राजनीति

संसद बैठक तयारी : सांसदहरुबीच दुई कुर्सी खाली, कोरोना परीक्षण र मास्क अनिवार्य

दुर्गा दुलाल बुधबार, वैशाख २४, २०७७ १२:५०

काठमाडौं– संघीय संसदको बजेट अधिवेशनका लागि संसद सचिवालयले स्वास्थ्यलाई उच्च प्राथमिकतामा दिएर तयारी थालेको छ। संसद अधिवेशनका लागि सचिवालयले विशेष तयारी गरिरहेको संसद सचिवालयका प्रवक्ता रोजनाथ पाण्डेले बताए।

शुक्रबारदेखि सुरू हुने संसदको बजेट अधिवेशनको बैठकमा एक सांसद र अर्को सांसदबीचमा दुई कुर्सी खाली राखिने गरी सामाजिक दूरी कायम गरिने छ। संसदमा प्रवेश गर्ने सांसदहरुले अनिवार्य रुपमा मास्क लगाउनुपर्ने र ज्वरो नआएका सांसदले मात्र प्रवेश पाउने व्यवस्था गरिएको छ।

त्यस्तै, सेनिटाइजरको प्रयोग गर्ने, हात नमिलाउनेदेखि विश्व स्वास्थ्य संगठनले तोकेका अन्य मापदण्ड कडाइका साथ पालना गराइने प्रवक्ता पाण्डेले बताए। संसद भवनबाहिर हात धुन साबुन पानीको व्यवस्था गरिने छ। हात धोएपछि मात्र संसद भवनमा प्रवेश दिइने उनले बताए।

‘सांसदको बीचका दुई कुर्सी खाली राख्छौं, सांसदलाई मास्क अनिवार्य गर्छौं’, पाण्डेले भने, ‘सांसदहरूको टेबलमा सेनिटाइजर अनिवार्य गरिएको छ र बोल्नुअघि माइक पनि अनिवार्य रुपमा सेनिटाइज गर्नुपर्ने छ।’

तयारीका विषयमा रणनीति बनाउन यसअघि सिभिल र टेकु अस्पतालका डाक्टरहरुले संघीय संसदको भवन निरीक्षण गरेका थिए। उनीहरुको सुझाव र विश्व स्वास्थ्य संगठनले दिएको मापदण्डअनुसार सबै तयारी सकिएको पाण्डेले बताए।

त्यस्तै, सांसदहरुलाई पनि संसद अधिवेशन सुरु हुनुअघि पिसिआर विधिबाट कोरोना परीक्षण गराइने छ। मंगलबार बसेको कार्य व्यवस्थाको बैठकले अनिवार्य रुपमा कोरोना परीक्षण गराउने निर्णय गरेको थियो। उक्त निर्णयका आधारमा नेगेटिभ रिपाेर्ट आएका सांसदहरुलाई मात्र प्रवेश दिने तयारी सचिवालयले गरेको छ।

संसद बैठकमा सबै पार्टीका सबै सांसदहरुलाई एकै पटक उपस्थित नगराउन रणनीति बनाइने भएको छ। सम्भव भएसम्म कोरम पुग्ने र सत्ता पक्षको बहुमत हुने गरी सांसदलाई उपस्थित गराउने तयारी सचिवलयको छ। सबै पार्टीका सांसदहरुको संख्याका आधारमा उनीहरुलाई उपस्थित हुने दिनको तय गरिने प्रारम्भिक तयारी छ।

विश्व स्वास्थ्य संगठनले कम्तिमा एक मिटरको सामाजिक दूरी राख्न आह्वान गर्दै आएको छ। सोही मापदण्डअनुसार दुई कुर्सी खालि राख्ने रणनीति अपनाइएको उनले बताए। संसद सचिवालयले सांसदको सिटसमेत तोक्ने तयारी गरेको छ। तर, दलहरुमा सांसदको वरियता विवादले सिट तोक्ने विषयमा संसद सचिवालयले कुनै टुंगो गर्न सकेको छैन।

संसद बैठकमा पहिलो लाइनमा शीर्ष नेताहरु बस्दै आएका छन्। पूर्व प्रधानमन्त्री, संसदीय दलका दलका नेता र पूर्व सभामुखले पहिलो लाइनमा सिट पाउँछन्। तर, कुर्सी खाली राख्दा सिट व्यवस्थापन गर्न सचिवालयलाई अफ्ठ्यारो परेको छ। तर, सचिवालयले पहिलो लहरमा प्रधानमन्त्रीमात्र राख्ने तयारी गरेको छ।

संसदको अधिवेशनलगत्तै संसदमा सरकारको नीति तथा कार्यक्रम र बजेट पेश हुँदैछ।

त्यतिबेला प्रतिनिधिसभा र राष्ट्रियसभाको संयुक्त बैठक सञ्चालन हुन्छ। ‘त्यस्तो अवस्थामा तीन सय सांसदका लागि ९ सय कुर्सी आवश्यक हुन्छ’, पाण्डेले भने, ‘यसपटक संसद हेर्न आउने दर्शकका लागि कुनै पास वितरण हुने छैन।’

नयाँबानेश्वरस्थित संघीय संसद भवनमा १५ सय कुर्सी छन्।

संसद सचिवालयले सांसद, कर्मचारी र सुरक्षाकर्मीको पिसिआरबाट कोरोना परीक्षण गर्न स्वास्थ्य मन्त्रालयलाई आग्रह गर्ने भएको छ।

सांसदहरूले सभामुख अग्नि सापकोटालाई भेटेरै पिसिआर परीक्षणको माग गरेका थिए।

जेठ १५ गते बजेट ल्याउनुपर्ने संवैधानिक व्यवस्था छ। बजेटअघि प्रिबजेट छलफल र नीति तथा कार्यक्रम माथि छलफल हुनेछ।

गत वर्ष प्रिबजेट अघि नीति तथा कार्यक्रम पेश भएको थियो। यसपटक सरकारले प्रिबजेट छलफल गराएर मात्र नीति तथा कार्यक्रम पेश गर्ने तयारी गरिरहेको छ।

संसदको अधिवेशन २६ गते अपराह्न ४ बजेका लागि डाकिएको छ।