काठमाडौं- बढी मूल्यमा खाद्य वस्तु बेच्ने अनलाइन व्यापार कम्पनी दराज क्यामुलाई वाणिज्य, आपूर्ति तथा उपभोक्ता संरक्षण विभागले कारबाही गर्ने भएको छ। दराज अनलाइनमार्फत बिगमार्टको सामान (खानेतेल) अधिकतम खुद्रा बिक्री मूल्यभन्दा बढीमा बिक्री वितरण गरेको भेटिएपछि विभागले कारबाहीको प्रकृया अगाडि बढाएको हो।
‘दराजले बिक्री गरेको खानेतेलमा एमआरपीभन्दा बढी मूल्य लिएको भेटिएपछि हामीले दराजलाई सो विषयमा स्पष्टिकरण सोधेका थियौं। दराजले आफूले नभई बिगमार्टले बढी मूल्य तोकेको भनेको छ,’ विभागका प्रवक्ता रविन्द्र आचार्यले नेपाल लाइभसँग भने।
दराजले बढी मूल्यमा सामान बिक्री गरेको विभागमा गुनासो आएपछि जेठ ३२ गते विभागले दराजलाई उसको व्यवसायसँग सम्बन्धित दर्ता, पान, भ्याट र चालु आर्थिक वर्षको खरिद तथा बिक्री बिललगायत काजगातहरु लिएर ३ दिनभित्र विभागमा उपस्थित हुन भनेको थियो। प्रवक्ता आचार्यका अनुसार दराजले मंगलबार ती कागजातहरु बुझाएको छ भने सामानको मूल्य दराजले नभई बिगमार्टले बढी तोकेको प्रष्टिकरण पनि विभागमा दिएको छ। तर विभागले भने उपभोक्ता संरक्षण ऐन २०७५ विपरीतको काम गरेको देखिएको भन्दै कारबाहीका लागि प्रकृया अगाडि बढाइसकेको छ।
वाणिज्य विभागले दराजलाई यसअघि पनि कारबाही गरिसकेको छ। अनुचित व्यापारिक तथा व्यवसायजन्य क्रियाकलाप गरेको भन्दै वाणिज्य, आपूर्ति तथा उपभोक्ता संरक्षण विभागले दराज क्यामुलाई गत माघमा ३ लाख रुपैयाँ जरिवाना गरेको थियो।
वाणिज्य विभागले गतवर्ष कात्तिक २२ गते पहिलोपटक दराज क्यामुको अनुगमन गरेको थियो। दराजले नोभेम्बर ११ (कात्तिक २५ गते) ‘मेगा सेल डे’ मनाएर ‘मेगा डिल अफर’ का नाममा छुट योजना चलाएपछि त्यसबाट उपभोक्ता ठगीको सम्भावना बढी रहेको भन्दै विभागले दराजको व्यवसायमाथि पहिलो पटक निगरानी थालेको थियो। त्यस्तै, दराज कम्पनीको व्यापारको वैधता र उपभोक्ता ठगिको विषयमा अनुगमन गरेको विभागले अनुगमन गरेको ३ महिनापछि निर्णय सार्वजनिक गर्दै उक्त कम्पनीले उपभोक्ता संरक्षण ऐन २०७५ को दफा ३८ अनुसार कसुर गरेको भन्दै कारबाही गरेको थियो।
ऐनको उक्त दफामा रहेको प्रावधान हेर्दा दराज क्यामु कम्पनीले ‘वस्तु वा सेवाको वास्तविक गुणस्तर, परिमाण, मूल्य, नापतौल, ढाँचा वा बनावट आदि ढाँटी, लुकाई, छिपाई वा झुक्याई त्यस्तो वस्तु वा सेवा बिक्री वा प्रदान गरेको’ देखिन्छ।
वाणिज्य विभागले अनलाइन व्यापार कम्पनीलाई उपभोक्ता संरक्षण ऐन २०७५ अनुसार कारबाही गरेको यो नै नेपालको पहिलो घटना थियो। गत माघमा दराजलाई कारबाही गरेपछि विभागले दजनौं अरु अनलाइन व्यापार कम्पनीलाई पनि कारबाही गरिसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
