मुम्बई–केही समयदेखि सरकारको आलोचना गर्दै आएकी बलिउड अभिनेत्री कंगना रनावतको निवासमा मुम्बई महानगरले डोजर चलाएको छ । रनावतले आफ्नो घरको केही भाग गैरकानुनी तरिकाले परिर्वतन गरेको आरोपमा महानगरले डोजर चलाएको हो।
कंगनाले आफ्नो बंगलामा महानगरले डोजर लगाएको तस्बिर ट्वीटरमा पोष्ट गरेकी छन्। उनले एक पटक फेरि मुम्बईको तुलना पाकिस्ताननियन्त्रित काश्मीरसँग गरेकी छन्। यसअघि पनि उनले यसै गरी तुलना गरेकी थिइन्। उनको उक्त तुलनाले महाराष्ट्र सरकारमै हलचल ल्याएको थियो।
कंगना बुधबार हिमाचल प्रदेशबाट मुम्वई आएकी थिइन्। उनले मुम्बई प्रहरी र महाराष्ट्र सरकारको आलोचना गर्दै आएकी थिइन्। मुम्बइ प्रहरीमाथि उनले गरेको आलोचनासँगै शिव सेनाको पनि आलोचना गरेकी थिइन्। यसलगत्तै उनी भारतीय जनता पार्टी र शिवसेनाको निसानामा थिइन्। उनलाई असुरक्षा महशुस भएपछि सरकारले वाई तहको सुरक्षा दिएको थियो।
यो विवाद चलिरहेको समयमा मुम्बइस्थित उनको अफिसको निर्माण अवैध रहेको भन्दै त्यसलाई हटाउन मुम्बई महानगरको टोली पुगेको थियो। टोलीले उनको घरमा छापा मारेर अफिस अवैध तरिकाले बनाइएको भन्दै सूचना टाँसेको थियो। महानगरले कंगनाले नियमविपरीत फरक तरिकाले कोठा छुट्याएको जिकिर गरेको थियो।
बालकोनीलाई पनि कोठाजस्तै गरी प्रयोग गर्नु अवैधानिक भएको उनीहरुको दाबी थियो। अफिस निर्माणको नियम उल्लंघन भएको महानगरको आरोप थियो। मुम्बई महानगरको यही दाबीका आधारमा बुधबार डोजर लगाइएको हो। तर वास्तविक कारण भने महाराष्ट्र सरकार र मुम्बई प्रहरीको आलोचना भएको बताइएको छ।
मुम्बई म्युनिसिपल कर्पोरेशन एक्टका अनुसार कंगनाले उक्त स्थानबाट कार्यालयको कुनै पनि काम गर्न पाउने छैनन्। २४ घन्टाभित्र निर्माण र पुननिर्माणका सबै कागजात पेश गर्न मंगलबार भनिएको थियो। कंगनाले उक्त म्याद गुजारेपछि महानगरले डोजर लगाएको दाबी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782563266.png)
-1764146706.png)
