काठमाडौं- कोरोना भाइरस (कोभिड-१९) को संक्रमण नेपालमा देखिएपछि सरकारले गत चैत ११ गतेदेखि देशभर लकडाउन लगायो।
लकडाउन सुरु भएपछि जनजीवन कष्कटर बनेको भन्दै काठमाडौंमा रहेका सांसद तथा नेताहरु राहत वितरणको नाममा गृह जिल्ला गए। उपत्यका छाड्ने सांसद तथा नेताहरुको त्यसबेला लर्को नै लागेको थियो।
लकडाउनको केही समयपछि काठमाडौं उपत्यका कोरोना मुक्तसमेत भइसकेको थियो। सुरक्षाकर्मीले समेत विभिन्न बैठकहरुमा काठमाडौं उपत्यकामा प्रवेश कडाइ गरेर काठमाडौंभित्र मात्रै लकडाउन खोल्दा जोखिम नहुने सुझाव दिएका थिए। नेपाल प्रहरीका एक उच्च अधिकारी भन्छन्, ‘काठमाडौंमा कोरोना कन्ट्रोलमा आइसकेको अवस्थामा लकडाउन जारी राखेर जनजीवन कष्टकर बनाउनु भन्दा आन्तरिक रुपमा खोल्दा उपयुक्त हुने हाम्रो सुझाव थियो।’
काठमाडौंमा आन्तरिक रुपमा लकडाउन केही खुकुलो पनि भएको थियो। तर काठमाडौं उपत्यकाबाट छिर्न कडाइ गरिरहेको भनेकै बेला उपत्यका बाहिरबाटै काठमाडौं भित्रिएका नागरिकहरुमा कोरोना देखिन थालेको छ। काठमाडौं उपत्यकामा कोरोना संक्रमितको संख्या पाँच जना पुगिसकेको छ।
सुरक्षित रहेको काठमाडौं एकाएक कोरोनाबाट असुरक्षित हुन पुग्नुको कारण मध्ये एक सांसदहरु पनि रहेको नेपाल प्रहरीको एक उच्च अधिकारीले नेपाल लाइभलाई जानकारी दिए। ती अधिकारीले नेपाल लाइभसँग भने, ‘बाहिर गएका रहेक सांसदका गाडीमा फर्कंदा ५/६ जना अरु मान्छे पनि सँगै काठमाडौं भित्रिने गरेका छन्। सांसदकै गाडीमा त्यसरी मान्छे काठमाडौं भित्रिएको जानकारी आए पनि केही गर्न सक्ने अवस्था रहेन।’
राहतका नाममा सांसदहरु उपत्यका बाहिर भए पनि यता संघीय संसदको बर्खे अधिवेशन सुरु हुने समय नजिकिसकेको थियो। बर्खे अधिवेश सुरु गर्नुपूर्व प्रतिनिधिसभा र राष्ट्रियसभाका सांसदहरुमा कोरोना भाइरस संक्रमण भए/नभएको परीक्षण वैशाख २५ गते सुरु गर्ने तयारी भएपछि काठमाडौं उपत्यका बाहिर गएका सांसदहरु काठमाडौं भित्रन थालेका थिए।
यसरी काठमाडौं भित्रने हरेकजसो सांसदको गाडीमै अन्य व्यक्ति पनि काठमाडौं छिर्ने गरेको सुरक्षाकर्मीले बताएका छन्।
अझ सांसदको समेत स्वाब संकलन गर्ने बताएपछि सांसदहरु काठमाडौं भित्रिएका थिए। संघीय संसदको प्रतिनिधिसभामा २७५ र राष्ट्रियसभामा ५९ सदस्य हुन्छन्। उनीहरुमध्ये ५४ सांसद त काठमाडौं बाहिर भएकै कारण कोरोना परीक्षण समेत हुन सकेको थिएन। त्यसबेला छुटेका सांसदहरु समेत अहिले अधिकांश जसो काठमाडौं भित्रिसकेका छन्। उनीहरु हरेकसँग ५/७ जनाका दरले अन्य व्यक्ति समेत काठमाडौं प्रवेश गरेकाले जोखिम बढेको सुरक्षा निकायले चिन्ता व्यक्त गरेको छ।
योसँगै काठमाडौं प्रवेश गराइदिन भन्दै अन्य भिआइपी व्यक्तिहरुको फोन पनि दिनहुँ जसो आउने गरेको सुरक्षा अधिकारीले गुनासो गरेका छन्। ‘हामी लकडाउन कडाइका साथ कार्यान्वयनमा छौं। यस्तो बेलामा सहयोग गर्नुपर्नेमा उल्टै भिआइपी व्यक्तिबाटै मेरो मान्छे काठमाडौं आउँदै छ भन्दै गाडी नम्बर टिपाउने गरेको पाइएको छ’ एक सुरक्षा अधिकारीले भने।
यसरी भिआइपीको आडमा काठमाडौं छिरेकासँगै लुकिछिपी जंगलको बाटो हुँदै काठमाडौं छिर्ने सर्वसाधरणका कारण पनि काठमाडौं उपत्यका जोखिम बन्दै गएको छ। महानगरीय ट्राफिक प्रहरी महाशाखाको तथ्याङ्क अनुसार लकडाउनकै समयमा दैनिक सरदर दुई हजार मान्छे काठमाडौं उपत्यका भित्रने गरेका छन्।
प्रहरीको यो भनाइलाई सत्तारुढ दल नेपाल कम्युनिस्ट पार्टी (नेकपा)का सांसद रामनारायण विडारीले समेत साथ दिएका छन्। मन्त्री, सांसद र नेताले कोरोना महामारीको समयमा राहत बाँड्न गाउँगाउँ जाँदा कोरोना सारेको आरोप उनको थियो।
राष्ट्रियसभामा बोल्दै उनले भने, ‘म नेता हुँ भनेर राहत बाँड्न ट्रयाक सुट, टाई लाएर गाउँगाउँमा गएर मान्छे जम्मा पारेर कोरोना संक्रमित गराउने काम सांसदले गरे, नेताले गरे, मन्त्रीले गरे।’
अझ नुवाकोटका प्रदेश सांसद केशवराज पाण्डेले बिना हस्ताक्षरको पासबाटै खचाखचको भरिएको गाडी बुधबार काठमाडौं भित्र्याएका थिए।
केही समय अघि पार्टी फुटाउने योजनासहित कोरोना संक्रिमित तराईका जिल्लामाहरु समेत काठमाडौंदेखि सांसदहरु गएका थिए। नेकपाका सांसद महेश बस्नेत, कृष्णकुमार श्रेष्ठ (किसन), पूर्वआइजी सर्वेन्द्र खनालसहितको टोली धनुषा, महोत्तरीसम्म पुगेका काठमाडौं आएको थियो। यसरी काठमाडौं भित्रने सांसदहरुले न कोरोना जाँच नै भएको छ न उनीहरुसँग काठमाडौं भित्रन खोज्नेहरुलाई रोक्न सकिएको छ। अहिलेको मुख्य चुनौती नै यही देखिएको सुरक्षा निकायले बताएका छन्।
तस्बिरहरु : ऋग्वेद शर्मा/नेपाललाइभ
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
