कोरोना अपडेट

‘थोरै राहतले कति दिनसम्म चल्छ?’

शेरबहादुर ऐर शुक्रबार, जेठ २, २०७७ ०६:३६

कैलाली- एक कठ्ठा जग्गामा काठले बनाएको झोपडी। त्यो घरमा घोडाघोडी नगरपालिका-२ टनकपुर गाउँकी शैलजा बिक बस्दै आएकी छन्। शारीरिक रुपमा अपांगता रहेकी उनका एक छोरा र एक छोरी छन्।

शैलजा सशस्त्र द्वन्द्वकालमा पिठ्यूँमा गोलीको छर्रा लागेपछि उपचारको अभावमा अपाङ्ग भइन्। कम्मर मुनिको भाग नचल्दा छोराको साहारामा हिँडडुल गर्छिन्। उनका श्रीमान अर्को बिहे गरेर छुट्टै बसेका छन्।

सरकारले जारी गरेको लकडाउनका कारण उनले खाद्यान्न अभाव रहेको उनको गुनासो छ। सरकारले लकडाउन जारी गरेपछि आर्थिक रुपमा विपन्न, गरीब, अशक्त, अनाथ बालबालिका, मजदुरलगायतलाई राहतस्वरुप खाद्यान्न उपलब्ध गराइरहेको छ।

घोडाघोडी नगरपालिकाले वडा कार्यालयमार्फत पहिलो चरणको राहत वितरण गरी अहिले दोस्रो चरणको राहत वितरण गर्ने तयारीमा छ। पहिलो चरणमा शैलजाले १५ केजी चामल, एक लिटर तेल, एक पोका नुन र एक प्याटेक सोयाबिन मस्यौरा पाएकी थिइन्।

उनको सानो परिवार छ। तर, उनको घरमा दुई जना पाहुना पनि आएका छन्। उनले प्रश्न गरिन्‚ ‘घरमा पाहुना छन्। उनीहरूलाई पनि खुवाउनु पर्‍यो। जाउ’ भनेर कसरी भन्ने? जसोतसो गरेर खुवाउनु पर्‍यो। एक पटक दिएको थोरै राहत कति दिनसम्म चल्छ र?’

शैलजाको हातमा रातो अपाङ्ग परिचयपत्र छ। उनले भनिन्‚ ‘लकडाउन हुँदा सरकारले दिइरहेको भत्ता पनि निकाल्न पाएकी छैन।’

लकडाउनका कारण शैलजाजस्ता थुप्रै अपाङ्गता भएका व्यक्ति, विपन्न वर्ग, असहाय समस्यामा परेका छन्।

घोडाघोडी नगरपालिका- २ को वडा कार्यालयले अहिलेसम्म विभिन्न चरणमा २ सय ६० घर परिवारलाई राहत वितरण गरेको जनाएको छ। वडाध्यक्ष हरिराज बिष्टले भने‚ ‘कसैलाई पक्षपात नगरी राहत वितरण गरिएको छ।’

घोडाघोडी नगरपालिकाका निमित्त प्रमुख प्रशासकीय अधिकृत खगेन्द्र बहादुर सिंहले पहिलो र दोस्रो चरण गरेर १५ सय ९० घरपरिवारमा राहत वितरण भइसकेको जानकारी दिए।

उनले नगरपालिकाले बनाएको आफ्नै कार्यविधिअनुसार अतिविपन्न परिवारहरूलाई चामल, दाल, नुन, तेल र साबुन वितरण गरिएको बताए।

श्रमिक वर्ग तथा असहायहरूलाई ३० किलो चामल, तीन किलो दाल, दुई प्याकेट नुन, दुई लिटर तेल, चारवटा साबुन र दुई किलो चिनी वितरण गर्ने तयारीमा रहेको नगरपालिकाले जनाएको छ।