काठमाडौं- केन्द्रीय तथ्यांक विभागले आर्थिक गणना २०७५ को राष्ट्रिय प्रतिवेदन भाग २ सार्वजनिक गरेको छ।
देशभर रहेका अर्थतन्त्रसँग सम्बन्धित प्रतिष्ठान तथा व्यवसायको आधारभूत विवरणहरु संकलन गर्न तथ्याङ्क विभागले आर्थिक सर्वेक्षण गरेको थियो। आर्थिक गणनापछि विभागले सार्वजनिक गरेको तथ्याङ्कअनुसार वर्ष २०७५ मा ९ लाख २३ हजार ३ सय ५६ वटा आर्थिक क्रियाकलाप गर्ने प्रतिष्ठानहरु सञ्चालनमा रहेका थिए भने यी प्रतिष्ठानमा सक्रिय रुपमा संलग्न जनशक्तिको संख्या ३२ लाख २८ हजार ४ सय थियो।
सोमबार सार्वजनिक तथ्यांकअनुसार यी प्रतिष्ठानको वार्षिक कूल नाफा ८ खर्ब ५३ अर्ब २१ करोड रुपैयाँ बराबर देखिएको छ। यी प्रतिष्ठानहरुको वार्षिक आम्दानी तथा बिक्री २९ खर्ब १५ अर्ब ९० करोड ९० लाख रुपैयाँ बराबर देखिँदा संचालन खर्च २० खर्ब ६२ अर्ब ३९ करोड ६० लाख रुपैयाँ बराबर देखिएको छ।
यसरी देशभर संचालित व्यवसायिक प्रतिष्ठानको औसत प्रतिएकाई नाफा ९ लाख ४७ हजार रुपैयाँ बराबर देखिएको छ। त्यस्तै, व्यवसायिक प्रतिष्ठानमा संलग्न एक जना व्यक्ति बराबर २ लाख ७४ हजार रुपैयाँ बराबर नाफा देखिन्छ। अर्थात् औसतमा एउटा व्यवसायिक प्रतिष्ठानले वर्षमा ९ लाख ४७ हजार रुपैयाँ कमाउँछ भने त्यसमा जोडिएका व्यक्तिले वर्षमा औसत २ लाख ७४ हजार रुपैयाँ कमाउँछ।
दर्ता भएका प्रतिष्ठानको आम्दानी धेरै
आर्थिक ४ लाख ६२ हजार ६ सय ५ वटा प्रतिष्ठान अर्थात् कुल संख्याको ५० दशमलव १ प्रतिशत र दर्ता नभएका ४ लाख ६० हजार ४ सय २२ वटा प्रतिष्ठान अर्थात कुल संख्याको ४९ दशमलव ९ प्रतिशत संस्थाहरु कुनै पनि सरकारी निकायमा दर्ता नभएरै सञ्चालन भइरहेका छन्।
दर्ता भएका प्रतिष्ठानहरुको वार्षिक आम्दानी २६ खर्ब ८१ अर्ब ७३ करोड ४० लाख, खर्च १९ खर्ब ६ करोड ३० लाख बराबर छ भने नाफा ७ खर्ब ८१ अर्ब १० करोड ५० लाख रुपैयाँ बराबर छ। त्यसैगरी, दर्ताबिनै संचालन भइरहेको व्यवसायिक प्रतिष्ठानहरुको वार्षिक आम्दानी २ खर्ब ३३ अर्ब १५ करोड १० लाख, खर्च १ खर्ब ६१ अर्ब १४ करोड ४० लाख र नाफा ७२ अर्ब ७० लाख रुपैयाँ बराबर छ।
पुरुष भन्दा महिलाले संचालन गरेका व्यवसायमा कम नाफा
व्यवसायिक प्रतिष्ठानमा सक्रिय रुपमा संलग्न जनशक्तिको संख्या ३२ लाख २८ हजार ४ सय ५७ रहेकोमा २० लाख १२ हजार २ सय ३७ (६२.३ प्रतिशत) पुरुष र १२ लाख १६ हजार २ सय २० (३७.७ प्रतिशत) महिला रहेका छन्। महिलाभन्दा पुरुषले संचालन गरेका प्रतिष्ठान बढी भएपछि नाफा पनि स्वभावतः पुरुषले संचालन गरेका प्रतिष्ठानहरुमा देखिएको छ।
पुरुष व्यवस्थापकले संचालन गरेका प्रतिष्ठानमा २५ खर्ब ८४ अर्ब ६६ करोड ५० लाख आम्दानी, १८ खर्ब २८ अर्ब ५७ करोड ८० लाख खर्च र ७ खर्ब ५६ अर्ब ८ करोड ६० लाख आम्दानी देखिएको छ। त्यस्तै महिला व्यवस्थापकले संचालन गरेका प्रतिष्ठानहरुमा २ खर्ब ८५ अर्ब ५३ करोड ७ लाख आम्दानी, १ खर्ब ९२ अर्ब ८६ करोड ५० लाख खर्च र ९२ अर्ब ६७ करोड २० लाख रुपैयाँ बराबर नाफा कमाएको देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
