस्कृति, पर्यटन तथा नागरिक उड्डयन मन्त्रालयले पहिलो चरणमा तत्कालका लागि हिमाल आरोहण र ट्रेकिङका लागि भिसा उपलब्ध गराउने गरी तयारी थाल्न भनेको समेत दूतावासले जनाएको छ। मन्त्रालयले अनौपचारिक जानकारी गराएपनि मन्त्रिपरिषद्को औपचारिक निर्णय भने अझै आइनसकेको दूतावासको भनाइ छ।
भ्रमणका लागि नेपाल जान चाहने पर्यटकले भिसा लिँदा सरकारले तोकेका क्षेत्रका लागि मात्र जान लागेको भनी उल्लेख गर्नुपर्ने दूतावासका उपनियोग प्रमुख रामसिंह थापाले जानकारी दिए।
हिमाल आरोहण र ट्रेकिङ जस्ता पर्यटकीय क्षेत्रमा बाक्लो भिडभाड नहुने भएकाले सोही क्षेत्रलाई लक्षित गरी भिसा उपलब्ध गराउन लागिएको थापाको भनाइ छ।
नेपालमा कोरोना प्रकोप फैलिनुभन्दा पहिले कोरियालीले नेपाल भ्रमणमा जान चाहेको आशय व्यक्त गर्दै कहिलेबाट भिसा स्वीकृति खुल्छ भन्ने जिज्ञासा राख्ने गरेको भएपनि पछिल्लो समय भने त्यसरी जिज्ञासा राख्नेहरु नआउने गरेको थापाले बताए।
पर्यटन मन्त्रालयको उक्त तयारी स्वागतयोग्य भएको कोरियाका लागि नेपाली पर्यटनदूत केपी सिटौलाको भनाइ छ। तर अन्य विषयलाई बेवास्ता गरेर भिसा उपलब्ध गराएर मात्र कोरियाली पर्यटक नेपाल नजाने उनको तर्क छ।
कोरोना महामारी सुरु भएयता कोरिया-नेपाल हवाई सम्पर्क जटिल विषय भएकाले त्यसलाई सहज नबनाई भिषा मात्र उपलब्ध गराएर नपुग्ने उनले बताए।
महामारीमा पनि कोरियाको आन्तरिक पर्यटन व्यवसाय फस्टाएकोले कोरियालीहरु भ्रमणमा जान आतुर भएको आफूले पाएको सिटौलाको भनाइ छ।
‘सप्ताहान्तमा कोरियाका पर्यटकीय स्थल आन्तरिक पर्यटकले भरिभराउ छन्। यहाँका होटल भरिभराउ छन्। त्यसकारण यहाँका नागरिक कोरोना प्रभाव नरहेका देशको भ्रमणमा जान आतुर छन् भन्ने बुझ्न सकिन्छ,’ उनले भने।
नेपालका हिमाली क्षेत्रहरु, खासगरी हिमाल आरोहण र ट्रेकिङका क्षेत्र कोरोना प्रभावबाट मुक्त रहेकाले सरकारले हप्तामा २ ओटासम्म नियमित उडानको प्रत्याभूति गरेमा कोरियाली पर्यटक नेपाल भ्रमणमा निस्कने पर्यटन क्षेत्रका सरोकारवाला बताउँछन्।
सरकारल भदौ १५ देखि नै कोरियाका लागि नियमित उडान सुचारु गरिएको बताएपनि पर्याप्त यात्रु नभएको भन्दै कोरियन एयरले नियमित उडान गरेको छैन। उसले हाल चार्टर उडान मात्र गर्दै आएको छ।
कोरियाली पर्यटक नेपाल भ्रमणमा जाने वातावरण सुरु भएमा उडान पनि नियमित हुने र कोरिया आउनुपर्ने र नेपाल फर्किनुपर्ने नेपाली श्रमिकले अहिलेको जस्तो सास्ती व्यहोर्नु नपर्ने सरोकारवालाको भनाइ छ।
सरकारले सन् २०२० लाई पर्यटन वर्षको रुपमा मनाउने घोषणा गरेको भएपनि कोरोना महामारीका कारण स्थगित गरेको थियो।
कोरियाबाट नेपाल भ्रमणमा जाने कोरियाली पर्यटकको संख्या सन् २०१८ मा ३८ हजार १ सय ४२ रहेको र २०१९ मा ३६ हजारको हाराहारीमा रहेको सरकारी तथ्यांक छ।
कोरियाबाट नेपाल उडानका लागि एकाधिकार पाइरहेको कोरियन एयरले छिमेकी देश भारतमाभन्दा नेपालमा उडान गर्दा टिकट शुल्क झन्डै दोब्बर लिने गरेका कारण पनि कोरियाली पर्यटक उल्लेख्य मात्रमा नेपाल भ्रमणमा नजाने गरेको कोरियामा पर्यटन क्षेत्रमा काम गरिरहेकाहरू बताउँछन्।
कोरियाबाट कोरियन एयरसँगै आसियानाले पनि चार्टर उडान गरिरहेकाले आगामी दिनमा आसियाना र नेपाल एयरलाइन्सले पनि कोरिया-नेपाल नियमित उडान गर्दै प्रतिस्पर्धा गर्न सके पर्यटकका लागि पनि नेपाल भ्रमण शुल्क कम हुन जाने सिटौलाको तर्क छ।
‘हाल युरोप भ्रमणमा जानुभन्दा नेपाल भ्रमणमा जानु कोरियालीका लागि महँगो छ, त्यसको मूल कारण चर्को हवाई भाडा नै हो,’ उनले भने, 'हवाइ भाडा कम भए कोरियाली पर्यटकको संख्या नेपालमा वृद्धि गर्न टेवा पुग्छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
