बाल विवाह गरिरहेका एक जोडी मण्डपबाटै पक्राउ

समाज

नेपाल लाइभ शनिबार, वैशाख १५, २०७५ १०:३८

रुकुम- जिल्लाको सानीभेरी गाउँपालिकामा विवाह भइरहेको अवस्थामा दुलाहा-दुलहीलाई प्रहरीले पक्राउ गरेको छ। गाउँपालिका वडा नम्बर ७ स्थित जैधुनेमा बाल विवाह गरिरहेका एक जोडीलाई प्रहरीले पक्राउ गरेको हो।

बालविवाह गर्न लागेको सूचनाका आधारमा प्रहरीले दुलाहा-दुलहीलाई विवाह मण्डपबाटै पक्राउ गरेको थियो। केटाकेटीबीच केही दिनअघि प्रेम विवाह भएको थियो।

सानीभेरी गाउँपालिका वडा नम्बर १० अर्माका १८ वर्षीय बालक र सानीभेरी वडा नम्बर ७ जैधुनेकी १७ वर्षीया बालिकाबीच बालविवाह हुँदै गर्दा प्रहरीले पक्राउ गरेको सिम्ली प्रहरी चौकीका प्रमुख गगनसिंह ठकुरीले जानकारी दिए। उनले केटीका अभिभावक शिक्षक भएको भन्दै शिक्षित परिवारबाटै यसरी बालविवाह हुनु दु:खद भएको बताए।

प्रहरीले दुलाहा-दुलहीलाई पक्राउ गरेपछि विवाह रोकिएको छ। विवाह रोकी केटाकेटीलाई अभिभावकको जिम्मा लगाइने प्रहरीको भनाइ छ।

सरकारले केटाकेटी दुवै २० वर्ष नपुगी गरिने विवाहलाई बालविवाह भनेको छ। बालविवाह भएका प्रकृति हेरी ६ महिना वा एक वर्षसम्म कैद हुनसक्ने कानुनी व्यवस्था छ। (रासस)

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

सरकारले राष्ट्र बैंकको गभर्नर कानुन विपरीतको व्यक्ति नियुक्त गर्‍यो : ज्ञानेन्द्र शाही

शिक्षा समितिको बैठक सुरू

गर्भपतनको कानुनी झन्झटले पीडित झन् पीडामा