बौद्ध सम्मेलनले नेपाललाई विश्वमाझ चिनाउन सहयोग गर्छ : मन्त्री अधिकारी

राजनीति

नेपाल लाइभ शनिबार, वैशाख १५, २०७५ ०८:४४

भैरहवा– संस्कृति, पर्यटन तथा नागरिक उड्ययन मन्त्री रविन्द्र अधिकारीले लुम्बिनीको विकासका लागि बौद्ध सम्मेलन महत्वपूर्ण कडी हुने बताएका छन्। लुम्बिनी बुद्ध जन्मस्थल मात्र नभई बौद्ध दर्शनको पनि उद्गम थलोको रुपमा पुष्टि गर्न सम्मेलनले महत्वपूर्ण भूमिका खेल्ने मन्त्री अधिकारीले बताए।

२५६२औं बुद्ध जयन्तीको पूर्वसन्ध्यामा लुम्बिनीमा अन्तर्राष्ट्रिय बौद्ध सम्मेलनको उद्घाटन गर्दै मन्त्री अधिकारीले बौद्ध सम्मेलनले विश्वभर बुद्धको सन्देश फैलाउन र पर्यटक आगमन बढाउन समेत टेवा पुर्‍याउने बताए। उनले ४० वर्षसम्म पूरा हुन नसकेको लुम्बिनी गुरुयोजना आगामी साढे दुई वर्षभित्रमै पूरा गर्नेगरी कामलाई तीव्रता दिएको समेत बताए।

पर्यटकको बसाइ लम्ब्याउन लुम्बिनीमा भौतिक पुर्वाधारको विकास जरुरी रहेको औंल्याउँदै मन्त्री अधिकारीले त्यसका लागि सरकारले काम थाल्ने बताए। उनले लुम्बिनीको समग्र विकासका लागि लुम्बिनी तथा त्यस क्षेत्रसँग सम्बन्धित तिलौराकोट, देवदह तथा रामग्रामलाई जोडेर ग्रेटर लुम्बिनीको अवधारणा अगाडि बढाइएको बताए।

सो अवसरमा महायानका तर्फबाट टुकुलोसान नाम्ग्याल रिम्पुचे, जापानका वरिष्ठ भिक्षु इकाङ मिजुतानी, चाइनिज बुद्धिस्ट संघका उपाध्यक्ष यिङसुङ, श्रीलंकाका वरिष्ठ भिक्षु कोटुगोडा धम्मावासा महाथेरो लगायतले सम्बोधन गर्दै बौद्ध दर्शनलाई विश्वमाझ फैलाउनुपर्ने बताए। उनीहरुले लुम्बिनीको चौतर्फी विकासका लागि विदेशी समुदायले समेत आवश्यक सहयोग गर्ने बताए।

लुम्बिनी विकास कोषका उपाध्यक्ष अवधेशकुमार त्रिपाठी (भिक्षु मैत्तेय) ले लुम्बिनीमा आयोजित यस सम्मेलनले बुद्ध दर्शनका माध्ययमबाट संसारलाई उपहार दिने काम नेपालले गरेको कुराको थप पुष्टि गरेको बताए।

‘लुम्बिनी नेपाल : गौतमबुद्धको जन्मस्थल, बुद्ध धर्मको उद्गम भूमि र विश्व शान्तिको मुहान’ नारा दिइएको यस सम्मेलनमा २३ राष्ट्रका बौद्ध गुरुको सहभागिता छ। सम्मेलनमा ३१ जनाले कार्यपत्र प्रस्तुत गर्नेछन्। ३१ कार्यपत्रमध्ये १९ वटा विदेशी र १२ वटा नेपाली बौद्ध विद्घानले कार्यपत्र प्रस्तुत गर्नेछन्। यसमध्ये शनिबार १९ जनाले कार्यपत्र प्रस्तुत गर्दै छन्।

सम्मेलन आइतबार बिहान ११ बजे सकिने र त्यसपछि लुम्बिनी घोषणापत्र जारी गरिनेछ। सम्मेलन समाप्तिपछि सहभागीहरुलाई लुम्बिनी तथा तिलौराकोटका पुरातात्विक क्षेत्रको अवलोकन गराइने कार्यक्रम छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

सरकारले राष्ट्र बैंकको गभर्नर कानुन विपरीतको व्यक्ति नियुक्त गर्‍यो : ज्ञानेन्द्र शाही

शिक्षा समितिको बैठक सुरू

गर्भपतनको कानुनी झन्झटले पीडित झन् पीडामा