फाइल तस्बिर
काठमाडौं- संघीय संसद प्रतिनिधिसभा अन्तर्गतको विकास तथा प्रविधि समितिले सामाजिक संजाल र अरु मोबाईल एप्लिकेसन चलाउन सुरक्षित रहेको पुष्टि भएपछि मात्रै डाउनलोड वा प्रयोग गर्न पाउने व्यवस्था मिलाउन सरकारलाई निर्देशन दिएको छ।
शुक्रबार बसेको समितिको बैठकले ‘नेपालभित्र प्रयोग गरिने एप्स तथा सामाजिक सञ्जाल सुरक्षा, गोपनीयता र उपयोगिताका हिसाबले उपयुक्त रहेको नियमनकर्ता निकायले पुष्टि गरेपछि मात्रै डाउनलोड वा प्रयोग गर्न पाइने व्यवस्था गर्न’ सञ्चार तथा सूचना प्रविधि मन्त्रालयलाई निर्देशन दिएको हो।
त्यसैगरी, समितिले सरकारी वेभसाइट र सूचना प्रविधि सेवा प्रदायक कम्पनीहरुको अनिवार्य सेक्युरिटी अडिट गर्ने व्यवस्था मिलाउन पनि सरकारलाई निर्देशन दिएको छ। सरकारी डोमेन नेम निजी क्षेत्रबाट दर्ता हुँदै आएकोमा यस्तो कार्य सरकारी निकायबाट मात्र गर्ने आवश्यक व्यवस्था मिलाउन पनि निर्देशन दिइएको छ।
समितिले सरकारी कागजातहरु सम्बन्धित निकायको आधिकारिक वेबसाईट वा इमेलबाहेक अरु माध्यमबाट सार्वजनिक नगर्न पनि निर्देशन दिएको छ। ‘सरकारी पत्र, कागजात, सूचना एवं जानकारीहरु अनाधिकृत रुपमा दुरुपयोग हुने गरेको अवस्थामा यस्ता विषयहरु सरकारी अधिकारिक इमेल र वेभसाइटबाट मात्र प्रयोग हुने गरी आवश्यक व्यवस्था मिलाउन समिति नेपाल सरकार सञ्चार तथा सूचना प्रविधि मन्त्रालयलाई निर्देश गर्दछ,’ समितिको निर्देशनमा भनिएको छ।
त्यस्तै, सबै स्थानीय तहका वडा कार्यालय, स्वास्थ्य संस्था तथा माध्यमिक तहका सामुदायिक विद्यायलयमा द्रुत गतिको इन्टरनेट सेवा उपलब्ध गराउने कार्यक्रम प्रभावकारी रुपमा कार्यान्वयन गर्न पनि सरकारलाई निर्देशन दिइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1768395492.png)
