काठमाडौं- कोरोना संक्रमितको संख्या ३६ हजार ४ सय ५६ पुगेको छ। सक्रमितहरुको संख्या दिनप्रति दिन बढिरहेको छ। कोरोना संक्रमण सर्वसाधारणदेखि सांसद, संवैधानिक निकायका प्रमुखदेखि पूर्वमन्त्रीसम्म संक्रमित भएका छन्।
हालसम्म प्रतिनिधिसभाका ४ सांसद, अख्तियार दुरुपयोग अनुसन्धान आयोगका प्रमुख आयुक्त र प्रदेशका १ मन्त्री, एक उपपसभामुख र दुई सांसद संक्रमित भएका छन्।
सांसद प्रदीप यादव
संक्रमित भिआइपीहरूमा सबैभन्दा पहिला प्रतिनिधिसभाका सांसद प्रदीप यादव कोरोना पोजेटिभ पुष्टि भएका थिए। पर्सा १ बाट प्रतिनिधिसभामा निर्वाचित सांसद यादव साउन १७ गते संक्रमित भएको पुष्टि भयो। वीरगञ्जमा कार्यकर्तासँगको भेटघाटका क्रममा उनी संक्रमित भएको अनुमान गरिएको छ। १२ दिनको आइसोलेसन बसाइपछि उनी कोरोना संक्रमणमुक्त भएका थिए।
नवीनकुमार घिमिरे
अख्तियार दुरुपयोग अनुसन्धान आयोगका प्रमुख आयुक्त नवीनकुमार घिमिरेलाई पनि कोरोना संक्रमण भयो। घिमिरेलाई साउन २७ गते कोरोना संक्रमण भएको पुष्टि भएको थियो। उनी अख्तियारको क्वार्टरमा आइसोलेन बसे। अहिले उनको रिपोर्ट नेगेटिभ आएकाले काममा फर्कने तयारीमा छन्। अख्तियारका कर्मचारीमा संक्रमण भएपछि उनको परीक्षण गरिएको थियो। परीक्षणमा उनमा पनि संक्रमण पुष्टि भएको थियो।
विनोद चौधरी
प्रतिनिधिसभा सांसद तथा फोर्ब्सको सूचीमा सूचीकृत एकमा नेपाली विनोद चौधरी पनि भदौ १२ गते कोरोना संक्रमति भएका छन्। उनले सामाजिक सञ्जाल ट्विटरमा आफू संक्रमित भएको जानकारी दिएका छन्। यसरी संक्रमित हुने उनी तेस्रा सांसद् हुन्। यसअघि दुई सांसद कोरोना संक्रमित भएका थिए।
डा सूर्यनारायण यादव
सप्तरी क्षेत्र नम्बर १ बाट निर्वाचित सांसद डा सूर्यनारायाण यादव साउन ३० गते कोरोना संक्रमित भएका थिए। चिकित्सकसमेत रहेका सांसद यादव झाडापखाला लागेर गम्भीर अवस्थामा आएका एक बालिकाको उपचारका क्रममा संक्रमित भएको आशंका गरिएको छ। नियमित बिरामी जाँच्न छोडेपनि गम्भीर बिरामी आउँदा उनले हेर्ने गरेकाले बालिका गम्भीर रुपमा मेडिकलमा आएपछि उनले हेरेका थिए। हाल उनी आफ्नै निवासमा स्वास्थ्यलाभ गरिरहेका छन्।
यज्ञबहादुर बोगटी
अछाम-२ बाट निर्वाचित सांसद यज्ञबहादुर बोगटीलाई भदौ ३ गते कोरोना संक्रमण पुष्टि भएको थियो। निर्वाचन क्षेत्र गएर आएको र नेकपा महासचिव विष्णु पौडेलको सचिवालयमा कोरोना देखिएपछि उनले स्वाब दिएका थिए।
