हटस्पट विराटनगर : मेयर पराजुली भन्छन्- कोरोना समुदायमा गइसक्यो, देशभर लकडाउन गरौं

कोरोना अपडेट

दुर्गा दुलाल आइतबार, साउन १८, २०७७ २२:१८

विराटनगर- विराटनगर महानगरपालिकाले साउन १६ गते सूचना जारी गर्दै नगरभित्र लकडाउनकाे लागू गरिएको घोषणा गर्‍याे। विराटनगरमा समुदायस्तरका कोरोना संक्रमण फैलिएको भन्दै मेयर भीम पराजुलीले साउन महिनाभरका लागि लकडाउन घोषणा गरे। फलफूल दूध, ग्यास, अक्सिजनलगायतका अत्यावश्यक वस्तु तथा सेवा प्रदान गर्नेबाहेकका अन्य पसलहरु बन्द भए।

संघीय सरकारले साउन ७ गते खुलाएको लकडाउनपछि देशका विभिन्न स्थानमा कोरोना संक्रमणको जोखिम बढेको छ। विराटनगरमा भारतीय क्षेत्रबाट मानिस छिर्ने नाका पर्ने भएकाले संघीय सरकारले जारी गरेको लकडाउन खुलाएसँगै वृद्धि भएको देखिन्छ।

प्रदेश १ मा सबैभन्दा बढी जोखिम भएका जिल्ला मोरङ र झापा हुन्। मोरङमा अहिले ३१४ जना कोरोना संक्रमित रहेका छन्। २५६ जना पुरुष र ५८ जना महिलामा कोरोना संक्रमण देखिएकाे छ। यीमध्ये विराटनगर महानगरभित्र मात्रै १२१ जना संक्रमित छन्।

ट्राभल हिस्ट्री नभएका मानिसमा देखियो कोरोना
‘साउन ७ गते संघीय सरकारले लकडाउन खोलेपछि विराटनगरमा संक्रमितको संख्या ह्वात्तै बढ्याे,’ मेयर पराजुलीले भने, ‘अहिले बाहिरबाट आएका मानिसभन्दा ट्राभल हिस्ट्री नभएका धेरै संक्रमित देखा परेका छन्। यसको अर्थ हो समुदायमा फैलिएको छ।’ ट्राभल हिस्ट्री नभएका ७१ जनाभन्दा बढीमा कोरोना संक्रमण पुष्टि भएको मेयर पराजुलीले नेपाल लाइभलाई बताए। समुदायलाई थप जोखिममा पुग्न नदिन लकडाउन घोषणा गरेको मेयर पराजुलीको भनाइ छ।

मेयर पराजुलीले अब वास्तविक लकडाउन लगाउनुपर्ने समय भएको बताएका छन्। देशभर १४ दिनसम्म अब लकडाउन गर्ने हो भने संक्रमण रोक्न सकिने नत्र भयावह हुने देखिएको उनले बताए। ‘कोरोना संक्रमण भारत तथा अन्य मुलुकबाट आएकाबाट सुरु भएको थियो,’ मेयर पराजुलीले भने, ‘यसरी बाहिरबाट आएका मानिसभन्दा समुदायमा रहेका मानिसमा बढी देखिन थाल्यो। ट्राभल हिस्ट्री नभएका व्यक्तिमा काेराेना पोजेटिभ भएपछि लकडाउनको विकल्प नभएको विज्ञहरुको सुझावपछि महानगरले लकडाउन घोषणा गरेको हो।’

संक्रमितसँग सम्पर्कमा रहेकाहरूको पहिचान र परीक्षणतर्फ महानगरको जोड रहेको मेयर पराजुलीको दाबी छ। ‘प्रदेश र केन्द्रलगायतका निकायसँग आग्रह गरेर परीक्षणको दायर बढाउने काम गरिहेका छौँ,’ उनले भने, ‘संक्रमण भएकाको पहिचानलाई समाजबाट अलग राख्ने काम पनि सँगसँगै भइरहेको छ।’

यसरी संक्रमण पुष्टि भएकाहरुलाई विराटनगरको कोभिड अस्थायी अस्पतालमा राखिएको र त्यहाँ नआएकाहरुलाई बिपी कोइराला स्वास्थ्य विज्ञान प्रतिष्ठान धरानमा पठाइएको उनले बताए। विराटनगरमा ५० बेडकाे अस्थायी अस्पताल रहेकोले बाँकीलाई धरानमा राखिएको छ।

कोरोना संक्रमणको पहिलो कारण खुल्ला सीमा
विराटनगरमा कोरोना संक्रमण फैलिनुको कारण अनियन्त्रित खुल्ला सीमाना भएको मेयर पर‍ाजुलीको ठहर छ। सरकारले लकडाउन खुला गरेसँगै खुला सीमाना क्षेत्रबाट लुकिछुपी भारतबाट मानिसहरु छिरेको र उनीहरू सजक नबन्दा कोरोना संक्रमण समुदायसम्म पुगेको उनले बताए।

‘बोर्डर केन्द्र सरकारको नियन्त्रणमा छ। सशस्त्र प्रहरी पनि परिचालन भएको छ। तर, आवतजावत राेक्न नसक्दा संक्रमणको जोखिम बढेको छ,’ उनले भने, ‘यसरी समुदायमा फैलनुमा हामी पनि दोषी छौं, मास्क लगाएनौं, हात धएनौं र सचेत भएनौं।’

अब देशभर लकडाउन गरौं
मेयर पराजुलीले आफ्नो क्षेत्रमा मात्र लकडाउन गरेर संक्रमण रोक्न सक्ने अवस्था नरहेको बताए। ‘२१ दिनसम्म यहाँ रोकेर के गर्नु? अन्य क्षेत्रमा खुला छ। त्यहाँबाट फेरि सरिहाल्छ,’ मेयर पराजुलीले भने, ‘अब मेरो सुझाव विराटनगर मात्र होइन, देश नै लकडाउन गर्नुपर्छ। सरकारले अब वास्तविक लकडाउन गर्ने समय भएको रहेछ।’

विराटनगरको वडा नम्बर ३, ६ र १४ मा धेरै संक्रमित रहेको उनले बताए। भारतसँग नजिक भएका यी क्षेत्रमा उतैबाट आएका मानिसहरूले सावधानी नपुर्‍याउँदा समुदायमा पुगेको उनको अनुभव छ। ‘अहिले समुदायमा धेरै देखिन थालेको छ,’ उनले भने, ‘समुदायमा सरेपछि हामीले बाध्य भएर साउन महिनाभर लकडाउन गरेका छौं, सँगै परीक्षण बढाउने काम हुन्छ।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।