धनगढी- नेपाल कम्युनिष्ट पार्टी सुदूरपश्चिम संसदीय दलको बैठक झण्डै ११ महिनापछि बसेको छ । २०७६ असार १४ गतेपछि नेकपाको दलको बैठक बस्न सकेको थिएन।
सुदूरपश्चिम प्रदेश सरकारले सोमबारमात्र आर्थिक वर्ष २०७७/७८ को नीति तथा कार्यक्रम प्रदेश सभा सचिवालयमा प्रस्तुत गरेको थियो। नेकपाका एक प्रदेश सभा सदस्यले भने‚ ‘दलको बैठक समयको आवश्यकताअनुसार निरन्तर बस्नुपर्ने हुन्छ तर, हाम्रा दलका नेतालाई भने यस विषयमा चासो छैन।’ उनले दलका नेताले बजेट, नीति तथा कार्यक्रममा सहमति जुटाउनमात्र बैठक आह्वान गर्ने गरेको आरोप लगाए।
११ महिनासम्म पनि दलको बैठक नबस्नु, प्रदेश सरकारले आफ्नै ढंगले काम गर्नु, जनमैत्री विकास गर्न नसक्दा प्रदेश सभामा सत्तापक्षकै सदस्यहरूले विरोध गर्ने गरेका छन्।
पूर्वबजेट छलफलका क्रममा सदनमै सरकारको चर्को विरोध गर्दै मुख्यमन्त्रीले काम गर्न नसकेकोले राजीनामा दिनुपर्ने भन्दै नेकपाका प्रदेश सभा सदस्यहरू बोल्न थालेपछि मुख्यमन्त्री तथा दलका नेता भट्टले एक वर्षपछि दलको बैठक बोलाएका हुन्।
दलको बैठक पहिलो पटक पार्टीका नेताहरूको उपस्थितिबिना नै बसेको छ। यसअघिका हरेक बैठकमा पार्टीका प्रदेश इञ्चार्ज भीम रावल, स्थायी समिति सदस्य लेखराज भट्ट, सह इञ्चार्ज लक्ष्मण जोशी र प्रदेश अध्यक्ष कर्णका थापाको उपस्थितिमा मात्रै हुने गर्थ्यो।
सरकारले नीति तथा कार्यक्रम प्रस्तुत गरेपछि सहमति जुटाउन सो बैठक आह्वान गरिएको हुनसक्ने सत्तापक्षका प्रदेश सभा सदस्यहरूको अनुमान छ।
मंगलबारदेखि सुरु भएको बैठकलाई सुरु गर्दै मुख्यमन्त्री त्रिलोचन भट्टले सरकार सञ्चालनमा पार्टीको संसदीय दलसँग समन्वय गर्न नसकेकोमा माफी मागे।
मुख्यमन्त्री भट्ट निकै रक्षात्मक देखिएको बैठकमा सहभागी एक प्रदेश सभा सदस्यले बताए।
बैठकमा सहभागी ती प्रदेश सासंदका अनुसार मुख्यमन्त्रीले सुरुमै झण्डै अढाई वर्ष सरकार चलाएको र यस अवधिमा पार्टी र संसदीय दलसँग समन्वय हुन नसकेकोमा क्षमा मागेका थिए।
आगामी दिनमा दलसँगको समन्वयलाई जोड दिइने र दलकै सल्लाहअनुसार सरकार चलाउने उनको प्रतिबद्धता थियो।
बैठकमा पार्टीका केन्द्रीय सदस्यसमेत रहेका प्रदेश सभा सदस्य बीरमान चौधरीले सरकारका पछिल्ला गतिविधि सन्तोषजनक नदेखिएको र दलमा सल्लाह नगरी आफूखुशी जाने चाहना राखे सरकार परिवर्तन समेत हुनसक्ने चेतावनी दिए।
दलको मंगलबारको बैठकमा बोलेका १२ जना प्रदेश सांसदहरूले सरकारको समिक्षा गर्न ढिलो भइसकेको बताएका छन्। मंगलबार प्रमुख सचेतक तारा लामा तामाङ, सचेतक अक्कल रावल, विषयगत समितिका सभापतिहरू नेपालु चौधरी, हर्क बहादुर कुँवर‚ कुन्ति जोशी र प्रदेश सांसद लिलाधर भट्टलगायतले बोलेका थिए।
प्रमुख सचेतक तामाङले अरु बेला जे सुकै भए पनि विपद आइलागेको बेलामा समेत सरकारले जनताले देख्नेगरी काम गर्न नसकेकाले समिक्षा गर्न जरुरी रहेको बताए भने सचेतक रावलले सरकारको कामले आफूहरूलाई जनतामा जान गाह्रो परेकोले विकल्प खोज्नुपर्ने अवस्था आएको बताए। मंगलबारको बैठकमा बोल्ने सबैले सरकारको विरोध गरेका छन्।
सांसद लिलाधर भट्टले आफैंले घोषणा गरेका कार्यक्रम समेत कार्यान्वयन गर्न नसक्ने अवस्था आउँदा पद ओगटेर बस्नुभन्दा छोड्नु उपयुक्त हुने बताए।
बैठकमा सबै प्रदेश सभा सदस्यहरूले बोल्ने पालो नपाएपछि बुधबार बिहान फेरि बस्नेगरी स्थगित भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
