काठमाडौं– चिन्दै नचिनेको व्यक्तिलाई श्रीमान् भनी फैसला गरेको मुद्दामा जिल्ला अदालत काठमाडौंका जिल्ला न्यायाधीश चुरामन खड्का अनुसन्धानमा तानिएका छन्।
मुद्दामा तथ्यभन्दा बाहिर गई गम्भीररुपमा विचलित हुँदै फैसला भएको हुनसक्ने देखिएकाले उनलाई थप अनुसन्धान गर्न सर्वोच्च अदालतमा तानिएको हो।
नेपाललाइभले निरमायाकाे फैसलाबारे फागुन ५ गते समाचार प्रकाशित गरेकाे थियाे।
याे पढ्नुहाेस्: न्यायालयबाटै पीडित निरमाया : चिन्दै नचिनेको व्यक्तिलाई अदालतले श्रीमान् बनाइदिएपछि...
कायममुकायम प्रधानन्यायाधीश दीपकराज जोशीको संयोजकत्वमा रहेको सर्वोच्च अदालतको विशेष समितिले शुक्रबार उनलाई तत्कालका लागि सर्वोच्च अदालतको काजमा राख्ने भन्दै तानेको हो।
खड्काले दाङ जिल्ला अदालतमा हुँदा गरेको फैसलामाथि समेत समितिले अनुसन्धान थालेको छ। खड्का भने जिल्ला अदालत काठमाडौंमा कार्यरत थिए।
कायममुकायम प्रधानन्यायाधीशसहित ५ जना वरिष्ठ न्यायाधीशहरु उक्त समितिमा रहन्छन्। समितिमा ओमप्रकाश मिश्र, चोलेन्द्रशम्सेर जबरा, दीपककुमार कार्की र केदार चालिसे सदस्य छन्।
‘समितिले गरेको अनुसन्धानमा प्रारम्भिक दृष्टिले नै केही अस्वाभाविक संकेतहरु देखिएकाले यो कदम चालिएको हो।’, सर्वोच्चले भनेको छ। उनी माथि थप अनुसन्धानका क्रममा न्यायिक विचलन देखिए फाइल न्यायपरिषद्मा जानेछ र परिषद्बाटै थप कारबाही हुने छ।
स्रोतका अनुसार यसअघि नै पीडित पक्षले सर्वोच्च अदालतमा पेश गरेको कागजात समेतको प्रारम्भिक अध्ययनपछि समिति यस्तो निष्कर्षमा पुगेको हो।
बागलुङकी निरमाया पुनलाई चिन्दै नचिनेको व्यक्तिको श्रीमती भएको फैसला खड्काले गरेका थिए। उक्त फैसलाविरुद्ध पुनले न्याय परिषद् र प्रधानन्यायाधीशको सचिवालयमा उजुरी गरेकी थिइन्। उक्त उजुरीको आधारमा थप अनुसन्धान अगाडी बढाइएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766152266.png)
-1764146706.png)
-1763721444.png)
