नुवाकोट- प्रदेश कानुन नबनेकै अवस्थामा विदुर नगरपालिकाले भूकम्पपीडितलाई राहत दिने भन्दै बालुवा वितरण सुरु गरेको छ। विदुर नगरपालिकाले वडा नं १० को गेर्खुटारका भूकम्पपीडितहरुलाई राहतको नाममा बालुवा बाँड्न थालेको हो।
प्रदेशको कानुन नबनाएसम्म कुनै पनि स्थानीय निकायले प्राकृतिक स्रोतको उत्खनन तथा प्रयोग गर्न नपाइने भए पनि नगरपालिकाले राहतको नाम भजाएर बालुवा वितरण गरिरहेको हो।
वार्ड नं १० का अध्यक्ष गणेश नेपालले पुनर्निर्माणलाई तीव्रता दिनका लागि पनि बालुवा वितरण गरिएको बताए। बालुवा लगेबापत भूकम्पपीडितहरुसँग नगरपालिकाले एक टिपरको २५ सय रुपैयाँ र वडा कार्यालयले ११ सय रुपैयाँ लिने गरेको छ।
नगरपालिकाले दुई दिनमा ७५ टिपरभन्दा बढी बालुवा उत्खनन गरी प्रतिटिपर २५ सय रुपैयाँको दरमा बिक्री गर्दै आएको हो। नगरपालिकाले २६ लाखभन्दा बढी राजस्व संकलन गरेको छ भने वडा कार्यालयले प्रतिगाडी ११ सय रुपैयाँको दरमा ८३ हजारभन्दा बढी राजस्व संकलन गरेको छ।
भूकम्पपीडितहरुले भने बालुवाको मूल्य निकै महँगो भएको गुनासो गर्दै आएका छन्।
विदुर नगरपालिका वडा नं १० का अध्यक्ष नेपाल भने नुवाकोटमा बालुवाको अभाव भएकाले महँगो हुन पुगेको तर्क गर्छन्। नगरपालिकाले भूकम्पपीडितहरुलाई वितरण गरेको बालुवा नुवाकोटको सबै स्थानमा वितरण गर्न सक्ने नेपालले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
