काठमाडौं- राष्ट्रियसभाले प्रतिनिधिसभाबाट सन्देशसहित प्राप्त ‘विनियोजन विधेयक, २०७७ माथि विचार गरियोस्’ भन्ने प्रस्तावलाई बहुमतले स्वीकृत गरेको छ। राष्ट्रियसभाको बिहीबारको बैठकमा अर्थमन्त्री डा. युवराज खतिवडाले प्रस्ताव गर्नुभएको विधेयकमाथि सैद्धान्तिक छलफल सकिएपछि बहुमतले स्वीकृत गरेको हो। सैद्धान्तिक छलफलका क्रममा सांसदहरुले उठाएका प्रश्नहरुको जवाफ दिँदै अर्थमन्त्री खतिवडाले मुलुकको सन्तुलित विकासको लागि कुनै खास क्षेत्रलाई मात्रै चलायमान गराएर नहुने बताए।
सबै क्षेत्रलाई एकसाथ अगाडि बढाउँदै लैजानुपर्ने बताएका उनले कोरोनाको रोकथाम, नियन्त्रण र उपचार सरकारको पहिलो प्राथमिकता भएको र आर्थिक क्रियाकलापलाई दोस्रो प्राथमिकतामा राखेर बजेट ल्याइएको अर्थमन्त्री खतिवडाले स्पष्ट पारेका छन्।
‘कोरोनाको रोकथाम, नियन्त्रण, उपचार हाम्रो पहिलो प्राथमिकता हो। जीवन रक्षा गर्नु पहिलो प्राथमिकता हो। जीवन रक्षा गर्दै आर्थिक क्रियाकलापलाई सामान्य गतिमा फर्काउने दोस्रो जिम्मेवारी हो,' उनले भने, 'त्यो क्रममा राहत, पुनरुत्थान, राजेगारीका कुराहरु त्यसै भित्र पर्छन। त्यही बाटोमा त्यहि क्षेत्रहरुमा मात्रै बजेट वृद्धि गरिएको छ। अरु बाँकी सबै क्षेत्रमा बजेट कटौती गरिएको छ। अंकले नै त्यो बताइसकेका छन्।’
कोरोना भाइरस नियन्त्रण गर्न सरकार असफल भएको भन्दै सरकारको विकल्प खोज्नुपर्ने सांसदहरुले बताएपछि अर्थमन्त्री खतिवडाले कसैले पनि कोरोना भाइरसको महामारीलाई अवसरको रुपमा लिन नहुने बताए। उनले कोरोना रोकथामका लागि भएको खर्च विवरण पारदर्शी रुपमा सरकारले सार्वजनिक गर्ने समेत बताए।
प्रतिनिधिसभाबाट सन्देश सहित प्राप्त विनियोजन विधेयक २०७७ मा विभिन्न मन्त्रालयगत शीर्षकमाथि छलफल गर्न र सम्बन्धित मन्त्रीले जवाफ दिनका लागि असार १ देखि ४ गतेसम्मको समय तोकिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
