काठमाडौं- नेपाली फिल्म उद्योगमा २०७४ सालमा धेरै कलाकारले डेब्यु गरे। कति नयाँ अनुहार दर्शक र सिनेकर्मीहरुका लागि सम्झनयोग्य भए भने कतिपयले डेब्यु गरेको फिल्म असफल बन्न पुगे।
यस वर्ष दर्शकले रुचाएका र आगामी दिनमा फिल्म क्षेत्रमा नै केही गर्न सक्ने सम्भावित अनुहार भने सीमित मात्र छन्।
सफल डेब्यु अनुहारमा अभिनेता सलिनमान बनियाँको चर्चा यस वर्ष नेपाली सिने नगरीमा छाइरह्यो।
झरना थापा निर्मित फिल्म ‘ए मेरो हजुर २’मा साम्राज्ञी राज्यलक्ष्मी शाहसँग जोडी बाँधेका सलिनमानको चर्चा लगभग वर्षभरि रहिरह्यो।
नायिका दीपिका प्रसाई पनि वर्षकै चर्चित र सफल डेब्यु अनुहारमा पर्न सफल भइन्। रमेश उप्रेती निर्मित फिल्म ऐश्वर्य मार्फत दर्शकमाझ आएकी दीपिका फिल्मको गीत र ट्रेलरमा भएको डाइलगबाट निकै चर्चामा पुगिन्।
चैतको अन्तिम शुक्रबारबाट प्रदर्शनमा आएको फिल्म लिलिबिलीबाट डेब्यु गरेकी नायिका जसिता गुरुङ पनि धेरै कलाप्रेमीको नजरमा परिन्। नायक प्रदीप खड्काको लोकप्रियतासँग जोडिएर चर्चामा आएकी जसिताको अभिनयमा धेरैले निकै आशा गरेका छन्। जसिताको अभिनय र चर्चाका आधारमा वर्ष सफल डेब्यु अनुहारमा जसिताको स्थान पनि सुरक्षित देखिन्छ।
त्यसैगरी फिल्म रुद्रबाट फिल्म नगरीमा पाइला चालेकी अभिनेत्री सारा सिर्पाली पनि वर्ष २०७४ की सफल डेब्यु नायिका बनिन्। फिल्म रुद्र र पिँजडा ब्याक अगेन गरी एकै वर्ष २ फिल्ममा अभिनय गरेकी सिर्पालीका फिल्महरुले व्यावसायिक सफलता प्राप्त नगरे पनि उनको अभिनय कला र क्षमताको चौतर्फी तारिफ भएको थियो।
वर्षकी अर्की चर्चित र सफल अभिनेत्री हुन् अदिती बुढाथोकी। युवा स्टार अनमोल केसीको अपोजिटमा रहेर फिल्म कृ मार्फत डेब्यु गरेकी अदितीको चर्चा नेपाली सिने नगरीदेखि बलिउडसम्म फैलियो। फिल्ममा उनको अभिनयलाई खासै नरुचाइए पनि चर्चाका हिसाबले उनका लागि आगामी नेपाली फिल्मी करिअर सम्भावनायोग्य देखिन्छ।
त्यसैगरी अर्को सफल र सम्भावना योग्य नाम हो मिरुना मगर। व्यावसायिक हिसाबले असफल फिल्म लालपूर्जा मार्फत डेब्यु गरेकी मगरको अभिनयलाई रुचाइएको थियो।
अभिनेता आशिरमान देशराज जोशी फिल्म ग्याङस्टर ब्लुज मार्फत डेब्यु गरेका नायक हुन्। फिल्म रिलिजपूर्व निकै आशा राखिएको फिल्म ग्याङस्टर ब्लुज अन्तत: पूर्ण असफल बन्यो। तर आशिरमानको माग भने नेपाली चलचित्र बजारमा अहिले पनि उच्च छ।
यस्तै सफल र सम्भावना बोकेका नामहरुमा सायद २ मा डेब्यु गरेका अभिनेता अमृत ढुंगाना, छक्का पञ्जा २ बाट डेब्यु प्रर्दशनमा आएका स्वरुपपुरुष ढकाल, भुइँमान्छेबाट डेब्यु गरेकी नायिका सिपोरा गुरुङ, राज्जारानीबाट डेब्यु कलाकार संगीता नपित, फिल्म कान्छीबाट डेब्यु गरेकी कलाकार भूमिका श्रेष्ठ लगायतका कलाकारहरु यस वर्ष सफल डेब्यु अनुहारहरुमा सूचीकृत बने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791562069.png)
-1786602170.png)
