काठमाडौं- चीनका लागि नेपालका नवनियुक्त राजदूत महेन्द्रबहादुर पाण्डे र नेपाल चेम्बर अफ कमर्सका अध्यक्ष तथा पदाधिकारीबीच भेटघाट भएको छ। मंगलबार चेम्बरको टोली र राजदूत पाण्डेबीच भेटघाट भएको हो।
भेटमा चेम्बर अध्यक्ष राजेशकाजी श्रेष्ठले तातोपानी र रसुवागढी नाकाबाट सामग्री आयात तथा निर्यात गर्दा हुने जटिलता सरलीकरण गरी निर्बाध रुपले दुवै नाका संचालन गर्न पहल गर्नुपर्ने धारणा राखेका थिए।
चीनले ८ हजारभन्दा बढी नेपाली उत्पादनको आयातमा शून्य भन्सार महसुल दरमा प्रवेश सुविधा प्रदान गरेको तर यस्तो सुविधा प्राप्त गर्न ४० प्रतिशत मूल्य अभिवृद्धि पूरा भएको हुनुपर्ने प्रावधान छ। सो प्रावधान पूरा गर्न कतिपय मालवस्तुहरुमा कठिन भएकोले मूल्य अभिवृद्धिको अनुपात कम गर्न समेत पहल गर्न पाण्डेसमक्ष आग्रह गरेका थिए।
अध्यक्ष श्रेष्ठले चीनको बजारमा कृषि तथा लाइभस्टकका वस्तु निर्यातको सम्भावना भएकोले ती वस्तु चिनियाँ बजारमा सहज तथा सरल तवरले प्रवेशको लागि पहल गरिदिन अनुरोध गरे।
नेपालको पर्यटन विस्तारमा चिनियाँ पर्यटकको योगदान रहेको हुँदा कोभिडपश्चात् चीनका पर्यटकलाई नेपाल आगमनको लागि प्रवर्द्धन गरिनुपर्ने तथा हवाइ भाडा प्रतिस्पर्धी बनाउन पहल गर्न समेत आग्रह गरेका थिए।
नेपाल-चीन चेम्बर अफ कमर्सका अध्यक्ष श्री त्रिभुवनधर तुलाधरले चीनबाट धार्मिक तथा संस्कृतिक पर्यटक प्रवर्द्धन गर्न आग्रह गरेका थिए।
राजदूत महेन्द्र बहादुर पाण्डेले चेम्बरबाट प्राप्त सुझावहरु गम्भीरतापूर्वक मनन गरी सहजिकरणका लागि सक्दो प्रयास गर्ने बताएका थिए।
चेम्बरको टोलीमा वरिष्ठ उपाध्यक्ष राजेन्द्र मल्ल, उपाध्यक्ष कमलेश अग्रवाल तथा नेपाल-चीन चेम्बर अफ कमर्सका अध्यक्ष त्रिभुवनधर तुलाधरलगायत पदाधिकारीको थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775053689.png)
-1764146706.png)
