काठमाडौं- जेम्स रोड्रिगेज सन् २०१४ को जुलाईमा स्पेनिस क्लब रियल मड्रिड जाँदा विश्व फुटबलमा केन्द्रमा देखिइरहेका थिए। विश्वकपमा भर्खरै गोल्डेन बुट जितेका रोड्रिगेजले रियल मड्रिडमा जे सोचेका थिए, त्यो पूरा हुन भने सकेन। पछिल्लो समय उनी प्लेइङ सेटमा पर्न नै संघर्ष गरिरहे।
२९ वर्षका कोलम्बियन अट्याकिङ मिडफिल्डर रोड्रिगेज अहिले प्रिमियर लिग क्लब इभर्टनमा नयाँ अध्याय सुरु गर्दैछन्। यो सिजन प्रिमियर लिगको पहिलो खेलमा इभर्टनले आइतबार राति सवा ९ बजे टोटनह्यामसँग खेल्दैछ। जसमा रोड्रिगेजको भूमिका कस्तो रहला भन्ने पर्खाइ छ।
इभर्टनका प्रशिक्षक कार्लो एन्सेलोटीले रोड्रिगेजको क्षमता बुझेका छन्। यसैले इभर्टनमा एन्सेलोटीले भित्र्याएको प्रमुख खेलाडीमा नै रोड्रिगेज देखिएका छन्। तर उनले आफूमा आएको प्रशिक्षकको विश्वास पूरा गर्न सक्छन् सक्दैनन् यकिन छैन। किनकि निकट खेलहरुमा उनी कमजोर देखिएर ‘फ्लप खेलाडी’को आरोप भोगिरहेका छन्।
हुन त रोड्रिगेजले २०१४ अघि नै युरोपियन फुटबलमा आफ्नो छाप राम्रो बनाइसकेका थिए। २०१० देखि २०१३ सम्म पोर्चुगिज क्लब पोर्टोमा रहँदा र त्यसपछि एक वर्ष फ्रेन्च क्लब मोनाकोमा रहँदा उनी अब्बल देखिएका थिए। मोनाको जानुअघि उनले पोर्टोमा तीन सिजन लिग जितेका थिए। जहाँ त्यही समय प्लेयर अफ दि इयर समेत बनेका उनी त्यस्तो अवार्ड पाउने सबैभन्दा कान्छा खेलाडी पनि बने।
२००६ मा कोलम्बियाकै इन्भिगाडो क्लबबाट सिनियर फुटबल सुरु गरेका रोड्रिगेज २००८ मा अर्जेन्टिनाको क्लब बेनफिल्डमा गएका थिए। जहाँबाट २०१० मा पोर्टो गए। बेनफिल्डमा उनले ५० खेलमा १० गोल ८ असिस्ट, पोर्टोमा १०८ खेलमा ३२ गोल ४१ असिस्ट, मोनाकोमा ३८ खेलमा १० गोल १४ असिस्ट गरेका थिए।
रियल मड्रिडमा उनले १२५ खेलमा ३७ गोल ४२ असिस्ट गरे। रियल मड्रिडमा रहेको समयमा नै लोनमा दुई वर्ष बायर्न म्युनिक जाँदा उनले ६७ खेलमा १५ गोल २० असिस्ट गरे। तर कोलम्बियाबाट २०१४ को विश्वकपमा ५ खेलमा ६ गोल गरेर गोल्डेन बुटमार्फत उनले जुन उचाइ पाएका थिए, त्यो कतै पनि उस्तै रहन सकेन।
विश्वकपकै उचाइपछि रियल मड्रिडमा ७१ मिलियन पाउण्डमा रोड्रिगेज अनुबन्धित हुँदा टिमका प्रशिक्षक थिए उनै एन्सेलोटी। त्यसबेला रोड्रिगेज किनेपछि रियल मड्रिड टिममा सकरात्मक खेल र स्टार खेलाडीको संयोजनको खुब चर्चा चलेको थियो। जहाँ क्रिष्टियानो रोनाल्डो, ग्यारेथ बेल र करिम बेन्जेमा जस्ता खेलाडीबीच रोड्रिगेज स्ट्राइकमै देखिए।
विश्वकप गोल्डेन बुटपछि नै दुई ला लिगा उपाधि, दुई च्याम्पियन्स लिग, दुई क्लब विश्वकप, दुई बुन्डेस लिगाका साथै जर्मन कप विनर्स मेडलसमेत जितेका रोड्रिगेजको समय उपाधिका हिसाबले खराब भन्न मिल्ने ठाउँ छैन। तर पनि उनीबाट गरिएको ठूलो अपेक्षा पूरा भइरहेको छैन।
रियल मड्रिडमा नै रहँदा सुरुको उनको चरण उत्कृष्ट नै थियो। जहाँ प्रशिक्षक अहिले इभर्टनकै प्रशिक्षक रहेका एन्सेलोटी थिए। यसैले पनि अहिले इभर्टन समर्थकका लागि रोड्रिगेजमाथि आश गर्न मिल्ने बलियो कारण देखिन्छ। रोड्रिगेजले रियल मड्रिडमा पहिलो सिजन ४० खेलमा १७ गोल गरेका थिए। त्यसपछि एन्सेलोटीले क्लब छाडे जहाँ रोड्रिगेज उसैगरी मैदानमा देखिएनन्।
रियल मड्रिडमा जिनेदिने जिदानको प्रशिक्षण समयमा रोड्रिगेजसँगको तालमेल नमिल्नु खेलाडीको कमजोर उपस्थिति थियो या प्रशिक्षकको अविश्वास थियो रोड्रिगेजको अबको खेलले देखाउनेछ। जिदानले रोड्रिगेजमाथि आश नदेखाउँदा नै उनी दुई सिजन लोनमा बायर्न म्युनिक गए।
हुन त जिदानको समयका पाएका केही अवसरमा पनि रोड्रिगेजले प्लेमेकरका रुपमा नम्बर १० पोजिसनमा खेल्नै पाएनन्। जुन उनका लागि सबैभन्दा सहज र राम्रो स्थान हुने थियो। विंगमा राम्रो बढ्ने बानी नपरेका रोड्रिगेजका लागि त्यो कठीन थियो। त्यसैले मड्रिडमा उनको लागि उपयुक्त स्थानकै अभाव हुन थालेको थियो।
अब इभर्टनमा प्रशिक्षक एन्सेलोटीले पुरानै अवस्थामा रोड्रिगेजलाई फर्काउन उनको पोजिसनमा काम गर्ने नै छन्। रोड्रिगेज इभर्टनमा जानुमा पनि प्रशिक्षकमाथिको विश्वासका कारण नै बढी हो। रोड्रिगेजले इभर्टनमा कमजोर भइरहेको कलात्मक खेल संयोजन र गोलमा अघि बढ्ने विश्वास देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