शुरुमा प्रयोगशालाले नेगेटिभ रिर्पोट दिएपनि पछि पोजेटिभ आएको खबर पाएका थिए। हाल उनी कीर्तिपुर आयुर्वेद अनुसन्धान केन्द्रको आइसोलेनमा स्वास्थ्यलाभ गरिरहेका छन्।
साउन ३० गते उनको पिसिआर रिर्पोट नेगेटिभ आएको जानकारी पाएका थिए। तर पछि काठमाडौं महानगरले उनको पोजेटिभ रिपोर्ट आएको खबर गरेपछि उनी आइसोलेनमा बसेका थिए।
कञ्चन वादे
पूर्व उद्योग राज्यमन्त्री कञ्चन वादे पनि कोरोना संक्रमित भएका छन्। उनमा कोरोनाको लक्षणसमेत देखिएपछि अस्पताल भर्ना गरिएको छ। १० दिनअघि उनमा कोरोना संक्रमण पुष्टि भएको थियो। काभ्रेपलाञ्चोकमै रहँदा उनी संक्रमित भएको आशंका गरिएको छ। उनलाई सास फेर्न समस्या भएपछि काठमाडौंको ह्याम्स अस्पतालमा आइसियूमा राखिएको थियो। हाल वादेको स्वास्थ्य सुधारोन्मुख छ।
राधिका तामाङ
बागमती प्रदेशकी उपसभामुख राधिका तमाङलाई भदौ १ गते कोरोना संक्रमण भएको पुष्टि भयो। उनीसँगै उनका ९ वर्षीय छोरामा पनि कोरोना संक्रमण पुष्टि भएको थियो। उनी निर्वाचन क्षेत्र गएका बेला संक्रमण भएको अनुमान गरिएको छ।
उनी बागमती प्रदेशको उपसभामुख निवासमा आइसोलेनमा रहेकी छन्।
कर्णाली प्रदेशका सांसद जीवनबहादुर शाही पनि कोरोना संक्रमित भए। असार ३० गते उनको रिर्पोट कोरोना पोजेटिभ आएको थियो। संक्रमित प्रदेश सांसद शाही कर्णाली प्रदेशको नेपाली कांग्रेसका दलका नेता हुन्। उनी साउन ७ गते कोरोना संक्रमणमुक्त भएका छन्।
ज्ञानेन्द्र यादव
कोरोना संक्रमणको जोखिम धेरै रहेको प्रदेशमा आन्तरिम मामिला तथा कानुनमन्त्री ज्ञानेन्द्र यादव साउन २३ गते कोरोना संक्रमित भएका थिए। तराईका जिल्लाहरुको भ्रमणका क्रममा उनी संक्रमित भएको हुन सक्ने अनुमान गरिएको छ।
उनी मन्त्रीनिवासमा आइसोलेनमा बसेका थिए। मन्त्री यादव भदौ ५ गते संक्रमणमुक्त भए।
रिना यादव
प्रदेश सांसद रिना यादव पनि साउन २३ गते नै संक्रमित भएको पुष्टि भयो। मन्त्री यादवसँगै गरिएको परीक्षणमा सांसद यादवमा पनि संक्रमण भएको देखिएको थियो।
निर्वाचन क्षेत्र जाने क्रममा उनी संक्रमित भएको आशंका गरिएको छ। उनी भदौ ३ गते कोरोना संक्रमणमुक्त भएकी छन्। समाजवादी दलबाट उनी निर्वाचित भएकी थिइन्।
विजय सरावगी
वीरगञ्ज महानगरपालिकाका मेयर विजय सरावगी पनि काममै क्रममा संक्रमित भएको अनुमान गरिएको छ। साउन १५ गते उनी कोरोना संक्रमित भएका थिए।
संक्रमित भएपछि उनी काठमाडौंमा आई आइसोलेसन बसे। उनीसँगै उनका बुबा र ज्वाईं पनि संक्रमित भएका थिए। भदौ ८ गते संक्रमणमुक्त भएर उनी महानगर फर्केका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
