काठमाडौं– टिभी प्रस्तोता प्रकाश सुवेदीले नेपाली अभिनेत्रीका विषयमा गरेको टिप्पणीप्रति फिल्मकर्मीले तीव्र विरोध जनाएका छन्। एक अभिनेत्रीलाई लक्षित गरेर उनले 'महानायिका बनाइदिनुपर्ने, त्यो पनि दाह्रा निस्किएको अनुहारलाई' भन्दै टिभी कार्यक्रममा टिप्पणी गरेका थिए।
उक्त टिप्पणीपछि अभिनेत्री पूजा शर्मा, ऋचा शर्मा, फिल्मकर्मीहरु प्रदीप भट्टराई, रवीन्द्र सिंह बानियाँ दिपेन्द्र के खनाल, अर्जुन कुमारलगायतले स्टाटस लेख्दै आपत्ति जनाएका छन्।
अभिनेत्री पूजा शर्माले आफूले अन्तर्वार्ता दिन अस्वीकार गर्दा उक्त टिप्पणी गरिएको र आफू लक्षित रहेको बताएकी छन्। कति चुप रहने? कति सहने? भन्दै उनले फेसबुकमा लेखकी छन्, 'प्राइम टिभीमा अन्तर्वार्तामा बोलाइयो गएँ। सामान्य ज्ञानसँग सम्बन्धित प्रश्न गरियो।
अन्तर्वार्ता चल्दाचल्दै मैले पत्रकार प्रकाश सुवेदीजीलाई मैले राम्रो गर्न सकिन प्लिज यो काटिदिनुस् भनें। मान्नु भएन।त्यो प्रसारण भयो। भाइरल भयो। मेरो थुप्रै ट्रोलहरु बने। आफ्नै गल्ति हो भनेर चुपचाप बसें। पछि एपीवन जानुभयो र अन्तर्वार्तामा बोलाउन भयो। म मानसिक तनाब झेलिरहेको थिएँ। त्यसपछि उहाँले कार्यक्रममा 'दाह्रा निस्केकी महानायिका' टिप्पणी गर्नुभयो।'
अभिनेत्री ऋचा शर्माले प्रस्तोता सुवेदीको उक्त अभिव्यक्तिप्रति रोष प्रकट गरेकी छिन्। प्रस्तोताले आत्मसमीक्षा गर्ने बेला भएको भन्दै कटाक्ष गरेकी छिन्। उनको कार्यक्रमलाई व्यंग्य गर्दै भनेकी छिन्, 'मैले बुझेको रजतपटको अर्थ-चलचित्र घरको पर्दा हो। तर हिजोआज मैलो हुँदै गएको छ, सायद धुने बेला आएको छ। सायद फेर्ने बेला आएको छ।'
शर्माले एउटा अभिनेत्री र त्योभन्दा पहिला एउटा नारीको हैसियतले यस समाजले हामीलाई कसरी जिउनुपर्ने, समाजमा अटाउन कस्तो देखिनुपर्ने, कस्तो लगाउनुपर्ने, कसरी हिँड्नु, बोल्नु, खानुपर्ने भनेर बारम्बार सिकाइएको वा टिप्पणीको माला लगाइदिएको देख्दा, आक्रोश, हिनता र अस्थिरताले सताउने गरेको बताइन्।
उनले भनेकी छन्, 'मेरो शरीरको बनावट उनीहरुले चाहेझैं बनाउँ, म आर्टिफिसियल र देखावटी हुन्छु। नबनाउँ त म मोटी, दाह्रा भएकी, काली, भ्यात्त परेकी हुन्छु। जब-जब मान्छेले आफूलाई संरक्षकलाई अहँकार र अभिमानको बाटो रोजेका छन्। ठूला-ठूला मै हुँ भन्नेले पनि गद्दी छोड्नु परेको छ।'
यसैगरी फिल्म निर्माता अर्जुन कुमारले सुवेदीलाई सामान्य नैतिकतासमेत नभएको भन्दै गालीगलोज टिभी कार्यक्रममा गर्नु अनुचित भएको बताएका छन्। फिल्म निर्माता रवीन्द्र सिंह बानियाँले अभिनेत्री फिल्म क्षेत्रका चेली भएको बताउँदै परिवारको सदस्यमाथिको घटिया टिप्पणी गर्नु आफूमाथिको हमलाका रुपमा लिएको बताएका छन्। उनले उक्त कार्यक्रममा अन्तर्वार्ताका लागि नजान र प्रचार सामाग्री नपठाउन फिल्मकर्मीलाई अपिल गरेका छन्।
फिल्म समीक्षक गोकर्ण गौतमले पत्रकारिता दम्भ र कसैको अपमान गर्ने हतियार नभएको बताउँदै सुवेदीले कार्यक्रममा प्रयोग गरेको ‘महानायिका बनाइदिनुपर्ने, त्यो पनि दाह्रा निस्किएको अनुहारलाई’ वाक्यांशले लज्जाबोध भएको बताएका छन्। उनी भन्छन्, 'मिडियाले तथ्यगत आलोचना गर्न पाउँछ, तर यो अव्यवसायिक गाली हो, बडी स्यामिङ' हो। स्त्रीद्वेषी मानसिकता हो।'
फिल्म निर्देशक दीपेन्द्र के खनालले फिल्म क्षेत्रमा घृणा र रिस बढेको बताउँदै भन्छन्, 'उसले उसलाई घोचेको छ। कस्ले कसलाई पेलेको छ। निचोरेको छ, बटारेको छ, पछारेको छ, चिमोटेको छ, कोतरेको छ। क्षमा माग्ने र क्षमा दिने संस्कृतिको विकास कहिले होला?'
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।