काठमाडौं–तनहुँको भानु नगरपालिका १ को भन्सार क्षेत्रमा अहिले कोरोना त्रास फैलिएको छ। उक्त वडाका अध्यक्ष प्रेमबहादुर लामा बिहीबारदेखि तनावमा छन्।
शून्य संक्रमित रहेको तनहुँको भानु नगरपालिका १ मा बिहीबार एक्कासी २० जनामा कोरोना संक्रमण पुष्टि भएपछि उनको तनाव बढेको हो। भन्सार क्षेत्रमा विदेश र अन्यत्रबाट मानिस आएको जानकारी वडालाई नभएको अवस्थामा कसरी संक्रमण भयो र यो समुदायमा पुग्यो भनेर उनको चिन्ता बढेको छ।
स्थानीय निर्माण व्यवसायीको परिवारका तीन जनामा मंगलबार संक्रमण देखिएपछि उनीसँगको सम्पर्कका आधारमा पहिचान भएका एक सय २२ जनाको पिसीआर परीक्षण गरिएको थियो। जसको पछिल्लो नतिजाले उनको घर तथा छिमेकका २० जनामा संक्रमण देखाएको वडाध्यक्ष लामाले बताए।
एक सय २२ मध्ये केहीको परीक्षण नतिजा आउने क्रममा नै रहेको उनले बताए। ‘अहिलेसम्म ८९ जनाको परीक्षणमा २० मा पोजिटिभ देखिएको जानकारी पाएका छौं,’ उनले भने।
संक्रमितहरुमा सबै भानु-१ भन्सार क्षेत्रका छन्।
‘यसअघि संक्रमण देखिएका व्यक्तिकै छिमेक र आसपासमा संक्रमण देखिएकाले अवस्था जटिल भएको देख्छु’ वडाध्यक्ष लामाले भने ‘अब समुदायका कन्ट्याक्ट ट्रेसिङ गर्दै सबैको गर्नुपर्ने अवस्था सिर्जना भएको छ।’
संक्रमित २० जना देखिएको भन्सार क्षेत्रका मोटरसाइकल वर्कसप, प्रहरी र मासु पसलका व्यक्ति पनि संक्रमित पाइएका वडाध्यक्ष लामाले बताए। लकडाउन अवधिमा पनि यतै रहेका सई र प्रहरी जवानमा समेत कोरोना पुष्टि भएपछि समुदायमा गएको हो कि भन्ने डर लागेको उनले बताए।
त्यस्तै ‘धेरै मानिस आउने वर्कसप र मासु पसलका व्यक्तिमा नै संक्रमण देखिएकाले यसले अझ धेरैमा संक्रमण फैलिएको देखाउँछ,’ उनले भने,‘समुदाय संक्रमणको जटिल अवस्थामा पुगेको हुनसक्छ ।’ उक्त वडामा यसअघि एक जना संक्रमित थिए। उनीहरुको र नयाँ देखापरेका बीचमा कुनै सम्र्पक नभएको उनले बताए। ‘विदेशबाट आएका एक जनामा देखिएको थियो ’ लामाले भने, ‘उनी क्वारेन्टाइन र उपचारपछि निको भएर फर्केका थिए। ’
स्थानीय ठेकेदारकी श्रीमती, बच्चा र बहिनीलाई संक्रमण देखिएकाले उनीहरुबाट अन्यमा पुगेको हुनसक्ने अनुमान आफूहरुले गरेको उनले बताए। उनको पनि कुनै ट्राभल हिस्ट्री भने नभएको उनले बताए। उनका बाबु आमा विदेशमा रहेकाले उनका परिवारलाई उपचारका लागि पोखरा पठाइको उनले बताए। ‘तराईबाट आएका कामदारबाट अरु मानिसमा सरेको हुनुपर्छ,’ वडाध्यक्ष लामाले भने, ‘भारत र तराईबाट आएका कामदार वडालाई खवर नगरि भित्राउने र क्वारेन्टाइनमा नबस्ने हँदा कोरोना एकै पटक समुदायमा देखियो।’
छैन क्वारेन्टाइन
यसअघि वडाले २ वटा विद्यालयमा क्वारेनटाइन बनाएको थियो। उक्त विद्यालयमा भदौदेखि पढाई सञ्चालन हुने भनेपछि खाली गरिएको वडाध्यक्ष लामाले बताए।
‘भदौ १ गतेदेखि विद्यालय खोल्ने भनियो, अनि क्वारेन्टाइन रहेको भानु नगरको वडा २ र ४को विद्यालयमा राखिएको क्वारेन्टाइन हटाइयो ’ लामाले भने ‘विद्यालय सञ्चालन गरेपछि अर्को ठाउँमा राख्ने अवस्था आएको छ।’ संक्रमित देखिएपछि वडाले माइकिङ गरेर सर्तकता अपनाउन आग्रह गरिएको उनले बताए। ‘बाहिर ननिस्कन आग्रह गरेका छौं,’ शनिबार र आइतबार थप परीक्षण गर्ने छौं,’ उनले भने, ‘जसमा देखियो उनीहरुका परिवारलाई पहिलो चरणमा परीक्षण गरिनेछ, अनि मात्र शंकास्पदलाई गरिन्छ । ’
हाललाई कुनै पनि क्वारेन्टाइन नभएको उनले बताए। अब नगरपालिकाको सहयोगमा क्वारेन्टाइन र आइसोलेनको व्यवस्था गर्ने तयारी भइरहेको उनले बताए। विहीबारको कार्यपालिका बैठकले नगरभित्रै आइसोलेसन र क्वारेन्टाइन बनाउन भवनको खोजी गर्ने निर्णय गरेको र केही दिनमा व्यवस्थापन हुने आसमा रहेको
के भन्छन् नगरप्रमुख?
संक्रमण समुदायमा गए-नगएको परीक्षणपछि मात्र भन्न सकिने भानु नगरपालिकाका मेयर उदयराज गौलीले बताए। अब संक्रमण देखिएकाले भएभरको जनशक्ति परिचालन गरेर कन्ट्याक्ट ट्रेसिङ गरिने उनले बताए। ‘यथासम्भव स्रोतको परिचालन गरेर ती व्यक्तिको सम्पर्कमा आएकाको पहिचान गरिनेछ,’ उनले भने ‘संक्रमण देखिएका व्यक्तिमा पुष्टि भएपछि उनीहरुको सम्पर्कमा आएकालाई बाहिर ननिस्कन भनिएको छ।’
सबैको स्वाब संकलन र आगामी दिनका बारेमा निर्णय गर्न नगर कार्यपालिकाको बैठक बिहीबार बसेको थियो। बैठकले संक्रमित थप भएमा लकडाउन गर्ने, सिल गर्ने, कन्ट्याक्ट ट्रेसिङ गरेर उनीहरुको उपचारका लागि अस्पताल पठाउने उनले बताए। यसअघि संक्रमण देखिएकाले भदौ २ गतेसम्मका लागि सबै नगर क्षेत्र सिल गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
