गाईघाट– उदयपुरको त्रियुगा नगरपालिका–१३ स्थित हवाई मैदानको नाममा रहेको जग्गा अतिक्रमण भएको छ। हवाई फिल्ड निर्माणका लागि सरकारी स्वामित्वमा राखिएको १६ बिगाहा १४ कठ्ठा १६ धुर जग्गा अतिक्रमणमा परेको हो।
हवाई मैदान बनाउने उद्देश्यका अनुसार २०३०÷३१ सालमै उक्त क्षेत्रको जग्गाधनी प्रमाणपुर्जा हवाई मैदानको नाममा बनाइएको छ। तर, संस्कृति, पर्यटन तथा नागरिक उड्डयन मन्त्रालयको प्राविधिक टोलीले विमानस्थल निर्माणका लागि उपयुक्त नभएको जनाएपछि जग्गा अतिक्रमण बढेको हो।
मैदानमा ४३ वटा पक्कीघर, थारुहट रंगशाला र मदन भण्डारी सभागृह यसअघि नै निर्माण भएका छन् भने २ दर्जनको हाराहारीमा नयाँ घर बनिरहेका छन्। सोही जग्गामा तरकारी तथा फलफूलको बजार बसाइएको छ।
पटक–पटक पहल गर्दा पनि विमानस्थल निर्माण नभएको र निर्माण हुने सम्भावना पनि टर्दै गएपछि स्थानीय जनप्रतिनिधिकै संरक्षणमा जग्गा अतिक्रमण तीव्र भएको स्थानीयहरु बताउँछन्। विमानस्थल नबन्ने निश्चित हुँदै गएपछि भूमाफियाले जग्गा हडपेर बिक्री–वितरण गरिरहेको स्थानीय नरमान राईले बताए।
सरकारी जग्गा अतिक्रमण भएको विषयमा नगरपालिका तथा स्थानीय प्रहरी÷प्रशासन पनि मूकदर्शक बनेको सर्वसाधारणहरु आरोप लगाउँछन्।
‘केही जनप्रतिनिधि नै यो धन्दामा संलग्न छन्’, राईले भने, ‘त्यसैले नगरपालिकाले चाहेर पनि अतिक्रमण हटाउन सकिरहेको छैन।’ मेयर तथा वडाअध्यक्ष सहितका निर्वाचित प्रतिनिधिहरुलाई सो विषयमा पटक–पटक जानकारी गराउँदा पनि पहल नहुनुले जग्गा अतिक्रमणमा उनीहरुको संलग्नता पुष्टि गरिरहेको राईले बताए।
नगरपालिकाका प्रमुख प्रशासकीय अधिकृत तारानाथ लुईटेलले पनि सरकारी स्वामित्वको जग्गा अतिक्रमण भएको स्विकार्दै राजनैतिक संरक्षणका कारण अतिक्रमण हटाउन नसकिएको बताए।
‘सरकारी स्वामित्वमा रहेको हवाई मैदानको जग्गा अतिक्रण भएको छ, हामीले हटाउने प्रयास पनि गरेका हौ’, लुइँटेलले भने, ‘तर, राजनीतिक संरक्षण पाएपछि अतिक्रमण गर्नेहरुले नगरपालिकालाई टेरेनन्।’
अतिक्रमण भएको क्षेत्रबाट घरटहरा हटाउन यसअघि नै सार्वजनिक सूचना समेत जारी गरिसकेको जानकारी दिँदै उनले थपे, ‘कार्यपालिकाको बैठकमै पनि अतिक्रमण हटाउने एजेन्डा पेश भएको हो, तर ठोस निर्णय हुन नसक्दा अवस्थामा सुधार आउन सकेन।’
उदयपुरका प्रमुख जिल्ला अधिकारी विष्णुबहादुर कार्की सहितको टोलीले पनि उक्त क्षेत्रको अनुगमन गरी निर्माणाधीन घरको काम रोक्न र अतिक्रमण हटाउन निर्देशन दिएको जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
